2 Korintobii 5 - ŊMALƐ KRƆŊKRƆŊ LƐ

Wɔshweɔ wɔŋwɛi gbɔmɔtso hee kɛ ŋwɛi shĩa hee lɛ

¹ Ejaakɛ wɔle akɛ, kɛ akumɔ wɔbuu ni wɔyɔɔ mli ni ji wɔshikpɔŋ nɛɛ nɔ gbɔmɔtso lɛ shĩa jiŋŋ, wɔyɛ tsu ko ni jɛ Nyɔŋmɔ ŋɔɔ, shĩa ko ni jeee niji akɛfee, ni hiɔ shi kɛyaa naanɔ yɛ ŋwɛi.

² Ejaakɛ anɔkwale mli lɛ, wɔdɔ̃mɔɔ ŋtsɔi tete yɛ wɔbuu nɛɛ mli, ni wɔshweɔ akɛ akɛ wɔtsu ni jɛ ŋwɛi lɛ awo wɔ,

³ ni kɛ akɛwo wɔ nɛkɛ lɛ, no lɛ anaŋ wɔ akɛ mɛi ni nyiɛ yayai.

⁴ Ejaakɛ wɔ ni wɔyɔɔ buu lɛ mli lɛ hu, akɛni wɔhe jaraa wɔ hewɔ lɛ, wɔdɔ̃mɔɔŋtsɔi, ejaakɛ wɔsumɔɔɔ akɛ ajie wɔhenii, shi moŋ wɔsumɔɔ akɛ awo wɔ nii ashwie nɔ, koni wala lɛ ami nɔ ni gboɔ lɛ.

⁵ Shi mɔ ni saa wɔ hã enɛ nɔŋŋ ji Nyɔŋmɔ, mɔ hu ni hã wɔ Mumɔ lɛ akɛ yibaafoo nɔ lɛ.

⁶ No hewɔ lɛ, wɔyɛ tsui daa, ni wɔle akɛ gbii abɔ ni wɔyɔɔ gbɔmɔtso lɛ mli nɛɛ wɔdom kɛjɛ Nuŋtsɔ lɛ ŋɔɔ;

⁷ ejaakɛ hemɔkɛyeli naa wɔnyiɛɔ yɛ, shi jeee ninamɔ naa,

⁸ shi wɔyɛ tsui, ni esa wɔhiɛ moŋ akɛ wɔɔdom kɛjɛ gbɔmɔtso nɛɛ mli, ni wɔyahi shĩa yɛ Nuŋtsