2 Kronika 22 - ŊMALƐ KRƆŊKRƆŊ LƐ

Yuda Maŋtsɛ Ahazia

¹ Kɛkɛ ni Yerusalɛmbii wo Ahazia, ni ji Maŋtsɛ Yehoram binuu gbekɛ fe fɛɛ lɛ, maŋtsɛ yɛ esɛɛ, ejaakɛ nakai be mli lɛ Yehoram bihii onukpai lɛ fɛɛ egboi. Arabiabii komɛi ni fã ta kɛba kɛbaye ojo lɛ ji mɛi ni gbe Yehoram bihii onukpai nɛɛ lɛ. No hã Yuda Maŋtsɛ Yehoram bi Ahazia baye maŋtsɛ lɛ.

² Ahazia eye afii nyɔŋmai enyɔ kɛ enyɔ be ni awo lɛ maŋtsɛ lɛ; ni eye maŋtsɛ afi kome yɛ Yerusalɛm. Enyɛ ni fɔ lɛ gbɛi ji Atalia ni eji Israel Maŋtsɛ Ahab biyoo kɛ Maŋtsɛ Omri hu nabi yoo lɛ.

³ Ahazia hu bakɔ Ahab we lɛ jeŋba lɛ ejaakɛ enyɛ lɛ ji eŋaawolɔ, ni ŋai ni ewo lɛ lɛ hã efee efɔŋ.

⁴ Efee efɔŋ yɛ Yehowa hiɛ tamɔ Ahab fee lɛ, ejaakɛ etsɛ Yehoram gbele sɛɛ lɛ, Ahab we lɛ mli ajɛ ni awoɔ lɛ ŋaa ni naagbee mli aahu lɛ no kpãtã ehiɛ lɛ.

⁵ Amɛŋaawoo lɛ nɔ enyiɛ ni etee eyawa Israel Maŋtsɛ Yoram, Ahab bi lɛ, ta ni ekɛ Siria Maŋtsɛ Hazael yawu yɛ Ramot-Gilead lɛ. Siriabii lɛ pila Yoram yɛ ta lɛ mli.

⁶ No hewɔ lɛ, Yoram tee eyahi Yezreel koni etsa ehe, ni Yuda Maŋtsɛ Ahazia tee Yezreel koni eyasara Yoram yɛ ehela lɛ hewɔ.

⁷ Shi eji Nyɔŋmɔ yiŋtoo akɛ Ahazia shigbeemɔ atsɔ̃ nɛkɛ saramɔ ni etee eyasara Yoram nɛɛ nɔ. Ejaakɛ be ni eyashɛ jɛi sɛɛ lɛ, etee ni eyawa Yoram koni ekɛ Yehu, Nimshi bi lɛ, ni Yehowa ekɔ lɛ koni ekpãtã Ahab we lɛ hiɛ lɛ ayawu.

⁸ Be ni Yehu miifee nɔ ni Yehowa efã akɛ efee ekɛgbala Ahab we lɛ toi lɛ, ekɛ maŋ tsuji lɛ kɛ Ahazia nyɛmimɛihii abii lɛ ni fata Ahazia he kɛba lɛ kpe, ni egbe amɛ.

⁹ Etao Ahazia, ni ayamɔ lɛ ni eyatee yɛ Samaria. Akɛ lɛ bahã Yehu, ni agbe lɛ. Shi awo egbonyo lɛ ayafu yɛ enii Maŋtsɛ Yehoshafat hewɔ, ejaakɛ lɛ lɛ ebɔ mɔdɛŋ ni esɔmɔ Yehowa kɛ eyitsoŋ fɛɛ. Enɛ ha gbɔmɛi tã yɛ Ahab we lɛ mli bɔ ni mɔ ko kwraa bɛ jɛi dɔŋŋ ni ebaanyɛ maŋtsɛ eye.

Maŋnyɛ Atalia

¹⁰ Be ni Maŋtsɛ Ahazia nyɛ Atalia nu akɛ ebi Ahazia egbo lɛ, efã akɛ agbe maŋtsɛmɛi ashwiei hii ni yɔɔ Yuda fɛɛ.

¹¹ Shi Maŋtsɛ Yehoram biyoo ni gbɛi ji Yehosheba lɛ ju shi, ni emɔ Ahazia bi ni atsɛɔ lɛ Yoash lɛ yɛ maŋtsɛmɛi abihii ni abaagbe lɛ ateŋ, ni ekɛ lɛ kɛ ekwɛlɔ lɛ fɛɛ yato yɛ sɛɛtsu ko mli yɛ Sɔlemɔ we lɛ. Nɛkɛ ji bɔ ni Maŋtsɛ Yehoram biyoo ni ji Yehosheba, Osɔfo Yehoiada ŋa lɛ, fee ni ejie Yoash yɛ Atalia daaŋ, ni enaaa lɛ egbe ejaakɛ Ahazia nyɛmiyoo ji lɛ.

¹² Ekɛ amɛ tee Nyɔŋmɔ We lɛ mli kɛyashi afii ekpaa. Atalia ye maŋnyɛ yɛ Yuda shikpɔŋ lɛ nɔ nɛkɛ be nɛɛ mli.