2 Kronika 24 - ŊMALƐ KRƆŊKRƆŊ LƐ

Yuda Maŋtsɛ Yoash

¹ Yoash eye afii kpawo be ni ebɔi maŋtsɛyeli, ni eye maŋtsɛ afii nyɔŋmai ejwɛ yɛ Yerusalɛm. Enyɛ ni fɔ lɛ gbɛi ji Zibia, ni ejɛ Beersheba.

² Yoash hi shi bɔ ni Yehowa taoɔ yɛ Osɔfo Yehoiada yinɔ fɛɛ.

³ Yehoiada kpee yei enyɔ ehã Maŋtsɛ Yoash, ni ekɛ amɛ fɔ bihii kɛ biyei.

⁴ Eshɛ be ko ni Yoash to eyiŋ akɛ eeesaa Yehowa Sɔlemɔtsu lɛ heihei ni efitefitee lɛ.

⁵ Enɛ hã Yoash tsɛ osɔfoi lɛ kɛ Levibii lɛ, ni etsu amɛ, ni ekɛɛ akɛ, “Nyɛyaa Yuda maji fɛɛ amli nyɛyatsua maŋbii fɛɛ too bɔ ni abaana shika koni akɛ eko asaa nyɛNyɔŋmɔ lɛ Sɔlemɔtsu lɛ daa afi. Nyɛtsua sane nɛɛ he nii kɛ hiɛdɔɔ.” Shi Levibii lɛ ahiɛ eyadɔɔɔ yɛ sane lɛ he.

⁶ No hewɔ lɛ, Maŋtsɛ Yoash tsɛ Osɔfonukpa Yehoiada, ni ekɛɛ lɛ akɛ, “Mɛni hewɔ okwɛɛɛ koni Levibii lɛ ayatsu Yudabii lɛ kɛ Yerusalɛmbii atoo lɛ ni Mose, Yehowa tsulɔ lɛ, fo ehã Israel fɛɛ koni akɛtsu Yehowa Kpee Buu lɛ he nii lɛ?”

⁷ (Atalia, nakai yoo fɔŋ lɛ, kɛ esɛɛbii lɛ ehã Nyɔŋmɔ We lɛ egbala, asaŋ eloo Yehowa Sɔlemɔtsu lɛ mli nibii krɔŋkrɔŋi lɛ, ni akɛtee akɛyaja jemawɔji.)

⁸ No hewɔ lɛ, Maŋtsɛ Yoash fã, ni Levibii lɛ kpɛ adeka ko ni amɛkɛma Yehowa We lɛ agbo lɛ naa.

⁹ Kɛkɛ ni atswa he ŋoŋo yɛ Yuda kɛ Yerusalɛm fɛɛ akɛ too lɛ ni Mose, Nyɔŋmɔ tsulɔ lɛ, fo ehã Israelbii be mli ni amɛnyiɛ shiaŋa lɛ nɔ lɛ mɔ fɛɛ mɔ aba ni ebawo enɔ lɛ ehã Yehowa.

¹⁰ Maŋ onukpai lɛ kɛ maŋ muu lɛ fɛɛ na sane lɛ he tsuijurɔ, ni amɛkɛ amɛtoo lɛ ba amɛbawo adeka lɛ mli. Abaa aahu kɛyashiɔ adeka lɛ yiɔ tɔ.

¹¹ Kɛji fee nakai lɛ Levibii lɛ woɔ adeka lɛ koni akɛtsɔ̃ɔ maŋtsɛ lɛ. Kɛji akɛ adeka lɛ ba lɛ, maŋtsɛ lɛ woloŋmalɔ lɛ kɛ osɔfonukpa lɛ hu naadamɔlɔ baa ni amɛbatsɔ̃ɔ shika lɛ yɛ adeka lɛ mli, kɛkɛ lɛ Levibii lɛ ewo adeka lɛ amɛkɛyama emaahe lɛ ekoŋŋ. Nɛkɛ ji bɔ ni afee daa gbi, ni akɛbua shika babaoo naa.

¹² Maŋtsɛ lɛ kɛ Osɔfonukpa Yehoiada kɛ shika lɛ hãa mɛi ni kwɛɔ nii ni atsuɔ yɛ Yehowa Sɔlemɔtsu lɛ he lɛ nɔ lɛ, ni amɛ hu amɛkɛbɔɔ tɛ gbogbotswalɔi lɛ kɛ kapintafoi lɛ kɛ dade kɛ akɔɔbleŋaalɔi lɛ apaa koni amɛsaa Yehowa Sɔlemɔtsu lɛ.

¹³ Nitsulɔi lɛ tsu nii lɛ, ni nitsumɔ lɛ tee nɔ jogbaŋŋ; ni amɛsaa Nyɔŋmɔ We lɛ, ni ena hewalɛ, ni eba eblema.

¹⁴ Be ni agbe Sɔlemɔtsu lɛ saamɔ naa lɛ, shika ni shwɛ lɛ akɛbahã maŋtsɛ lɛ kɛ Osɔfonukpa Yehoiada. Akɛ shika nɛɛ fee tsɛnsii kɛ okpolui fɛɛ ni yɔɔ Yehowa We lɛ mli lɛ nɔ ni akɛjaa kɛ nɔ ni akɛshãa afɔlei, kɛ nɔ ni akɛtoɔ tsofakɛŋma kɛ shika kɛ jwiɛtɛi tsɛnsii srɔtoi lɛ fɛɛ. Osɔfo Yehoiada wala be mli fɛɛ lɛ atee nɔ ni ashã afɔle be fɛɛ be yɛ Yehowa We lɛ mli.

