2 Kronika 13 - ŊMALƐ KRƆŊKRƆŊ LƐ

Ta ni Abia kɛ Yeroboam wu lɛ

¹ Be ni Yeroboam na afii nyɔŋma kɛ kpaanyɔ akɛ Israel maŋtsɛ lɛ, ni awo Abia hu akɛ Yuda Maŋtsɛ.

² Abia ye maŋtsɛ yɛ Yerusalɛm afii etɛ̃. Abia nyɛ gbɛi ji Milkaia ni ji Uriel ni jɛ Gibea maŋ lɛ mli lɛ biyoo lɛ. Ta te shi yɛ Abia kɛ Yeroboam teŋ.

³ Abia hiɛ hii kãkãlɔi akpei ohai ejwɛ ni eje gbɛ ehala kɛtee ta lɛ, ni Yeroboam hu kɛ hii tabilɔi akpei ohai kpaanyɔ gba ta koni amɛkɛ Abia akpe.

⁴ Tai enyɔ lɛ yakpe yɛ Efraim gɔji shikpɔji lɛ nɔ. Kɛkɛ ni Abia tee eyadamɔ gɔŋ lɛ eko ni gbɛi ji Zemaraim Gɔŋ lɛ yiteŋ, ni ebo etsɛ Yeroboam kɛ Israel ta lɛ, ni ekɛɛ amɛ akɛ, “Agoo! Yeroboam kɛ Israel hii!

⁵ Nyɛleee kwraa akɛ yɛ Kpãŋmɔ ni emli ehiii kuu ni Yehowa, Israel Nyɔŋmɔ lɛ, kɛ David kpãŋ naa lɛ Yehowa jɔɔ Israel maŋtsɛyeli nɔ ehã David kɛ eshwiei kɛmiiya naanɔ lo?

⁶ Shi Yeroboam, Nebat bi lɛ te shi, ni etse enuŋtsɔ Solomon ni ji David bi lɛ hiɛ atua.

⁷ Ena hii fɔ̃ji kɛ yakagbɔmɛi efata ehe kɛwo lɛ hewalɛ, ni akɛni nakai be mli lɛ Rehoboam edako, asaŋ ehiɛ waaa hu hewɔ lɛ enyɛɛɛ amɛ.

⁸ Ŋmɛnɛ lɛ nyɛ hu nyɛte shi kɛmiishi hewalɛ ni Yehowa ejɔɔ nɔ ehã David shwiei lɛ ejaakɛ nyɛyi fa, ni asaŋ nyɛhiɛ shika tsinabii lɛ ni Yeroboam fee hã nyɛ akɛ nyɛnyɔŋmɔi lɛ.

⁹ Te nyɛshwie Aaron shwiei ni ji mɛi ni yeɔ Yehowa osɔfo lɛ kɛ Levibii lɛ hu, ni nyɛwowoo nyɛ diɛŋtsɛ nyɛsɔfoi moŋ tamɔ bɔ ni shikpɔji krokomɛi lɛ anɔ bii feɔ lɛ? Te mɔ fɛɛ mɔ ni hiɛɔ edɛŋ tsina oblayoo loo ojwɛnii kpawo kɛba lɛ kɛkɛ lɛ awo lɛ nakai nibii ni jeee Nyɔŋmɔ diɛŋtsɛ ni wo lɛ osɔfo?

¹⁰ “Wɔ lɛ, Yehowa ji wɔNyɔŋmɔ, ni wɔkwako lɛ. Aaron shwiei lɛ ji mɛi ni yeɔ osɔfo, ni amɛsɔmɔɔ Yehowa yɛ wɔteŋ, ni Levibii lɛ hiɛ amɛnitsumɔi lɛ amli amɛmiitsu pɛpɛɛpɛ.

