2 Kronika 15 - ŊMALƐ KRƆŊKRƆŊ LƐ

Nibii ahiɛ ni Maŋtsɛ Asa tsake

¹ Nyɔŋmɔ Mumɔ lɛ ba Obed bi Azaria nɔ,

² ni eyiŋ etee koni ekɛ Maŋtsɛ Asa ayakpe. Be ni amɛkpe lɛ Azaria kɛɛ maŋtsɛ lɛ akɛ, “Maŋtsɛ Asa kɛ Yuda kɛ Benyamin fɛɛ, nyɛboa mi toi. Gbii abɔ ni nyɛmiibo Yehowa toi lɛ, lɛ hu ekɛ nyɛ yɛ. Kɛji nyɛtao lɛ lɛ, nyɛbaana lɛ, shi kɛji nyɛkwa lɛ lɛ, lɛ hu ebaakwa nyɛ.

³ Israel hi shi be kplaŋŋ ni ebɛ anɔkwa Nyɔŋmɔ lɛ, ebɛ osɔfoi ni tsɔ̃ɔ maŋbii lɛ anii, ni ebɛ mla hu.

⁴ Shi be ni fimɔ ba ni amɛkpale kɛyatao Yehowa, Israel Nyɔŋmɔ lɛ, sɛɛgbɛ lɛ amɛna lɛ.

⁵ Nakai bei lɛ amli lɛ mɔ ni yaa ni jio, mɔ ni baa ni jio, amɛ fɛɛ amɛbɛ hejɔlɛ, ejaakɛ kpokpai fɛɛ anɔ ejɔɔɔ kɛ basabasa nifeemɔi.

⁶ Shikpɔŋ lɛ nɔ bii ateŋ egbala kuikui ejaakɛ jaku ete shi ewo jaku, ni maŋ kome kɛ maŋ kome miitswa, ejaakɛ Nyɔŋmɔ kɛ jaramɔi srɔtoi miiye amɛtsui.

⁷ Shi nyɛ lɛ, nyɛfia shi, ni nyɛnijiaŋ akajea wui ejaakɛ nɔ ni nyɛtsuɔ nɛɛ efeŋ yaka.”

⁸ Be ni Asa nu gbalɛ ni Obed bi Azaria gba lɛ, ena ekãa, ni egu musubɔɔ amãgãi lɛ fɛɛ yɛ Yuda kɛ Benyamin shikpɔji lɛ anɔ hei fɛɛ kɛ agbɛnɛ yɛ Efraim gɔji lɛ anɔ maji ni eshɔ̃shɔ̃ɔ lɛ fɛɛ hu amli. Esaa Yehowa afɔleshãa latɛ lɛ ni ma Yehowa Sɔlemɔtsu lɛ koi lɛ hiɛ lɛ.

⁹ Mɛi babaoo diɛŋtsɛ ni ji Efraimbii kɛ Manasebii kɛ Simeonbii tse amɛhe kɛjɛ Israel, ni amɛkɛ amɛhe badɔmɔ Maŋtsɛ Asa be ni amɛna akɛ Yehowa, eNyɔŋmɔ lɛ, kɛ lɛ yɛ lɛ. Maŋtsɛ Asa tsɛ gbɔmɛi nɛɛ kɛ Yudabii kɛ Benyaminbii fɛɛ kpee.

¹⁰ Amɛnaa babua yɛ Yerusalɛm yɛ Asa maŋtsɛyeli afi ni ji nyɔŋma kɛ enumɔ lɛ mli nyɔŋ ni ji etɛ̃ lɛ nɔ.

¹¹ Amɛkɛ ta mli haanii ni amɛkɛba shĩa lɛ mli tsinai ohai kpawo kɛ toi akpei kpawo shã afɔle amɛkɛhã Yehowa nakai gbi lɛ.

¹² No sɛɛ lɛ, yɛ nakai gbi lɛ nɔ nɔŋŋ lɛ, amɛkã kitã akɛ amɛbaaja Yehowa, amɛtsɛmɛi aNyɔŋmɔ lɛ, kɛ amɛtsui kɛ amɛyitsoŋ fɛɛ,

¹³ ni asaŋ mɔ fɛɛ mɔ ni jaaa Israel Nyɔŋmɔ lɛ, mɔ lɛ gbekɛ ni jio, onukpa ni jio, nuu ni jio, yoo ni jio, abaagbe lɛ.

¹⁴ Amɛkɛ gbee walɛ kã Yehowa kitã lɛ, kɛkɛ ni amɛbɔ oshe, ni akpã tɛtɛrɛmantɛrɛ kɛ koofɛŋ.

¹⁵ Yuda tso muu fɛɛ nya kitã ni amɛkã lɛ he akɛ amɛjɛ amɛtsuiŋ fɛɛ ni amɛkã; ejaakɛ amɛtao Yehowa sɛɛgbɛ kɛ amɛtsui fɛɛ, ni amɛna lɛ. Yehowa hã amɛna toiŋjɔlɛ yɛ amɛhe fɛɛ he kɛkpe.

¹⁶ Maŋtsɛ Asa kpa enyɛ Maaka tete po akɛ maŋnyɛ ejaakɛ Maaka fee hiɛgbejianii, no ji akɛ ema amãgã ehã jemawɔŋ Ashera lɛ. Asa kumɔ amãgã ni enyɛ ma lɛ, ni ejwra lɛ wɔtsɔwɔtsɔ ni eyashã amãgã lɛ yɛ Kidron Jɔɔ lɛ mli.

¹⁷ Maŋtsɛ Asa naaa egu jemawɔji ajamɔhei ni yɔɔ Israel shikpɔŋ lɛ nɔ lɛ fɛɛ moŋ, shi kɛ̃lɛ eye Yehowa anɔkwa ewala beiaŋ fɛɛ.

¹⁸ Eyaŋɔ nibii fɛɛ ni etsɛ ejɔɔ amɛnɔ ekɛhã Yehowa, kɛ agbɛnɛ shika kɛ jwiɛtɛi nibiinibii ni lɛ diɛŋtsɛ hu ejɔɔ amɛnɔ ekɛhã Yehowa lɛ kɛba Nyɔŋmɔ We lɛ.

¹⁹ Enɛ sɛɛ lɛ ta ko ta ko baaa aahu kɛyashi Asa maŋtsɛyeli afi ni ji nyɔŋmai etɛ̃ kɛ enumɔ lɛ nɔ.