2 Kronika 17 - ŊMALƐ KRƆŊKRƆŊ LƐ

Awo Yehoshafat maŋtsɛ

¹ Yehoshafat baye etsɛ Asa sɛɛ akɛ Yuda maŋtsɛ, ni ewaje ehe eto Israel.

² Eto tabilɔi ta muu yɛ Yuda maji wuji ni atswa gbogboi awo amɛhe lɛ fɛɛ amli, ni eto tabilɔi kuikui hu yɛ Yuda koiasɛɛ heihei kɛ Efraim shikpɔŋ lɛ nɔ maji wuji ni etsɛ shɔ̃ lɛ hu amli.

³ Yehowa jɔɔ Yehoshafat ejaakɛ ehi shi tamɔ etsɛ hi shi be ni eje emaŋtsɛyeli lɛ shishi lɛ; ni eyajaaa jemawɔji.

⁴ Eja etsɛ Nyɔŋmɔ lɛ, ni eye ekitãi lɛ anɔ; ni eyabaaa ejeŋ tamɔ Israel maŋtsɛmɛi lɛ fee lɛ.

⁵ No hewɔ lɛ, Yehowa hã Yehoshafat maŋtsɛyeli lɛ hewalɛ he shi yɛ Yuda shikpɔŋ lɛ nɔ, ni abake lɛ nii babaoo, ni ena nii jogbaŋŋ, ni ehiɛ hu ba nyam.

⁶ Ni akɛni eye Nyɔŋmɔjamɔ he awuŋã hewɔ lɛ, egu hei ni ajaa jemawɔji yɛ fɛɛ lɛ, ni asaŋ efolɔ jemawɔŋ yoo Ashera lɛ tsei lɛ fɛɛ hu yɛ Yuda.

⁷ Be ni ena efi ni ji etɛ̃ akɛ maŋtsɛ lɛ Yehoshafat wo lumɛi komɛi agbɛ koni amɛya Yuda maji lɛ anɔ amɛyatsɔ̃ɔ mɛi anii. Lumɛi nɛɛ ji Ben-Hail kɛ Obadia kɛ Zakaria kɛ Netanel kɛ Mikaia.

⁸ Levibii nɛɛhu kɛ osɔfoi enyɔ fata gbɔmɛi nɛɛ ahe kɛtee. Lɛvibii nɛɛ ji Shemaia kɛ Netania kɛ Zebadia kɛ Asahel kɛ Shemiramot kɛ Yehonatan kɛ Adonia kɛ Tobia kɛ Tob-Adonia. Ni osɔfoi lɛ ji Elishama kɛ Yehoram.

⁹ Amɛhiɛ Yehowa Mla Wolo lɛ, ni amɛkɛkpa Yuda maji blublu amli amɛkɛtsɔ̃ɔ maŋbii lɛ anii.

Yehoshafat gbɛi hehe

¹⁰ Yehowa he ŋmiŋmi mɔmɔ shikpɔji fɛɛ ni bɔle Yuda lɛ anɔ bii lɛ, no hewɔ lɛ, eko kwraa ekaaa akɛ ekɛ Yehoshafat aaawu ta.

¹¹ Filistibii lɛ ateŋ mɛi komɛi kɛ jwiɛtɛi kɛ nibii krokomɛi babaoo bake Maŋtsɛ Yehoshafat yɛ ehiɛsɔlɛ hewɔ. Arabiabii komɛi hu bake lɛ ojwɛnii akpei kpawo kɛ ohai kpawo, kɛ abotia hii hu akpei kpawo kɛ ohai kpawo.

¹² Yehoshafat agbojee lɛ tee nɔ shwere. Emamɔ mɔji kɛ nitoohei yɛ Yuda hei fɛɛ,

¹³ ni etĩa niyenii babaoo etotoo maji nɛɛ amli. Eto hii kãkãlɔi yɛ Yerusalɛm;

¹⁴ ni bɔ ni ehala amɛ kɛjɛ amɛtsɛmɛi awei lɛ amli ehã lɛ nɛ: Adna ji Yuda akutso lɛŋ tabilɔi lɛ fɛɛ atatsɛ nukpa, ni eyɛ hii kakabãŋi akpei ohai etɛ̃ yɛ eshishi.

¹⁵ Esɛɛmɔ ji tatsɛ Yehohanan; ehiɛ hii akpei ohai enyɔ kɛ nyɔŋmai kpaanyɔ yɛ lɛ eshishi.

¹⁶ Yehohanan sɛɛmɔ ji Zikri bi Anasia, mɔ ni jɛ tsuijurɔ naa ekɛ ehe hã Yehowa sɔɔmɔ lɛ; ehiɛ hii akpei ohai enyɔ yɛ eshishi.

¹⁷ Benyamin akutso lɛ mli hii tabilɔi lɛ, amɛtatsɛnukpa ji Eliada, nuu kãkãlɔ kpanaa lɛ. Eyɛ hii ni kɛ gãi kɛ tsɛŋ wuɔ ta akpei ohai enyɔ yɛ eshishi;

¹⁸ Esɛɛmɔ ji Yehozabad kɛ eshishi hii akpei oha kɛ nyɔŋmai kpaanyɔ ni aje gbɛ awaje amɛ ahã tawuu.

¹⁹ Mɛnɛɛmɛi sɔmɔɔ Maŋtsɛ Yehoshafat yɛ Yerusalɛm. Amɛ amɛsɛɛ lɛ etotoo tabilɔi yɛ Yuda maji wuji ni atswa gbogboi awo amɛhe lɛ fɛɛ amli.