2 Kronika 23 - ŊMALƐ KRƆŊKRƆŊ LƐ

Ate shi awo Maŋnyɛ Atalia

¹ Shi afi ni ji kpawo lɛ nɔ lɛ, Osɔfo Yehoiada kanya ehe. Enine shɛ asraafoi oha ku asafoiatsɛmɛi enumɔ komɛi anɔ, ni ekɛ amɛ kpãŋ. Asafoiatsɛmɛi nɛɛ ji Yeroham bi Azaria, kɛ Yohohana bi Ishmael, kɛ Obed bi Azaria, kɛ Adaia bi Maaseia, kɛ Zikri bi Elishafat.

² Asafoiatsɛmɛi nɛɛ teetee Yuda shikpɔŋ lɛ nɔ maji wuji fɛɛ amli, ni amɛyatsɛ Levibii lɛ kɛ Israel akutsei lɛ amli shĩaiaŋ onukpai lɛ hu, ni amɛ fɛɛ amɛnaa bakpe shi yɛ Yerusalɛm.

³ Amɛ fɛɛ amɛnaa yabua yɛ Nyɔŋmɔ We lɛ, kɛkɛ ni asafo lɛ kɛ maŋtsɛ binuu Yoash kpãŋ. Osɔfo Yehoiada kɛɛ asafo lɛ akɛ, “Naa, maŋtsɛ ni etsɔ̃ esɛɛ lɛ binuu lɛ nɛ. Lɛ esa akɛ eyeɔ maŋtsɛ lɛ agbɛnɛ yɛ shi ni Yehowa ewo yɛ David shwiei ahe lɛ hewɔ.

⁴ Naa bɔ ni wɔbaafee. Nyɛteŋ osɔfoi lɛ kɛ Levibii lɛ hu ni baaba nitsumɔ yɛ hejɔɔmɔ gbi lɛ nɔ lɛ baaja amɛmli kui etɛ̃. Kui etɛ̃ nɛɛ ateŋ ekome baabu Sɔlemɔtsu lɛ agboi lɛ anaa;

⁵ ku kome baahi maŋtsɛ we lɛ, ni ku kome hu baabu Shishitoo Agbo lɛ naa. Maŋbii lɛ fɛɛ baahi kpoi lɛ anɔ yɛ Yehowa we lɛ mli.

⁶ Mɔ ko mɔ ko akabote Yehowa Sɔlemɔtsu lɛ mli ja osɔfoi lɛ kɛ Levibii ni eshɛ be ni amɛsɔmɔɔ yɛ jɛi lɛ. Amɛ lɛ amɛaanyɛ amɛbote Sɔlemɔtsu lɛ mli ejaakɛ amɛtsuu amɛhe. Maŋbii fɛɛ aye Yehowa gbɛjianɔtoo nɛɛ nɔ.

⁷ Levibii lɛ baabɔle maŋtsɛ lɛ he kɛkpe, ni amɛteŋ mɔ fɛɛ mɔ baahiɛ etawuunii. He fɛɛ he ni maŋtsɛ lɛ yaa lɛ, amɛhi ehe kɛbu ehe. Mɔ fɛɛ mɔ ni baabote Sɔlemɔ we lɛ mli lɛ agbe lɛ.”

⁸ Levibii lɛ kɛ Yuda hii lɛ fɛɛ fee bɔ ni Osɔfo Yehoiada wo amɛ kitã akɛ amɛfee lɛ pɛpɛɛpɛ. Asafoiatsɛmɛi lɛ ateŋ mɔ fɛɛ mɔ kɛ ewebii ni baa nitsumɔ yɛ hejɔɔmɔ gbi lɛ nɔ lɛ ba, ni amɛbafata kui ni kulɛ amɛmiikpa nitsumɔ yɛ hejɔɔmɔ gbi lɛ nɔ lɛ ahe; ejaakɛ Osɔfo Yehoiada kpaaa amɛ nitsumɔ koni amɛya shĩa.

⁹ Kɛkɛ ni Osɔfo Yehoiada jara akplɔi kɛ tsɛŋi wuji kɛ tsɛŋi bibii ni Maŋtsɛ David yɔɔ ni akɛto Nyɔŋmɔ We lɛ ekɛhã asraafoi oha kui asafoiatsɛmɛi lɛ.

¹⁰ No sɛɛ lɛ, eto tabilɔi lɛ edamɔ shi yɛ Sɔlemɔtsu lɛ kɛ afɔleshãa latɛ lɛ hiɛ kɛjɛ Sɔlemɔtsu lɛ ninejurɔ koŋ lɛ kɛho kɛyashi tsu lɛ abɛku koŋ lɛ, bɔ ni afee ni amɛfo sa kɛbu maŋtsɛ lɛ he. Amɛteŋ mɔ fɛɛ mɔ tawuunii hiɛ edɛ̃.

¹¹ Agbɛnɛ Osɔfo Yehoiada tee ni eyakpala maŋtsɛ binuu lɛ kɛje kpo, ni ekɛ maŋtsɛ akekre lɛ bafi eyitso, ni ekɛ odaseyeli wolo lɛ wo edɛŋ, ni amɛwo lɛ maŋtsɛ. Osɔfo Yehoiada kɛ ebihii lɛ fɔ Yoash mu amɛkɛwo lɛ maŋtsɛ. Kɛkɛ ni amɛ kɛ asafo lɛ bɔ oshe amɛkɛɛ akɛ, “Maŋtsɛ yi ana wala!”