¹¹ Daa leebi kɛ gbɛkɛ lɛ amɛshãa shãa afɔlei kɛ tsofakɛŋma amɛhãa Yehowa. Amɛkɛ aboloo ni akɛmaa Yehowa hiɛ lɛ maa ehiɛ yɛ okplɔ̃ ni atsuu he lɛ nɔ, ni daa gbɛkɛ lɛ amɛsuɔ shika kanetso lɛ nɔ kanei lɛ. Wɔ lɛ, wɔhiɛ mli wɔmiifee nibii ni Yehowa eto akɛ afee lɛ; shi nyɛ lɛ nyɛkwa Yehowa.

¹² Naa, Nyɔŋmɔ kɛ wɔ yɛ, ni lɛ enyiɛ wɔta lɛ hiɛ, asaŋ esɔfoi lɛ hu yɛ biɛ kɛ tɛtɛrɛmantɛrɛi, ni amɛbaakpã kɛbɔ tawuu oshe amɛwo nyɛ. Ataamɛi Israelbii, nyɛkakaa kwraa akɛ nyɛkɛ Yehowa, nyɛtsɛmɛi aNyɔŋmɔ, lɛ baawu ta. Nyɛyeŋ kunim kɔkɔɔkɔ.”

¹³ Be mli ni enɛ yaa nɔ lɛ, asomoaŋ Yeroboam ewo tabilɔi gbɛ koni amɛlɔgɔ Yudabii lɛ kɛyawo amɛ ka yɛ amɛsɛɛgbɛ. No mli lɛ Israel ta tso muu lɛ diɛŋtsɛ egba ta kɛmiikwɛ Yudabii ata lɛ hiɛ kɛ hiɛ, ni ta lɛ fã ko hu ewo Yudabii lɛ aka yɛ amɛsɛɛgbɛ.

¹⁴ Yudabii lɛ yaakwɛ lɛ naa amɛ ni awo amɛ teŋ. No hewɔ lɛ, amɛbolɔ kɛtsɛ Yehowa, ni osɔfoi lɛ kpã tɛtɛrɛmantɛrɛi lɛ,

¹⁵ kɛkɛ ni Yudabii lɛ bɔ oshe. Abia kɛ Yudabii lɛ fã kɛyatua Israelbii lɛ yɛ oshebɔɔ lɛ mli, ni Nyɔŋmɔ ye Yeroboam kɛ Israelbii lɛ anɔ kunim.

¹⁶ Israel tabilɔi lɛ jo foi yɛ Yudabii lɛ ahiɛ, ni Nyɔŋmɔ hã Yudabii lɛ anine tsɔ̃ Israelbii lɛ anɔ.

¹⁷ Abia kɛ Yudabii lɛ ye Israelbii lɛ anɔ butuu kwraa. Israel hii kakabãŋi lɛ ateŋ akpei ohai enumɔ nyɔnyɔɔ yɛ ta lɛ mli.

¹⁸ Belɛ Yudabii lɛ ye Israelbii lɛ anɔ kunim ejaakɛ Yudabii lɛ kɛ amɛhiɛ fɔ̃ Yehowa ni ji amɛtsɛmɛi aNyɔŋmɔ lɛ nɔ.

¹⁹ Abia tiu Yeroboam kɛ etabilɔi lɛ kɛ eta lɛ, ni eyashɔ maji komɛi yɛ edɛŋ. Maji nɛɛ ji Betel kɛ Yeshana kɛ Efron, amɛteŋ eko fɛɛ eko lɛ kɛ ehe akrowai hu.

²⁰ Yeroboam hewalɛ gbɔjɔ kɛjɛ ta nɛɛ sɛɛ yɛ Abia yinɔ fɛɛ.

²¹ Kɛkɛ ni Abia tsɔ̃ gbɔmɔ wulu. Eŋɔ yei nyɔŋma kɛ ejwɛ akɛ ŋamɛi, ni efɔ bihii nyɔŋmai enyɔ kɛ enyɔ kɛ biyei hu nyɔŋma kɛ ekpaa.

²² Abia wala he saji ni eshwɛ lɛ ni ji wiemɔi ni ewie kɛ nibii ni efee lɛ aŋmala yɛ Gbalɔ Ido wala he sane wolo lɛ mli.