2 Kronika 12 - ŊMALƐ KRƆŊKRƆŊ LƐ

Ijipt batua Yuda

¹ Be ni Rehoboam maŋtsɛyeli lɛ ema shi, ni ena hewalɛ lɛ, lɛ kɛ ewebii lɛ fɛɛ gbo Yehowa mlai lɛ anɔ toi.

² No hewɔ lɛ, Maŋtsɛ Rehoboam yinɔ afi ni ji enumɔ lɛ nɔ lɛ, akɛni amɛtɔ̃ Yehowa nɔ lɛ, Ijipt Maŋtsɛ Shishak batua Yerusalɛm

³ kɛ tayaa shwiilii akpe kɛ ohai enyɔ, kɛ okpɔŋɔnɔtalɔi akpei nyɔŋmai ekpaa. Ni tabilɔi ni ekɛjɛ Ijipt kɛba ta lɛ amɛyi babaoo ni ehiii kanemɔ. Libiabii kɛ Shubbii kɛ Etiopiabii fɛɛ shi nɔ.

⁴ Shishak shɔ̃ Yuda shikpɔŋ lɛ nɔ maji ni atswa gbogbo awo amɛhe lɛ fɛɛ, kɛkɛ ni efã koni ebatua Yerusalɛm.

⁵ Kɛkɛ ni Gbalɔ Shemaia tee ni eyanina Rehoboam kɛ Yuda maŋ onukpai ni ebabua amɛhe naa yɛ Yerusalɛm yɛ Shishak hewɔ lɛ, ni ekɛɛ amɛ akɛ, “Naa nɔ ni Yehowa kɛɛ, ‘Nyɛkwa mi, no hewɔ lɛ, mi hu miŋmɛɛ nyɛhe mihã Shishak.’ ”

⁶ Maŋtsɛ Rehoboam kɛ maŋ onukpai lɛ kpɛlɛ amɛtɔ̃mɔ nɔ, ni amɛkɛɛ akɛ, “Yehowa sane ja.”

⁷ Be ni Yehowa na akɛ maŋtsɛ lɛ kɛ enukpai lɛ eje amɛhe sɛɛ lɛ, ekɛɛ Gbalɔ Shemaia akɛ, “Amɛje amɛhe sɛɛ, ni no hewɔ lɛ, mikpataŋ amɛhiɛ, shi mibahere amɛ fioo ko kɛji Shishak batua maŋ lɛ koni Shishak akafee Yerusalɛm butuu yɛ mimlifu lɛ naa.

⁸ Kɛ̃lɛ amɛbaatsɔ̃mɔ Shishak tsuji bɔ ni afee ni amɛna srɔto ni yɔɔ mi sɔɔmɔ kɛ shikpɔŋ lɛ nɔ maŋtsɛmɛi lɛ hu sɔɔmɔ teŋ.”

⁹ Ijipt Maŋtsɛ Shishak batua Yerusalɛm, ni eloo Yehowa Sɔlemɔtsu lɛŋ jwetrii lɛ kɛ maŋtsɛ we lɛŋ hu jwetrii fɛɛ, kɛ shika tsɛŋi ni Solomon fee lɛ hu kɛtee.

¹⁰ Kɛkɛ ni Maŋtsɛ Rehoboam hã afee akɔɔble tsɛŋi akɛto shika tsɛŋi lɛ anajiaŋ; ni etu akɔɔble tsɛŋi nɛɛ ewo mɛi ni buɔ maŋtsɛ we lɛ agboi lɛ anaa lɛ asafoiatsɛmɛi lɛ adɛŋ.

¹¹ Ni be fɛɛ be ni maŋtsɛ lɛ miiya Yehowa Sɔlemɔtsu lɛ mli lɛ, bulɔi lɛ yakɔlɔɔ tsɛŋi nɛɛ amɛhiɛɔ, ni kɛfee sɛɛ lɛ amɛkpaleɔ kɛyaa amɛkɛyatoɔ bulɔi atsu lɛ mli.

¹² Akɛ ni Rehoboam ba ehe shi ehã Yehowa hewɔ lɛ, Yehowa ŋmɛɛ emli ni fu Rehoboam lɛ he, ni ekpãtãaa nibii ahiɛ tsɔ̃ ko, ni no hewɔ lɛ, nibii shwere kɛ̃ yɛ Yuda.

Rehoboam he sane lɛ naamuu

¹³ Maŋtsɛ Rehoboam nane mɔ shi yɛ Yerusalɛm, ni eye emaŋtsɛ lɛ. Rehoboam eye afii nyɔŋmai ejwɛ kɛ ekome be ni ebɔi emaŋtsɛyeli lɛ, ni eye emaŋtsɛ lɛ afii nyɔŋma kɛ kpawo yɛ Yerusalɛm, ni ji maŋ ni Yehowa diɛŋtsɛ kɔ yɛ Israel shikpɔŋ lɛ nɔ maji fɛɛ ateŋ akɛ he krɛdɛɛ ni aja lɛ yɛ lɛ. Rehoboam nyɛ gbɛi ji Naama, ni Amonyoo ji lɛ.

¹⁴ Rehoboam fee nɔ ni ejaaa ejaakɛ ekɛ etsui efɔɔɔ nɔ akɛ eeetao koni ele nɔ ni ji Yehowa suɔmɔnaanii.

¹⁵ Rehoboam he saji lɛ aŋmala kɛjɛ shishijee kɛyata naagbee yɛ Gbalɔ Shemaia kɛ Ninalɔ Idomei ahe saji lɛ amli. Be fɛɛ be lɛ ta kã Yeroboam kɛ Rehoboam teŋ.

¹⁶ Rehoboam tsɔ̃ esɛɛ ni afu lɛ yɛ David Maŋ lɛ mli maŋtsɛmɛi afũuhe lɛ. Ebinuu Abia baye maŋtsɛ yɛ esɛɛ.