2 Kronika 21 - ŊMALƐ KRƆŊKRƆŊ LƐ

¹ Yehoshafat tsɔ̃ esɛɛ, ni afu lɛ afata etsɛmɛi lɛ ahe yɛ David Maŋ lɛ mli. Kɛkɛ ni ebi Yehoram baye maŋtsɛ yɛ esɛɛ.

Yuda Maŋtsɛ Yehoram

² Yehoram yɛ nyɛmimɛihii ekpaa ni amɛ hu Israel maŋtsɛ Yehoshafat bii ji amɛ. Amɛ ji Azaria kɛ Yehiel kɛ Zakaria kɛ Azariahu kɛ Mikael kɛ Shefatia.

³ Amɛtsɛ lɛ ke amɛ nii babaoo. Ehã amɛ shika kɛ jwiɛtɛi kɛ shika kɛ nibii ni jara wa. Enɛɛmɛi asɛɛ lɛ ehã amɛ Yuda shikpɔŋ lɛ nɔ maji wuji ni atswa gbogbo awo amɛhe lɛ ekomɛi hu. Shi akɛni Yehoram ji kromɔbi hewɔ lɛ, lɛ lɛ amɛtsɛ lɛ kɛ emaŋtsɛ sɛi lɛ hã lɛ koni eye maŋtsɛ yɛ esɛɛ.

⁴ Be ni Yehoram ebata etsɛ maŋtsɛyeli sɛi lɛ nɔ, ni emaŋtsɛyeli lɛ ehe shi lɛ, egbe enyɛmimɛihii lɛ fɛɛ kɛ Israel maŋ onukpai komɛi hu.

⁵ Yehoram eye afii nyɔŋmai etɛ̃ kɛ enyɔ be ni ebata maŋtsɛ sɛi lɛ nɔ lɛ, ni eye maŋtsɛ afii kpaanyɔ yɛ Yerusalɛm.

⁶ Shihilɛ mli ni Israel maŋtsɛmɛi lɛ hi, tamɔ Ahab ba ejeŋ lɛ, nakai shihilɛ mli Yehoram bahi ejaakɛ ekɛ Ahab biyoo yɛ akɛ ŋa. Etɔ̃ yɛ Yehowa hiɛ,

⁷ shi fɛɛ sɛɛ lɛ Yehowa emiii akɛ ekpãtãa David shwiei ahiɛ yɛ kpãŋmɔ ni ekɛ David kpãŋ lɛ hewɔ, ejaakɛ ewo David shi akɛ maŋtsɛyeli lɛ shiŋ ewe lɛ kɛmiiya naanɔ.

⁸ Edombii lɛ tse Yuda hiɛ atua yɛ Yehoram yinɔ, ni amɛwo amɛ diɛŋtsɛ amɛmaŋtsɛ.

⁹ No hã Yehoram fã ta kɛ esafoiatsɛmɛi kɛ etayaa shwiilii fɛɛ kɛyatua Edom. Edombii lɛ bɔle Yuda tabilɔi lɛ kpula kɛkpe; shi Yehoram kɛ etabilɔi lɛ te shi nyɔɔŋ, ni amɛyatua Edombii ni ebɔle amɛ lɛ, ni amɛgbu gbɛ kɛtsɔ̃ amɛteŋ kɛje kpo.

¹⁰ No hewɔ lɛ, Edom bɛ Yuda shishi kɛbashi ŋmɛnɛ. Nakai be lɛ mli nɔŋŋ lɛ Libna hu tse Yehoram hiɛ atua, ni eje enɔyeli shishi, ejaakɛ Yehoram etɔ̃ Yehowa, etsɛmɛi aNyɔŋmɔ lɛ nɔ.

¹¹ Asaŋ efee jemawɔji ajamɔhei hu yɛ Yuda gɔji ashikpɔŋ lɛ nɔ, ni ehã Yerusalɛmbii kɛ Yuda shi Yehowa sɛɛ, ni amɛja jemawɔji, ni amɛkɛtɔ̃ Yehowa nɔ.

¹² Kɛkɛ ni Gbalɔ Elia ŋma Maŋtsɛ Yehoram wolo, ni ekɛɛ lɛ akɛ, “Naa nɔ ni Yehowa, ni ji otsɛ David Nyɔŋmɔ lɛ, kɛɔ: ‘Ohiko shi tamɔ otsɛ Maŋtsɛ Yehoshafat, loo onii Maŋtsɛ Asa, hi shi lɛ.

¹³ Moŋ okɔ Israel maŋtsɛmɛi lɛ ajeŋba lɛ, ni okɛhã Yuda kɛ Yerusalɛmbii lɛ miija jemawɔji tamɔ Ahab kɛ eshwiei fee ni Israel shi Yehowa sɛɛ kɛyaja jemawɔji lɛ. Asaŋ onyɛmimɛihii ni ji otsɛ bii lɛ hu ogbe amɛ; ni amɛhi fe bo.

¹⁴ Enɛ hewɔ lɛ, Yehowa baagbala omaŋbii lɛ kɛ oŋamɛi kɛ obii atoi waa, ni ebaakpãtã onii ni oyɔɔ hu hiɛ.

¹⁵ Bo diɛŋtsɛ lɛ musuŋ hela kpakpataa ko baamɔ bo, ni hela nɛɛ mli baawo wu daa gbi kɛyashi omlinii baatue.’ ”

¹⁶ Kɛkɛ ni Yehowa hã Filistibii lɛ kɛ Arabiabii ni yɔɔ Etiopiabii lɛ amasɛi lɛ ahe tsɛ̃ Yehoram,

¹⁷ ni amɛfã ta kɛbatua Yuda, ni amɛha nɔ fɛɛ nɔ ni amɛna yɛ Yuda maŋtsɛ we lɛ mli, ni amɛloo kɛtee. Asaŋ amɛŋɔ Yehoram ŋamɛi lɛ kɛ ebihii lɛ fɛɛ nom kɛtee ja enakutsoŋ binuu lɛ pɛ.

¹⁸ Shi enɛɛmɛi fɛɛ asɛɛ lɛ, Yehowa kɛ musuŋ hela ni ehiii tsamɔ piŋ Yehoram,

¹⁹ kɛyashi afii enyɔ sɛɛ be mli ni emusuŋnii lɛ tue, ni egbo kɛ hejaramɔ. Emaŋbii lɛ shɛreee la akɛwooo egbonyo lɛ hiɛ nyam tamɔ afee ahã etsɛmɛi maŋtsɛmɛi ni etsɔ̃ ehiɛ lɛ.

²⁰ Yehoram ye afii nyɔŋmai etɛ̃ kɛ enyɔ be ni ebɔi maŋtsɛyeli lɛ; ni eye maŋtsɛ afii kpaanyɔ yɛ Yerusalɛm, ni egbo; ni egbele lɛ edɔɔɔ mɔ ko mɔ ko kwraa. Afu lɛ yɛ David Maŋ lɛ mli, shi jeee yɛ maŋtsɛmɛi afũuhe lɛ.