2 Kronika 20 - ŊMALƐ KRƆŊKRƆŊ LƐ

Yuda kɛ Edom wu ta

¹ Saji nɛɛ asɛɛ lɛ Moabbii lɛ kɛ Amonbii lɛ na Meunbii lɛ ekomɛi fata amɛhe, kɛkɛ ni amɛfã ta kɛbatua Yuda.

² Be ni bɔfoi komɛi batswa Yehoshafat adafi amɛkɛɛ akɛ, “Naa, ta kpeteŋkple ko ejɛ Ŋoo Ŋshɔ lɛ sɛɛ yɛ Edom kɛba amɛbatua Yuda, ni amɛshɔ̃ Hazazon-Tamar ni ji En-Gedi momo” lɛ,

³ Yehoshafat she gbeyei. No hewɔ lɛ, eto eyiŋ akɛ eeesɔle kɛbi Yehowa dɛŋ yelikɛbuamɔ. Enɛ hã efã akɛ ahi ŋmaa yɛ Yuda shikpɔŋ lɛ nɔ fɛɛ.

⁴ Kɛkɛ ni Yudabii jɛjɛɛ Yuda maji wuji lɛ fɛɛ amli amɛbabua amɛhe naa yɛ Yerusalɛm koni atao Yehowa dɛŋ yelikɛbuamɔ.

⁵ Yuda maji lɛ anɔ bii lɛ kɛ Yerusalɛmbii lɛ hu yabua shi yɛ kpo hee lɛ nɔ yɛ Yehowa Sɔlemɔtsu lɛ hiɛ. Ni Yehoshafat ho edamɔ shi yɛ asafo lɛ hiɛ,

⁶ ni ekɛɛ akɛ, “Yehowa, wɔtsɛmɛi aNyɔŋmɔ, bo ji Nyɔŋmɔ ni yɔɔ ŋwɛi, asaŋ mɔ ni yeɔ je lɛ mli maji fɛɛ anɔ. Bo oyɔɔ hewalɛ kɛ nyɛmɔ, ni mɔ ko kwraa bɛ ni baanyɛ bo onaa aku.

⁷ WɔNyɔŋmɔ, oshwie shikpɔŋ nɛɛ nɔ bii lɛ yɛ omaŋ ni ji Israel hiɛ, ni okɛ shikpɔŋ lɛ hã oshieŋtsɛ Abraham shwiei lɛ akɛ amɛgboshinii kɛmiiya naanɔ.

⁸ Amɛhi shikpɔŋ nɛɛ nɔ bei abɔ; ni amɛma Sɔlemɔtsu yɛ nɔ kɛwo ohiɛ nyam, asaŋ kɛ hemɔkɛyeli akɛ

⁹ kɛji nɔ gbonyo ko, tamɔ ta loo gbele hela loo hɔmɔ, ba wɔnɔ lɛ, wɔbaaba wɔbadamɔ Sɔlemɔtsu nɛɛ ni ajaa bo yɛ mli lɛ hiɛ, ni wɔbaasɔle kɛbi bo odɛ̃ŋ wamɔ yɛ wɔnɔnaa lɛ mli, ni obaabo wɔ toi, ni obaahere wɔyiwala.

¹⁰ “Ŋmɛnɛ, naa Amonbii lɛ kɛ Moabbii lɛ, ni ji Seir Gɔŋ lɛ nɔ bii lɛ, ni amɛbatua wɔ. Be ni wɔtsɛmɛi lɛ jɛ Ijipt shikpɔŋ lɛ nɔ, ni amɛbaa lɛ, ohã amɛtsɔ̃ afã kɛlɔgɔ gbɔmɛi nɛɛ ahe kɛho, ni no hewɔ lɛ, wɔtsɛmɛi lɛ tuaaa amɛ ni amɛaakpãtã amɛhiɛ.

¹¹ Nɔ ni amɛkɛdaa wɔ shi ji ba ni amɛto kɛba kɛbashwie wɔ yɛ shikpɔŋ ni bo okɛhã wɔ akɛ wɔgbɛfaŋnɔ lɛ nɔ nɛɛ.

¹² WɔNyɔŋmɔ, tɔɔ wɔhe owele ohã wɔ ejaakɛ wɔhe waaa, ni ta kpeteŋkple ni baa wɔnɔ nɛɛ lɛ wɔnyɛŋ amɛhiɛ wɔdamɔ. Ataa, wɔleee bɔ ni wɔɔfee, bo kɛkɛ wɔkwɛɔ nɛɛ.”

¹³ Nɛkɛ be mli lɛ Yuda hii fɛɛ kɛ amɛŋamɛi kɛ amɛbii kɛ hɔi blublu ewo shi yɛ Yehowa Sɔlemɔtsu lɛ hiɛ.

