2 Korintobii 8 - ŊMALƐ KRƆŊKRƆŊ LƐ

Kristofoi atooyeli

¹ Shi, anyɛmimɛi, wɔmiihã nyɛle dromɔ ni Nyɔŋmɔ kɛduro Makedonia asafoi lɛ,

² akɛ aka amɛ yɛ amanehulu babaoo mli, shi kɛ̃lɛ amɛmiishɛɛ lɛ tɛke nɔ, ni amɛhĩa katekate lɛ mli po, amɛ jie mlihilɛ falɛ kpo;

³ ejaakɛ miiye odase akɛ amɛhã bɔ ni amɛaanyɛ, ni amɛhã fe bɔ ni amɛaanyɛ tete yɛ amɛ diɛŋtsɛ amɛsuɔmɔ naa,

⁴ ni amɛkɛ tutɔmɔ babaoo kpa wɔ fai ni ahã amɛ hu amɛna naanyobɔɔ ni akɛsumɔɔ krɔŋkrɔŋbii lɛ mli gbɛ,

⁵ ni jeee bɔ ni wɔhiɛ kã nɔ lɛ kɛkɛ, shi moŋ amɛŋɔ amɛ diɛŋtsɛ amɛhe amɛhã Nuŋtsɔ lɛ tsutsu kɛ wɔ hu, yɛ Nyɔŋmɔ suɔmɔ naa.

⁶ No hã wɔkpa Tito fai, koni bɔ ni ebɔ̃i momo sa lɛ, nakai etsu dromɔ nitsumɔ nɛɛ kɛgbe naa hu yɛ nyɛteŋ.

⁷ Shi moŋ tamɔ bɔ ni nyɛtɛkeɔ nɔ yɛ nɔ fɛɛ nɔ mli, yɛ hemɔkɛyeli kɛ wiemɔ kɛ nilee kɛ mɔdɛŋbɔɔ fɛɛ kɛ suɔmɔ ni jɛ wɔmli ni eyɔɔ nyɛmli lɛ mli lɛ, nyɛkwɛa koni nɛkɛ dromɔ nɛɛ mli hu lɛ nyɛtɛke nɔ.

⁸ Miwieee yɛ nɔnyɛɛ naa, shi moŋ mɛi krokomɛi amɔdɛŋbɔɔ mikɛkaa nyɛ hu nyɛsuɔmɔ lɛ makwɛ akɛ eyɛ krɔŋŋ lo.

⁹ Ejaakɛ nyɛle wɔNuŋtsɔ Yesu Kristo dromɔ lɛ, akɛ lɛ ni ji niiatsɛ lɛ, etsɔ̃ ohiafo yɛ nyɛhewɔ, koni nyɛtsɔ̃ ehia lɛ nɔ nyɛtsɔ̃mɔ niiatsɛmɛi.

¹⁰ Nɔ ni mijwɛŋ yɛ sane nɛɛ he nɛ, enɛ hi hã nyɛ, ejaakɛ jeee feemɔ kɛkɛ, shi suɔmɔ ni akɛbaafee lɛ hu nyɛ tsutsu nyɛje shishi afi beebe nɛ.

¹¹ No hewɔ lɛ, agbɛnɛ nyɛgbea feemɔ lɛ naa, koni bɔ ni oya nɔŋŋ ni nyɛsumɔ akɛ nyɛfee lɛ, nakai nɔŋŋ nyɛjɛa nɔ ni nyɛyɔɔ lɛ mli nyɛgbea naa.

¹² Ejaakɛ kɛ tsui yɛ he lɛ, no lɛ bɔ ni mɔ ko hãa kɛjɛɔ nɔ ni eyɔɔ mli lɛ saa Nyɔŋmɔ hiɛ; jeee kɛjɛ nɔ ni ebɛ mli.

¹³ Ejaakɛ mikɛɛɛ enɛ ni mɛi komɛi ahe ajɔ amɛ ni nyɛ lɛ nyɛhao, shi moŋ koni fɛɛ afee pɛpɛɛpɛ;

¹⁴ nɛkɛ be nɛɛ mli lɛ, nɔ ni nyɛna kɛtɛke nɔ lɛ ayaye nɔ ni fimɔ hewɔ lɛ mɛi komɛi nyɛɛɛ ahã lɛ najiaŋ, koni be kroko lɛ nɔ ni amɛ hu amɛna kɛtɛke nɔ lɛ abaye nɔ ni fimɔ hewɔ lɛ nyɛnyɛɛɛ nyɛhã lɛ najiaŋ, koni aye hegbɔ pɛpɛɛpɛ;

¹⁵ tamɔ bɔ ni aŋma lɛ akɛ, “Mɔ ni bua pii naa lɛ, enaa eko yɛ sɛɛ, ni mɔ ni bua fioo naa hu lɛ, eshwɛɛɛ lɛ eko.”

¹⁶ Shi shidaa ahã Nyɔŋmɔ, mɔ ni kɛ nyɛhedɔɔ nɛɛ wo Tito tsui mli lɛ;

¹⁷ ejaakɛ eyɛ mli akɛ wɔkɛŋmɛ ehiɛ ni eba ni ekpɛlɛ̃, shi akɛni lɛ diɛŋtsɛ lɛ eyɛ he tsui waa hewɔ lɛ, eba nyɛŋɔɔ yɛ lɛ diɛŋtsɛ esuɔmɔ naa.

¹⁸ Shi nyɛmi ni wɔtsu wɔfata ehe nɛɛ yɛ yijiemɔ yɛ asafoi lɛ fɛɛ mli yɛ Sanekpakpa lɛ hewɔ;

¹⁹ shi jeee enɛ kɛkɛ, shi asafoi lɛ hala lɛ hu, ni ekɛ wɔ anyiɛ ni ehiɛ nɛkɛ mɔbɔnalɛ nitsumɔ ni wɔsɔ̃mɔɔ yɛ he nɛɛ akɛ Nuŋtsɔ lɛ diɛŋtsɛ anunyam, ni akɛtsɔ̃ɔ he tsui ni wɔyɔɔ;

²⁰ ejaakɛ wɔmiikwɛ jogbaŋŋ ni mɔ ko akawie wɔhe efɔŋ yɛ tsuijurɔ naa nikee ni wɔsɔ̃mɔɔ yɛ he nɛɛ hewɔ;

²¹ ejaakɛ oti ni wɔkɛma wɔhiɛ ji akɛ efee fɛo, jeee yɛ Nuŋtsɔ lɛ hiɛ kɛkɛ, shi moŋ yɛ gbɔmɛi ahiɛ hu.

²² Shi wɔtsu wɔnyɛmi lɛ hu wɔfata amɛhe, mɔ ni wɔka lɛ kpitiokpitio yɛ nibii pii amli, ni wɔna akɛ ebɔɔ mɔdɛŋ, shi agbɛnɛ eebɔ mɔdɛŋ po fe tsutsu lɛ, yɛ ehiɛ ni ekɛfɔ̃ɔ nyɛnɔ pii lɛ hewɔ.

²³ Shi Tito lɛ, mihefatalɔ ni mikɛtsuɔ nyɛhe nii ji lɛ, ni wɔnyɛmimɛi lɛ hu, asafoi lɛ abɔfoi kɛ Kristo hiɛnyam ji amɛ.

²⁴ No hewɔ lɛ, nyɛjiea nyɛsuɔmɔ kɛ shwãa ni wɔshwãa wɔfɔ̃ɔ nyɛnɔ lɛ kpo nyɛtsɔa amɛ yɛ asafoi lɛ ahiɛ.