2 Korintobii 7 - ŊMALƐ KRƆŊKRƆŊ LƐ

¹ Agbɛnɛ, nyɛ mɛi ni asumɔɔ, akɛni wɔna nɛkɛ shiwoi nɛɛ hewɔ lɛ, nyɛhãa wɔtsua wɔhe kɛjɛa heloo kɛ mumɔ muji fɛɛ mli, ni wɔhã wɔhetsemɔ aye emuu yɛ Nyɔŋmɔ gbeyeishemɔ mli.

Paulo mii shɛ ehe akɛ asafo lɛ eshwa ehe

² Nyɛhãa wɔ gbɛ yɛ nyɛmli! Wɔfeko mɔ ko mɔ ko efɔŋ ko; wɔyeko mɔ ko awui, wɔyeko mɔ ko amim.

³ Mikɛɛɛ enɛ ni mikɛbu nyɛ fɔ; ejaakɛ mikɛɛ momo akɛ wɔsumɔɔ nyɛ yɛ wɔtsui mli bɔ ni gbele mli oo, wala mli oo, wɔkɛ nyɛ ekome.

⁴ Mikɛ mihe fɔ̃ɔ nyɛnɔ waa, ni asaŋ mishwãa mifɔ̃ɔ nyɛnɔ babaoo; miyi obɔ̃ kɛ miishɛjemɔ, miyi kɛtɛke nɔ kɛ miishɛɛ yɛ wɔmanehulu lɛ fɛɛ mli.

⁵ Ejaakɛ shi be ni wɔba Makedonia lɛ hu, wɔnaaa wɔgbɔmɔtso hejɔlɛ kwraa; shi moŋ he fɛɛ he lɛ amanehulu sɔŋŋ wɔnaa: wɔkponɔgbɛ lɛ nɔmɔi, wɔmligbɛ lɛ gbeyeishemɔi.

⁶ Shi Nyɔŋmɔ, mɔ ni shɛjeɔ mɛi ni baa amɛhe shi lɛ amii lɛ, kɛ Tito baa lɛ shɛje wɔmii;

⁷ shi jeee ebaa lɛ kɛkɛ, shi moŋ miishɛjemɔ ni nyɛkɛshɛje emii lɛ hu, ejaakɛ egba wɔ nyɛshwee ni nyɛshweɔ mi lɛ kɛ nyɛheshwamɔ lɛ kɛ mihe mɔdɛŋ ni nyɛbɔɔ lɛ; enɛ hã mina miishɛɛ babaoo fe tsutsu lɛ.

⁸ Ejaakɛ kɛ wolo ni miŋma nyɛ lɛ edɔ nyɛ lɛ, mishwaaa mihe; kɛji mishwa mihe po lɛ, ejaakɛ mina akɛ nakai wolo lɛ edɔ nyɛ, kɛ be kuku po,

⁹ agbɛnɛ mimii eshɛ; jeee dɔ ni edɔ nyɛ lɛ hewɔ ni, shi moŋ akɛni dɔlɛ lɛ hã nyɛshwa nyɛhe lɛ hewɔ ni; ejaakɛ edɔ nyɛ bɔ ni sa Nyɔŋmɔ hiɛ, koni akajɛ wɔ ni nɔ ko bɔ nyɛ.

¹⁰ Ejaakɛ dɔlɛ ni sa Nyɔŋmɔ hiɛ lɛ tsɛɔ tsuitsakemɔ kɛbaa, tsuitsakemɔ ni kɛ mɔ yaa yiwalaheremɔ ni ashwaaa he yɛ he lɛ mli; shi je nɛɛ mli dɔlɛ lɛ tsɛɔ gbele.

¹¹ Ejaakɛ nɛkɛ dɔlɛ ni edɔ nyɛ bɔ ni sa Nyɔŋmɔ hiɛ nɛɛ lɛ, nyɛkwɛa nɔ mɔdɛŋbɔɔ, nɔ naajiemɔ, nɔ mlifu, nɔ gbeyeishemɔ, nɔ shwee, nɔ hiɛdɔɔ, nɔ jalɛ kojomɔ ni etsɛ ewo nyɛmli! Nɔ fɛɛ nɔ mli lɛ nyɛkɛ nyɛhe tsɔ̃ɔ wɔ akɛ nyɛhe tse yɛ nɛkɛ sane nɛɛ mli.

¹² No hewɔ lɛ, kɛ miŋma nyɛ tete lɛ, jeee mɔ ni tɔ̃ lɛ, asaŋ hu jeee mɔ ni atɔ̃ enɔ lɛ hewɔŋ, shi moŋ bɔ ni afee ni wɔhe mɔdɛŋ ni nyɛbɔɔ lɛ apue faŋŋ ahã nyɛ yɛ Nyɔŋmɔ hiɛ.

¹³ Enɛ hewɔ lɛ, wɔmii eshɛ. Shi miishɛɛ ni wɔna yɛ Tito miishɛɛ lɛ he lɛ hã wɔmiishɛɛ lɛ tɛke nɔ babaoo, ejaakɛ nyɛ fɛɛ nyɛhã etsui enyɔ emli,

¹⁴ ejaakɛ kɛ mishwã nyɛ mitsɔ̃ɔ lɛ yɛ nɔ ko mli lɛ, nyɛwooo mi hiɛgbele; shi tamɔ bɔ ni wɔwie nibii fɛɛ anɔkwale mli wɔtsɔ̃ɔ nyɛ lɛ, nakai nɔŋŋ kɛ̃ wɔshwãa hu ni wɔshwã wɔtsɔ̃ɔ Tito lɛ efee anɔkwale,

¹⁵ ni eyɛ nyɛhe tsui babaoo fe tsutsu lɛ, ejaakɛ ekaiɔ nyɛ fɛɛ nyɛtoiboo lɛ, bɔ ni nyɛkɛ gbeyeishemɔ kɛ hekpokpomɔ here lɛ lɛ.

¹⁶ Mina miishɛɛ akɛ mikɛ mihe fɔ̃ɔ nyɛnɔ yɛ nɔ fɛɛ nɔ mli.