¹⁴ Kɛkɛ ni Yehowa mumɔ lɛ ba Levinyo ko ni eji Asaf shwie, ni egbɛi ji Yahaziel lɛ nɔ yɛ asafo lɛ teŋ. Gbɔmɔ nɛɛ tsɛ ji Zakaria ni ji Matania bi Yeriel bi Benaia bi lɛ.

¹⁵ Kɛkɛ ni Yahaziel kɛɛ asafo lɛ akɛ, “Maŋtsɛ kɛ Yudabii kɛ Yerusalɛm maŋbii fɛɛ ni naa ekpe shi, nɔ ni Yehowa kɛɔ nyɛ nɛ, ‘Nyɛkashea gbeyei, asaŋ nyɛtsui akafãa hu yɛ ta babaoo nɛɛ hewɔ, ejaakɛ ta ni abaawu lɛ ebɛ nyɛdɛŋ, Nyɔŋmɔ dɛŋ eyɔɔ.’

¹⁶ Wɔ́ ni ji wɔ́ lɛ, nyɛfãa ta koni nyɛ kɛ amɛ ayakpea. Amɛbaatsɔ̃ Ziz ŋmeŋme lɛ nɔ kɛba. No hewɔ lɛ, nyɛyaninaa amɛ yɛ jɔɔ lɛ naagbeehe lɛ ni yɔɔ Yeruel shiaŋa lɛ bokãgbɛ lɛ mli.

¹⁷ Ta nɛɛ lɛ nyɛtswaŋ eko. Nyɛ lɛ nyɛgbaa nyɛta lɛ kɛkɛ koni nyɛdamɔa shi nyɛmɛ koni nyɛkwɛ kunim ni Yehowa baaye ahã nyɛ Yuda kɛ Yerusalɛmbii. Nyɛkashea gbeyei, asaŋ nyɛtsui akafãa hu. Wɔ lɛ, nyɛfãa ta koni nyɛ kɛ amɛ ayakpea ejaakɛ Yehowa kɛ nyɛ yɛ.”

¹⁸ Kɛkɛ ni Maŋtsɛ Yehoshafat ma eyi shi ni ekɛ ehiɛ bu shi, ni Yudabii lɛ kɛ Yerusalɛm maŋ lɛ mli bii lɛ fɛɛ hu bumɔ shi, ni amɛja Yehowa.

¹⁹ Ni Levibii ni jɛ Kohat shwiei lɛ kɛ Kora shwiei lɛ hu ateŋ lɛ ho amɛdamɔ shi, ni amɛla kɛ gbee ni wa kɛkafo Yehowa, Israel Nyɔŋmɔ lɛ.

²⁰ Yuda hii lɛ kɛ Yerusalɛm hii lɛ fã enɔ jetsɛremɔ leebi maŋkpa kɛtee Tekoa shiaŋa lɛ nɔ. Shi dani amɛfã lɛ Yehoshafat ho edamɔ shi ni ekɛ ta lɛ wie. Ekɛɛ amɛ akɛ, “Agoo! Yuda hii kɛ Yerusalɛm hii, nyɛhea Yehowa, nyɛNyɔŋmɔ lɛ, nyɛyea, ni nyɛbaanyɛ shi nyɛfi; ni nyɛhea gbalɔi lɛ hu nyɛyea, ni nyɛbaaye omanye.”

²¹ Be ni Yehoshafat kɛ maŋ lɛ eto ajina sɛɛ lɛ, ehala lalatsɛmɛi komɛi akɛ amɛwula kɛ atadei ni amɛwoɔ yɛ gbii krɔŋkrɔŋi anɔ lɛ koni amɛla kɛjie Yehowa yi kɛnyiɛ tabilɔi lɛ ahiɛ amɛkɛɛ akɛ, “Ajie Yehowa yi, ejaakɛ esuɔmɔ sɛɛ efooo kɛyaa naanɔ!”

²² Be ni lalatsɛmɛi lɛ wo lamɔ kɛ yijiemɔ lɛ nɔ lɛ, Yehowa hã kawolɔi ni aleee he ni amɛjɛ batua mɛi ni eba amɛbaatua Yuda lɛ, ni akpãtã amɛhiɛ. Gbɔmɛi nɛɛ ji Amonbii lɛ kɛ Moabbii lɛ kɛ Seir Gɔŋ lɛ nɔ bii lɛ.

²³ Ni amɛkpãtã amɛhiɛ butuu. Kɛkɛ ni no sɛɛ lɛ, Amonbii lɛ kɛ Moabbii lɛ sɔŋŋ hu gba wo amɛhe, ni amɛ kɛ amɛhe wu kɛkpãtã amɛ sɔŋŋ amɛhiɛ butuu.

