2 Kronika 18 - ŊMALƐ KRƆŊKRƆŊ LƐ

Gbalɔ Mikaia bɔ Maŋtsɛ Ahab kɔkɔ

¹ Maŋtsɛ Yehoshafat na nii jogbaŋŋ diɛŋtsɛ, ni egbɛi hehe, ni ewekunyo kɛ Maŋtsɛ Ahab hu wekunyo bote gbãlãshihilɛ mli.

² Afii komɛi asɛɛ lɛ Yehoshafat yiŋ etee Samaria maŋ lɛ mli ni eyasara Ahab. Ahab gbe toi kɛ tsinai babaoo ekɛfee Yehoshafat kɛ esɛɛbii ni ekɛnyiɛ lɛ gbɔ. Ahab bɔ mɔdɛŋ akɛ egbe Yehoshafat yitso koni eyawa lɛ ni efã ta kɛyatua Ramot-Gilead.

³ Ahab bi Yehoshafat akɛ, “Bɛ oooyawa mi koni mayatua Ramot-Gilead?” Yehoshafat to he akɛ, “Mifee kralo tamɔ ofee kralo lɛ, ni nakai nɔŋŋ ji mimaŋ lɛ; wɔ kɛ bo aaatee ta lɛ.”

⁴ Shi Yehoshafat kɛɛ Ahab akɛ, “Shi bi Yehowa daaŋ gbee dã.”

⁵ No hewɔ lɛ, Ahab bua gbalɔi lɛ anaa kɛkpe. Amɛyibɔ aaafee ohai ejwɛ, ni ebi amɛ akɛ, “Miya miyatua Ramot-Gilead, aloo mikaya?” Gbalɔi lɛ to he akɛ, “Yaa ni oyatua lɛ; Nyɔŋmɔ baahã oye kunim.”

⁶ Kɛkɛ ni Yehoshafat bi akɛ, “Yehowa gbalɔ ko bɛ biɛ dɔŋŋ ni wɔɔbi Yehowa daaŋ gbee kɛtsɔ̃ enɔ lo?”

⁷ Ahab here nɔ akɛ, “Mɔ kome ko yɛ ni kulɛ wɔɔnyɛ wɔbi lɛ Yehowa daaŋ gbee. Lɛ ji Imla bi Mikaia lɛ; shi mitaooo esane ejaakɛ egbako gbalɛ jurɔ yɛ mihe dã, fe be fɛɛ be lɛ efɔŋ egbaa yɛ mihe.” Shi Yehoshafat kɛɛ Ahab akɛ, “Nii akakɛɛ nakai.”

⁸ Kɛkɛ ni Maŋtsɛ Ahab tsɛ tsulɔ ko, ni ekɛɛ lɛ akɛ, “Yaa ni oyatsɛ Imla bi Mikaia obaha mi mramra.”

⁹ Israel Maŋtsɛ lɛ kɛ Yuda Maŋtsɛ Yehoshafat ewula jogbaŋŋ akɛ maŋtsɛmɛi kɛtara maŋtsɛmɛi asɛii anɔ yɛ ŋmãagbeemɔhe ni yɔɔ Samaria maŋ agbo lɛ naa nɔŋŋ lɛ, ni gbalɔi lɛ miigbagbaa yɛ amɛhiɛ.

¹⁰ Gbalɔi lɛ ateŋ mɔ kome ni egbɛi ji Zedekia, ni ji Kenaana bi lɛ, kɛ dade fee aklonto. Kɛkɛ ni ekɛɛ Ahab akɛ, “Nɔ ni Yehowa kɛɔ nɛ, ‘Enɛɛmɛi akɛbaashimɔ Siriabii lɛ kɛaayashi oooye amɛnɔ kunim.’ ”

¹¹ Gbalɔi ni eshwɛ lɛ fɛɛ gba nakai nɔŋŋ amɛkɛɛ akɛ, “Yaatua Ramot-Gilead, ni obaaye kunim. Yehowa baahã maŋtsɛ aye kunim.”

