2 Kronika 14 - ŊMALƐ KRƆŊKRƆŊ LƐ

Maŋtsɛ Asa ye Etiopiabii anɔ kunim

¹ Maŋtsɛ Abia tsɔ̃ esɛɛ, ni afu lɛ yɛ David Maŋ lɛ mli. Ebi Asa baye maŋtsɛ yɛ esɛɛ, ni eyinɔ lɛ shikpɔŋ lɛ nɔ jɔ afii nyɔŋma.

² Asa jeŋba sa Yehowa eNyɔŋmɔ lɛ hiɛ ejaakɛ efee nɔ ni hi kɛ nɔ ni ja hu.

³ Egu maŋsɛɛ jemawɔji lɛ ajamɔhei lɛ hu, asaŋ ekumɔ shiui ni amãmɔ lɛ, ni efolɔ Ashera jemawɔŋ lɛ atsei lɛ eshwie shi.

⁴ Kɛkɛ ni efã Yudabii fɛɛ akɛ amɛja Yehowa, ni ji amɛtsɛmɛi aNyɔŋmɔ, lɛ, asaŋ amɛye emlai lɛ kɛ ekitãi lɛ anɔ.

⁵ Maŋtsɛ Asa gu maŋsɛɛ jemawɔji ajamɔhei lɛ kɛ latɛi ni akɛshãa tsofakɛŋma akɛhãa amɛ lɛ fɛɛ yɛ Yuda shikpɔŋ lɛ nɔ maji fɛɛ amli. Enɛ hã toiŋjɔlɛ ba emaŋtsɛyeli lɛ mli yɛ eshishi.

⁶ Ena hiɛ kɛtswa gbogbo ewo Yuda maji lɛ ekomɛi ahe ekɛwaje amɛ ejaakɛ afii babaoo ni ta bɛ eyinɔ ejaakɛ Yehowa hã etoiŋ jɔ lɛ.

⁷ Ekɛɛ Yudabii lɛ akɛ, “Nyɛhãa wɔtswaa gbogboi wɔwoa maji nɛɛ ahe, ni wɔmamɔa mɔji hu wɔwoa amɛmli; asaŋ wɔtara amɛnaa agboi, ni wɔwo amɛsɛɛ adabaŋi koni wɔkɛwaje amɛ be mli ni shikpɔŋ lɛ nɔ ejɔ ni ekã shi ehã wɔ nɛɛ, ejaakɛ wɔfee nɔ ni Nyɔŋmɔ taoɔ lɛ. Wɔfee esuɔmɔnaanii, no hewɔ lɛ, ehã wɔhe ejɔ wɔ yɛ wɔhe fɛɛ he.” No hewɔ lɛ, Yudabii lɛ wajewajee maji lɛ, ni shikpɔŋ lɛ shwere jogbaŋŋ.

⁸ Maŋtsɛ Asa yɛ tabilɔi akpei ohai etɛ̃ yɛ Yuda ni amɛ ji amɛhe hii ni hiɛɔ tsɛŋi wuji kɛ akplɔ; ni eyɛ tabilɔi akpei ohai enyɔ kɛ nyɔŋmai kpaanyɔ yɛ Benyamin, ni amɛ lɛ amɛhiɛɔ tsɛŋi bibii, ni amɛtsɛ̃ɔ gãi. Gbɔmɛi nɛɛ fɛɛ ji amɛhe hii kakabãŋi ni aje gbɛ atsɔse.

⁹ Kɛkɛ ni Etiopianyo ko ni gbɛi ji Zera lɛ fã ta kɛba koni ebatua Yudabii. Ehiɛ tabilɔi akpe toi akpe kɛ tayaa shwiilii hu ohai etɛ̃; ni eba aahu kɛbashɛ Maresha tɔ̃ɔ.

¹⁰ No hewɔ lɛ, Asa hu fã kɛ etabilɔi koni ekɛ Zera eyakpe. Biɛ kɛ biɛ lɛ gba ta yɛ Zefata Jɔɔ lɛ mli yɛ Maresha.

¹¹ Kɛkɛ ni Asa sɔle etsɛ Yehowa, eNyɔŋmɔ lɛ, ni ekɛɛ akɛ, “Oo! Yehowa, bo lɛ mɔ ko bɛ ni eyeɔ ebuaa hewalɔ kɛ mɔ ni bɛ hewalɛ fɛɛ tamɔ ofeɔ lɛ. Ŋmɛlɛtswaa nɛɛ mli lɛ ye obua wɔ, Yehowa, wɔNyɔŋmɔ, ejaakɛ bo onɔ wɔhiɛ kã, ni asaŋ bo ogbɛi mli wɔba yɛ wɔkɛ ta kpeteŋkple nɛɛ baawu. Ao! Yehowa, bo ji wɔNyɔŋmɔ, ni kaahã adesa ko nine miitsɔ̃ wɔnɔ.”

¹² Yehowa ye Etiopiabii ata lɛ nɔ be ni Asa kɛ Yudabii kɛ amɛ bɔi nɔmɔ lɛ, ni Etiopiabii lɛ jo foi.

¹³ Asa kɛ ta ni fata ehe lɛ tiu Etiopiabii lɛ kɛyashi Gerar tɔ̃ɔ. Etiopiabii lɛ nyɔnyɔɔ bɔ ni eshwɛɛɛ amɛteŋ hiɛkãalɔ kome po, ejaakɛ Yehowa kɛ Asa ta lɛ fee Etiopiabii lɛ butuu. Yuda tabilɔi lɛ ha nii babaoo diɛŋtsɛ kɛtee.

¹⁴ Amɛkpãtã maji fɛɛ ni bɔle Gerar lɛ ahiɛ ejaakɛ Yehowa he ŋmiŋmi emɔmɔ maji nɛɛ fɛɛ amli bii lɛ. Ni Yudabii lɛ ha maji lɛ fɛɛ amli nii ejaakɛ haanii babaoo yɛ amɛmli.

¹⁵ Amɛtua kooloialɛlɔi komɛi hu yɛ amɛshitoohei amli, ni amɛloo amɛtoi kɛ yoomai babaoo diɛŋtsɛ kɛtee, ni amɛku amɛsɛɛ kɛtee Yerusalɛm.