¹² Atalia nu bolɔmɔ ni maŋbii ni yaa baa kɛ foi lɛ bolɔɔ lɛ. No hewɔ lɛ, etiu maŋbii lɛ kɛtee Yehowa Sɔlemɔ we lɛ he ni amɛwo shi yɛ lɛ.

¹³ Be ni Atalia shɛ jɛi ni ebaakwɛ lɛ, naa maŋtsɛ lɛ ni edamɔ maŋtsɛ shidaamɔhe lɛ yɛ Sɔlemɔtsu lɛ shinaa lɛ shi, ni asafoiatsɛmɛi lɛ kɛ tɛtɛrɛmantɛrɛkpãlɔi lɛ efo ehe sa kpula. Maŋ muu lɛ fɛɛ miibɔ oshe kɛ nyamɔ, ni aakpã tɛtɛrɛmantɛrɛ, ni Sɔlemɔ we lɛ mli lalatsɛmɛi lɛ miitswa saŋku, ni akɛmiila yijiemɔ lalai. Kɛkɛ ni Atalia kɛ dɔlɛ gbala ehe atadei lɛ, ni ebo ekɛɛ akɛ, “Maŋjwaa sane! Maŋjwaa sane!”

¹⁴ Kɛkɛ ni Osɔfo Yehoiada tsɛ tabilɔi lɛ ateŋ asafoiatsɛmɛi lɛ, ni efã amɛ akɛ amɛmɔ Maŋnyɛ Atalia kɛje kpo kɛtsɔ̃ tabilɔi lɛ ateŋ; shi moŋ mɔ fɛɛ mɔ ni aaaba akɛ enyiɛ Maŋnyɛ lɛ sɛɛ lɛ amɛgbe lɛ. Afee nakai ejaakɛ osɔfoi lɛ kɛɛ akɛ esaaa akɛ agbeɔ maŋnyɛ lɛ yɛ Yehowa we lɛ mli.

¹⁵ Enɛ hewɔ lɛ, asafo lɛ ŋmɛ gbɛ ni amɔ Maŋnyɛ Atalia kɛtsɔ amɛtɛŋ kɛho. Shi be ni akɛ lɛ shɛ Okpɔŋɔi Agbo lɛ naa, he ni atsɔ̃ɔ kɛboteɔ maŋtsɛ we lɛ mli lɛ, ni agbe lɛ yɛ jɛi.

Yehoiada tsake nibii

¹⁶ Nii nɛɛ sɛɛ lɛ Osɔfo Yehoiada kɛ Maŋtsɛ Yoash kɛ maŋ muu lɛ fɛɛ fee ekome ni amɛkpãŋ akɛ amɛbaahi shi akɛ Yehowa webii.

¹⁷ Kɛkɛ ni agbɛnɛ maŋbii lɛ yabote jemawɔji ajamɔhei lɛ, ni amɛyakumɔ jemawɔji lɛ amãgãi lɛ kɛ jemawɔji lɛ afɔleshãa latɛi lɛ kɛ jemawɔji lɛ ajamɔhei lɛ diɛŋtsɛ fɛɛ amɛshwie shi. Naagbee mli lɛ amɛgbe Matan ni ji jemawɔji lɛ awulɔmɔ lɛ amɛfata he.

¹⁸ Kɛkɛ ni Osɔfo Yehoiada tu Yehowa Sɔlemɔtsu lɛ mli nitsumɔi lɛ anɔkwɛmɔ hegbɛjianɔtoi lɛ ewo Levibii osɔfoi lɛ adɛŋ. Ni yɛ Levibii krokomɛi lɛ agbɛfaŋ lɛ, bɔ ni David jara amɛmli koni amɛsɔmɔ yɛ Yehowa Sɔlemɔtsu lɛ mli lɛ, asaŋ akɛ amɛ amɛshã Yehowa shãa afɔlei lɛ bɔ ni yɔɔ Mose Mla lɛ mli lɛ, Osɔfo Yehoiada saa ekɛhã amɛ bɔ pɛ ni David eja ehã amɛ eto lɛ. Nakai nɔŋŋ efee kui ni amɛgbɛnaa ji akɛ amɛla lɛ.

¹⁹ Asaŋ ekɛ bulɔi to Yehowa Sɔlemɔtsu lɛ agboi lɛ anaa bɔ ni afee ni mɔ ko ni ebule ehe yɛ gbɛ ko nɔ akabote Sɔlemɔtsu lɛ mli.

²⁰ Kɛkɛ ni agbɛnɛ osɔfo Yehoiada tsɛ tabilɔi lɛ asafoiatsɛmɛi lɛ kɛ maŋ lɛŋ hiɛnaanɔbii lɛ kɛ akutsei lɛ amraloi lɛ kɛ maŋbii lɛ fɛɛ kɛfata ehe, ni amɛkpala maŋtsɛ lɛ kɛjɛ Yehowa Sɔlemɔtsu lɛ mli, ni amɛ kɛ lɛ nyiɛ kɛtsɔ̃ maŋtsɛ we lɛ ŋwɛi agbo lɛ mli kɛbote maŋtsɛ we lɛ mli, ni amɛkɛ lɛ yata maŋtsɛ sɛi lɛ nɔ.

²¹ Shikpɔŋ lɛ nɔ bii lɛ fɛɛ nya, ni maŋ lɛ mli jɔ akɛ ni agbe Atalia lɛ.