¹² Tsulɔ ni tee eyatsɛ Mikaia lɛ kɛɛ lɛ akɛ, “Naa, gbalɔi lɛ fɛɛ anaa efee ekome kɛgba gbalɛ ni ŋɔɔ yɛ maŋtsɛ toiŋ. No hewɔ lɛ, bo hu yaawie wiemɔ ni baaŋɔɔ maŋtsɛ naa nakai nɔŋŋ.”

¹³ Mikaia kɛɛ tsulɔ lɛ akɛ, “Gbii abɔ ni Yehowa yɔɔ lɛ, nɔ ni miNyɔŋmɔ lɛ baakɛɛ mi lɛ no mibawie.”

¹⁴ Be ni Mikaia bashɛ shi lɛ, Maŋtsɛ Ahab bi lɛ akɛ, “Mikaia, miya Ramot-Gilead miyawu ta aloo mikaya?” Mikaia to he akɛ, “Nyɛyaa! Bɛ nyɛbaaye omanye! Bɛ Yehowa baahã nyɛye omanye?”

¹⁵ Shi Ahab kɛɛ Mikaia akɛ, “Shii enyiɛ mawo bo shi akɛ kɛji oogba Yehowa daaŋ gbee ohã mi lɛ, okakɛɛ mi nɔ ko fe anɔkwale lɛ kɛkɛ?”

¹⁶ Kɛkɛ ni Mikaia kɛɛ akɛ, “Mina Israel tabilɔi lɛ ni amɛgbɛ amɛshwã yɛ gɔji lɛ anɔ tamɔ toi ni bɛ kwɛlɔ.” Ni Yehowa kɛɛ akɛ, “Hii nɛɛ bɛ hiɛnyiɛlɔ; amɛteŋ mɔ fɛɛ mɔ aya ewe yɛ hejɔlɛ mli mɔ.”

¹⁷ Maŋtsɛ Ahab kɛɛ Maŋtsɛ Yehoshafat akɛ, “Ani mikɛɛɛ bo akɛ egbaŋ gbalɛ jurɔ yɛ mihe kɔkɔɔkɔ akɛ ja gbalɛ fɔŋ?”

¹⁸ Shi Mikaia tee egbalɛ lɛ nɔ, ni ekɛɛ akɛ, “No hewɔ lɛ, nyɛboa nɔ ni Yehowa kɛɔ toi: Mina Yehowa ni eta emaŋtsɛ sɛi lɛ nɔ, ni ŋwɛi bɔfoi fɛɛ ewo shi yɛ eninejurɔ nɔ kɛ ebɛku fɛɛ.

¹⁹ Kɛkɛ ni Yehowa kɛɛ akɛ, ‘Namɔ po aaaya koni eyalaka Israel maŋtsɛ Ahab koni efã ta kɛya Ramot-Gilead koni eyanyɔ yɛ jɛi?’ Be ni bɔfoi lɛ ekomɛi miikɛɛ nɛkɛ lɛ, mɛi komɛi hu miikɛɛ nɛkɛ.

²⁰ Ahiɛ mli nakai kɛyashi mumɔ ko je kpo ni ebadamɔ Yehowa hiɛ ni ekɛɛ akɛ, ‘Maya mayalaka lɛ.’ Yehowa bi mumɔ nɛɛ akɛ, ‘Mɛɛ gbɛ nɔ obaatsɔ?’

²¹ Mumɔ lɛ jie naa akɛ, ‘Matsɔ̃ Ahab gbalɔi lɛ alilɛi nɔ mahã amɛgba gbalɛ ni amale ni.’ Kɛkɛ ni Yehowa kɛɛ mumɔ lɛ akɛ, ‘Yaa koni oyalaka lɛ; ni onine baashɛ enɔ hu.’

²² Sane lɛ nɛ. Yehowa ehã ogbalɔi nɛɛ fɛɛ emale ehã bo; shi Yehowa diɛŋtsɛ lɛ ewo shi akɛ okɛ efɔŋ baaya ayakpe.”