²⁴ Be ni Yudabii lɛ yashɛ mɔɔ ko he yɛ shiaŋa lɛ nɔ, ni amɛkwɛ he ni henyɛlɔi lɛ baa yɛ lɛ gbɛ lɛ, amɛna akɛ henyɛlɔi lɛ etsɔmɔ gbohii jwere shi ni hiɛkãalɔ kome nɛkɛ ejeee amɛmli.

²⁵ Ni fee nakai lɛ, Yehoshafat kɛ etabilɔi lɛ tee ni amɛyaha henyɛlɔi lɛ ahenii. Amɛna tsinai babaoo kɛ atadei kɛ jwinei ni jara wa. Amɛye gbii etɛ̃ ni amɛmiikpɔlɔ henyɛlɔi lɛ ahe nibii; shi nibii nɛɛ fa bɔ sɔŋŋ ni Yudabii lɛ nyɛɛɛ atere.

²⁶ Gbi ni ji ejwɛ lɛ nɔ lɛ Yudabii lɛ babua amɛhe naa yɛ Yijiemɔ Jɔɔ lɛ mli, ni amɛ jie Yehowa yi yɛ jɛi. Bɔ ni fee ni atsɛɔ jɔɔ nɛɛ akɛ Yijiemɔ Jɔɔ lɛ nɛ.

²⁷ Yehoshafat nyiɛ Yuda kɛ Yerusalɛm tabilɔi lɛ ahiɛ kɛku sɛɛ kɛba Yerusalɛm kɛ nyamɔ ejaakɛ Yehowa ehã amɛnya yɛ nɔ ni ba amɛhenyɛlɔi lɛ anɔ lɛ hewɔ.

²⁸ Be ni amɛshɛ Yerusalɛm lɛ, amɛtee Yehowa Sɔlemɔ we lɛ kɛ bɛji kɛ saŋkui kɛ tɛtɛrɛmantɛrɛi.

²⁹ Kɛkɛ ni Nyɔŋmɔ he ŋmiŋmi mɔmɔ shikpɔji anɔ majimaji lɛ fɛɛ be ni amɛnu bɔ ni Yehowa efee Israel henyɛlɔi lɛ yɛ ta mli yɛ Israelbii ahewɔ lɛ.

³⁰ Enɛ hewɔ lɛ, Yehoshafat ye emaŋtsɛ lɛ yɛ hejɔlɛ mli ejaakɛ eNyɔŋmɔ lɛ hã heihei ni bɔle lɛ fɛɛ wooo lɛ naagba ko.

Yehoshafat he sane lɛ naamuu

³¹ Yehoshafat bɔi Yuda maŋtsɛyeli be ni eye afii nyɔŋmai etɛ̃ kɛ enumɔ, ni eye maŋtsɛ afi nyɔŋmai enyɔ kɛ enumɔ yɛ Yerusalɛm. Enyɛ ni fɔ lɛ gbɛi ji Azub, ni enyɛ tsɛ gbɛi ji Shilhi.

³² Ehi shi tamɔ etsɛ Asa hi shi lɛ pɛpɛɛpɛ. Eyagbaaa afã shi eba ejeŋ bɔ pɛ ni Yehowa taoɔ,

³³ shi moŋ eguuu jemawɔji lɛ ajamɔhei lɛ, ejaakɛ maŋbii lɛ bɔiko amɛtsɛmɛi aNyɔŋmɔ lɛ jamɔ kɛ amɛyitsoŋ fɛɛ.

³⁴ Yehoshafat he saji ni eshwɛ lɛ, kɛjɛ shishijee aahu kɛyagbe naa lɛ, aŋmala yɛ Hanani bi Yehu he saji ni yɔɔ Israel Maŋtsɛmɛi ahe Saji Awolo lɛ mli.

³⁵ Yɛ mli aahu lɛ Yehoshafat, Yuda maŋtsɛ lɛ, tee ni ekɛ Ahazia, Israel maŋtsɛ, ni feɔ nibii gbohii lɛ yafee ekome,

³⁶ koni amɛkpɛ lɛji ni akɛfã gbɛ kɛya Tarshish jarayeli. Akpɛ lɛji lɛ yɛ Ezion-Geber.

³⁷ Shi Eliezer, Dodawahu bi lɛ, jɛ Maresha maŋ lɛ mli ni ebagba eshi Yehoshafat ekɛɛ akɛ, “Akɛ ni okɛ Ahazia eyafee ekome hewɔ lɛ, Yehowa baakpãtã nii ni otsu lɛ hiɛ.” Lɛji lɛ jwara ni no hewɔ lɛ, eyahiii amɛ Tarshish lɛ yaa.