2 Kronika 19 - ŊMALƐ KRƆŊKRƆŊ LƐ

Gbalɔ ko kã Yehoshafat hiɛ

¹ Yehoshafat ni ji Yuda Maŋtsɛ lɛ ku esɛɛ shweshweeshwe kɛba ewe lɛ yɛ Yerusalɛm.

² Be ni Yehoshafat baa lɛ gbalɔ ko ni atsɛɔ lɛ Yehu, Hanani bi lɛ, tee ni ekɛ maŋtsɛ lɛ yakpe, ni ekɛɛ lɛ akɛ, “Aso eja gbɛ akɛ owa yitsoŋwalɔ, ni osumɔ mɛi ni nyɛɔ Yehowa lo? Nɔ ni ofee nɛɛ lɛ ehã Yehowa mli efu bo.

³ Shi ana nibii kpakpai komɛi kɛ̃ yɛ ohe. Eko ji jemawɔŋ Ashera lɛ amãgãi ni okumɔ yɛ shikpɔŋ lɛ nɔ fɛɛ lɛ. Eko hu ji akɛ oto oyiŋ akɛ okɛ otsui fɛɛ baasɔ̃mɔ Nyɔŋmɔ lɛ.”

Yehoshafat tsake nibii ahiɛ

⁴ Yerusalɛm kwraa ji Maŋtsɛ Yehoshafat shihilɛhe. Shi etoɔ be ni efãa gbɛ kɛyanyiɛɔ emaŋbii lɛ anɔ kɛjɛɔ Beersheba aahu kɛyashiɔ Efraim gɔji lɛ anɔ bɔ ni afee ni ekpale amɛ koni amɛbaja Yehowa, amɛtsɛmɛi aNyɔŋmɔ lɛ.

⁵ Eto kojolɔi ehã Yuda maji wuji ni atswa gbogbo awo amɛhe lɛ fɛɛ ateŋ eko fɛɛ eko,

⁶ ni ekɛɛ kojolɔi nɛɛ akɛ, “Nyɛkwɛa jogbaŋŋ kɛji nyɛbuaa sane ko he, ejaakɛ jeee gbɔmɛi adɛŋ hewalɛ ahã nyɛ lɛ, shi Yehowa dɛŋ hewalɛ ni; ni eyɛ nyɛmasɛi be mli ni nyɛmiibua sane ko he.

⁷ No hewɔ lɛ, nyɛhãa Yehowa hegbeyeishemɔ ahia nyɛmli; nyɛkwɛa nyɛnifeemɔnii jogbaŋŋ ejaakɛ Yehowa, wɔNyɔŋmɔ lɛ, miihi kutumpɔoyeli kɛ hiɛiaŋkwɛmɔ kɛ nyɔɔŋnihemɔ.”

⁸ Yɛ Yerusalɛm diɛŋtsɛ lɛ, Yehoshafat hala Levibii komɛi kɛ osɔfoi hu komɛi kɛ agbɛnɛ shĩai amli weku nukpai lɛ hu ateiaŋ mɛi komɛi koni amɛkwɛ Yehowa Mla lɛ nɔtɔmɔ saji kɛ maŋbii ateŋ bei hu.

⁹ Maŋtsɛ Yehoshafat wo kojolɔi nɛɛ kitã ekɛɛ akɛ, “Nyɛtsua nyɛnii kɛ Yehowa he gbeyeishemɔ kɛ anɔkwayeli shishiishi kɛ nyɛtsui fɛɛ.

¹⁰ Ni be fɛɛ be ni nyɛnyɛmimɛi ni yɔɔ maji krokomɛi lɛ amli kɛ sane ko aaabahã nyɛ yeli lɛ, gbɔmɔgbee ni jio, mla loo kitã loo akpɔ nɔ ni atɔ̃ jio, nyɛtsɔa amɛ mla naa ni abaaye sane lɛ yɛ, bɔ ni afee ni nyɛkaye sɔ̃ yɛ Yehowa hiɛ koni Yehowa mli miifu, ni egbala nyɛ kɛ nyɛnyɛmimɛi lɛ fɛɛ toi.

¹¹ Yɛ saji fɛɛ ni kɔɔ Yehowa he gbɛfaŋ lɛ, bɔ ni Amaria, osɔfonukpa lɛ, baabua he lɛ no ji naagbee. Ni saji ni kɔɔ maŋtsɛ lɛ he gbɛfaŋ lɛ, bɔni Ishmael bi Zebadia ni ji Yuda amralo lɛ baabua he lɛ, no ji naagbee. Levibii lɛ baakwɛ akɛ aaye kojomɔhei lɛ amli buamɔi fɛɛ anɔ. Nyɛfea ekãa kɛtsua nyɛnii; ni Yehowa aye mɔ ni sane yɔɔ mli lɛ sane ehã lɛ!”