2 Korintobii 6 - ŊMALƐ KRƆŊKRƆŊ LƐ

Nyɔŋmɔ sɔ̃ɔlɔi anitsumɔ walɛ kɛ enyam

¹ Shi akɛni Nyɔŋmɔ hefatalɔi ji wɔ yɛ enitsumɔ lɛ mli lɛ, wɔmiikpa nyɛ fai ni nyɛkahã Nyɔŋmɔ dromɔ ni nyɛnine eshɛ nɔ lɛ fee yaka.

² Ejaakɛ ekɛɛ akɛ, “Be ni sa mli mibo bo toi yɛ, ni yiwalaheremɔ gbi nɔ hu miye mibua bo yɛ.” Naa, be ni sa jogbaŋŋ nɛ; naa, yiwalaheremɔ gbi nɛ.

³ Ni wɔtooo mɔ ko mɔ ko pampi yɛ nɔ ko nɔ ko mli, koni akagbe wɔsɔ̃ɔmɔ lɛ he guɔ.

⁴ Shi moŋ, nɔ fɛɛ nɔ mli lɛ wɔkɛ wɔhe tsɔ̃ɔ akɛ Nyɔŋmɔ sɔ̃ɔlɔi ji wɔ. Wɔmĩaa wɔhiɛ babaoo. Wɔtoɔ wɔtsui shi yɛ amanehului kɛ fimɔi kɛ jaramɔi amli.

⁵ Ayiɔ wɔ ni awoɔ wɔ tsuŋ kpitiokpitio. Afeɔ wɔ soisoi. Wɔtsuɔ nii kɛ kpeshii kɛ deŋmegbomɔ pii. Wɔhiɔ ŋmãa,

⁶ ni wɔbɔɔ hetsemɔ he mɔdɛŋ kɛ nilee. Wɔŋmɛɔ wɔtsui shi; wɔmli hi. Yɛ Mumɔ Krɔŋkrɔŋ hewalɛ naa lɛ, wɔsuɔmɔ lɛ osato bɛ mli.

⁷ Nyɔŋmɔ hewalɛ naa lɛ wɔwieɔ anɔkwale. Ni wɔwoɔ jalɛ tawuunii yɛ ninejurɔ kɛ abɛku fɛɛ.

⁸ Mɛi komɛi woɔ wɔhiɛ nyam; ni mɛi komɛi gbeɔ wɔhe guɔ. Mɛi komɛi wieɔ wɔhe efɔŋ, ni mɛi komɛi wieɔ wɔhe ekpakpa. Anaa wɔ akɛ shishiulɔi, kɛ̃lɛ, anɔkwafoi ji wɔ.

⁹ Wɔ tamɔ mɛi ni aleee kɛ mɛi ni ale krɛdɛɛ; tamɔ mɛi ni gboiɔ, ni naa, wɔhiɛ kãmɔ. Wɔ tamɔ mɛi ni agbalaa amɛtoi, ni kɛ̃lɛ agbeko wɔ.

¹⁰ Wɔ tamɔ ŋkɔmɔyelɔi, shi wɔmii shɛɔ daa. Wɔ tamɔ ohiafoi, shi wɔfeɔ mɛi pii niiatsɛmɛi, ni wɔ tamɔ mɛi ni bɛ nɔ ko, ni kɛ̃lɛ wɔyɛ nii fiaa.

Nyɛgbelea nyɛtsui naa nyɛhãa wɔ

¹¹ Korintobii, wɔkɛ nyɛ ewie faŋŋ; wɔtsui mli egbele.

¹² Gbɛ yɛ wɔmli hã nyɛ, shi nyɛ diɛŋtsɛ moŋ nyɛtsuii amli joɔ.

¹³ Nyɛ hu nyɛgbelea nyɛtsuii amli nakai nɔŋŋ, ni nyɛkɛto wɔ najiaŋ. Mikɛ nyɛ miiwie tamɔ mibii.

Kristojamɔ kɛ wɔŋjamɔ bɛ nɔ ko feemɔ

¹⁴ Nyɛkɛ mɛi ni heee yeee lɛ akagbalaa kɔŋtso kome, akɛni amɛkɛ nyɛ yeee hegbɔ lɛ. Ejaakɛ mɛɛ bɔɔ jalɛ kɛ mlatɔ̃mɔ yɔɔ? Aloo mɛɛ yeli la kɛ duŋ yɔɔ?

¹⁵ Ni mɛɛ gbeekpãmɔ Kristo kɛ Belial yɔɔ? Aloo mɛɛ nijaa mɔ ni heɔ yeɔ kɛ mɔ ni heee yeee yɔɔ?

¹⁶ Ni asaŋ mɛɛ ekomefeemɔ yɔɔ Nyɔŋmɔ Sɔlemɔtsu kɛ amãgãi ateŋ? Ejaakɛ Nyɔŋmɔ hiɛkãalɔ lɛ Sɔlemɔtsu ji nyɛ, tamɔ bɔ ni Nyɔŋmɔ kɛɛ akɛ, “Mahi amɛmli, ni manyiɛ yɛ amɛteŋ. Ni matsɔ̃ amɛNyɔŋmɔ, ni amɛ hu amɛaatsɔ̃ mimaŋ.”

¹⁷ No hewɔ lɛ, Yehowa kɛɛ, “Nyɛjea amɛteŋ, ni nyɛtsea nyɛhe, ni nyɛkataa muji nɔ ko he, ni mahere nyɛ atuu.

¹⁸ Ni matsɔ̃ nyɛtsɛ, ni nyɛ hu nyɛaatsɔ̃mɔ mibihii kɛ mibiyei,” Yehowa, Ofe lɛ, kɛɛ.