²³ Kɛkɛ ni Gbalɔ Zedekia, ni ji Kenaana bi lɛ, tsi eba, ni ebagba Mikaia toiŋ ma, ni ebi lɛ akɛ, “Mɛɛbe mumɔ lɛ je minɔ, ni ekɛ bo bawie lɛ?”

²⁴ Mikaia here lɛ nɔ, ni ekɛɛ akɛ, “Gbi nɔ ni obaaya oyatee ohe yɛ pia mli lɛ, gbi lɛ obaana ole.”

²⁵ Ni fee nakai lɛ, Israel Maŋtsɛ Ahab fã ni ekɛɛ akɛ, “Nyɛmɔa Mikaia koni nyɛkɛ lɛ ayahãa Amon, maŋ lɛ amralo lɛ, kɛ Yoash, maŋtsɛ binuu lɛ.

²⁶ Nyɛkɛa amɛ akɛ amɛwo lɛ tsuŋ, asaŋ amɛhã lɛ niyenii fioo kɛkɛ kɛ nu hu fioo kɛkɛ kɛyashi beyinɔ ni maya maba kɛ omanye.”

²⁷ Kɛkɛ ni Mikaia to he ehã Ahab ni ekɛɛ akɛ, “Kɛji otee oba kɛ omanye fĩĩ belɛ jeee Yehowa ni tsɔ̃ minɔ wie lɛ.” Asaŋ ekɛshi sɛɛ akɛ, “Bɛ nyɛmiibo toi, nyɛ maŋbii fɛɛ?”

Ahab gbele

²⁸ Kɛkɛ ni Israel Maŋtsɛ Ahab kɛ Yuda Maŋtsɛ Yehoshafat fã ta koni amɛyatua Ramot-Gilead.

²⁹ Ahab kɛɛ Yehoshafat akɛ, “Kɛji wɔmiiya ta lɛ tswaa lɛ mibatsake mihewulamɔ; shi bo lɛ owo otadei lɛ nɔŋŋ.” No hewɔ lɛ, Israel maŋtsɛ lɛ tee ta lɛ naa ni etsake ehe.

³⁰ Siria maŋtsɛ lɛ wo etayaa shwiilii lɛ anɔ asafoiatsɛmɛi lɛ kitã akɛ amɛkɛ mɔ ko mɔ ko akatswa yɛ ta lɛ mli akɛ ja Israel maŋtsɛ lɛ kɛkɛ.

³¹ No hewɔ lɛ, be ni tayaa shwiilii anɔ asafoiatsɛmɛi lɛ na Maŋtsɛ Yehoshafat lɛ, amɛsusu akɛ Israel maŋtsɛ lɛ ni; no hewɔ lɛ, amɛtsɛ̃ kɛba koni amɛ kɛ lɛ abanɔ. Shi Yehoshafat bo waa etsɛ, ni Yehowa ye bua lɛ. Nyɔŋmɔ hã henyɛlɔi lɛ dɔ amɛyi amɛŋmɛ he kroko,

³² ejaakɛ be ni tayaa shwiilii asafoiatsɛmɛi lɛ na akɛ jeee Israel maŋtsɛ lɛ ni lɛ, amɛkpale yɛ esɛɛ.

³³ Shi trukaa lɛ, gãi ko ni nuu ko tsɛ̃ lɛ yatsu Israel maŋtsɛ lɛ yɛ he ni eshishigbɛ dama lɛ kɛ ŋwɛigbɛ dama lɛ kpeɔ yɛ lɛ. Enɛ hã Ahab kɛɛ mɔ ni kudɔɔ eshwiili lɛ akɛ, “Dɔɔ ohe koni okɛ mi ashi ta lɛ naa, shi mipila!”

³⁴ Ta lɛ naa yawa pam nakai gbi lɛ, shi Maŋtsɛ Ahab hã ahiɛ emli kɛdamɔ eshwiili lɛ mli, ni ekɛ Siriabii lɛ kpe kɛyashi gbɛkɛnaashi. Aaafee hulushinyɔɔ mli lɛ ni Ahab nyɔ.