Ashi Yehoiada gbɛjianɔtoi lɛ asɛɛ

¹⁵ Osɔfo Yehoiada gbɔ kotokoto; ni be ni ena afii oha kɛ nyɔŋmai etɛ̃ lɛ egbo.

¹⁶ Afu lɛ yɛ maŋtsɛmɛi afũuhe lɛ yɛ David maŋ lɛ mli yɛ nibii kpakpai ni etsu ehã Israel kɛ Nyɔŋmɔ kɛ eWe lɛ hu he nitsumɔ lɛ hewɔ.

¹⁷ Yehoiada gbele sɛɛ lɛ Yuda lumɛi lɛ bɔi amɛhe kɛ maŋtsɛ lɛ fufuamɔ. Maŋtsɛ lɛ bɔi amɛnaa toiboo.

¹⁸ Kɛkɛ ni maŋbii lɛ kpa jamɔ yɛ Yehowa, amɛtsɛmɛi aNyɔŋmɔ lɛ, Sɔlemɔtsu lɛ mli, ni amɛyaja Asherim jemawɔŋ lɛ kɛ amãgãi. Tɔ̃mɔ nɛɛ hã Yehowa mli fu Yuda kɛ Yerusalɛm.

¹⁹ Kɛ̃ lɛ Yehowa tsu gbalɔi kɛba ni amɛbabɔ amɛ kɔkɔ; asaŋ koni amɛkpale Yuda kɛ Yerusalɛmbii koni amɛhi shi bɔ ni Yehowa taoɔ; shi maŋbii lɛ booo toi.

²⁰ Kɛkɛ ni Nyɔŋmɔ Mumɔ lɛ ba Osɔfo Yehoiada bi Zakaria nɔ, ni eho edamɔ he ko grɔŋŋ yɛ maŋ lɛ hiɛ ni ekɛɛ amɛ akɛ, “Naa nɔ ni Nyɔŋmɔ, Tsɛ lɛ, kɛɛ, ‘Te tɛŋŋ ni nyɛyeee mikitãi lɛ anɔ ni nyɛbaaloo haomɔ nɛɛ? Akɛni nyɛkwa Yehowa lɛ, lɛ hu ekwa nyɛ.’ ”

²¹ Maŋbii lɛ tee Zakaria yinɔ apam moŋ, ni yɛ maŋtsɛ lɛ fãmɔ naa lɛ amɛtswia lɛ tɛi yɛ Yehowa We lɛ kpo lɛ nɔ.

²² Maŋtsɛ Yoash kaiii kwraa anɔkwayeli ni Zakaria tsɛ Yehoiada kɛsɔmɔ lɛ lɛ, ni egbe Zakaria yakatswaa. Be ni Zakaria gboɔ lɛ, ekɛɛ akɛ, “Yehowa aaabi migbele nɛɛ shi, ni eeetɔ he owole.”

Yoash maŋtsɛyeli naagbee

²³ Afi nɔ ni sane nɛɛ ba lɛ gbele mli lɛ, Siriabii lɛ fã ta kɛbatua Yoash kɛ Yuda. Be ni amɛbashɛ Yerusalɛm lɛ amɛkpãtã maŋ onukpai lɛ fɛɛ ahiɛ, ni amɛkɛ nii ni amɛha lɛ fɛɛ tee yahã Damasko maŋtsɛ.

²⁴ Tabilɔi ni Siriabii lɛ kɛba ta lɛ ayikulɛ fioo, kɛ̃lɛ Yehowa hã amɛye Yuda tabilɔi babaoo lɛ anɔ kunim, ejaakɛ Yudabii lɛ ekwa Yehowa, amɛtsɛmɛi aNyɔŋmɔ lɛ. Enɛ nɔ tsɔ̃ ni agbala Maŋtsɛ Yoash toi.

²⁵ Be ni Siriabii atabilɔi lɛ shiɔ ni amɛya lɛ, amɛshi Yoash ni epila. Kɛkɛ ni Yoash tsuji lɛ ekomɛi tee Yoash yinɔ apam yɛ Osɔfo Yehoiada bi Zakaria gbele lɛ hewɔ, ni amɛtee amɛyagbe lɛ amɛwo esaa mli. Afu lɛ yɛ David Maŋ lɛ mli, shi moŋ afuuu lɛ yɛ maŋtsɛmɛi afũuhe lɛ.

²⁶ Mɛi ni tee Yoash yinɔ apam lɛ ji Zabad, Amonyoo Shimeat bi lɛ, kɛ Yehozabad, Moabyoo Shimrit bi lɛ.

²⁷ Saji ni kɔɔ Yoash musuŋ bihii lɛ ahe, kɛ gbalɛi srɔtoi ni agba ashi Yoash lɛ, kɛ Nyɔŋmɔ We lɛ saamɔ mli saji lɛ aŋmala fɛɛ yɛ Maŋtsɛmɛi ahe Saji Awolo lɛ mli. Yoash bi Amazia baye maŋtsɛ yɛ esɛɛ.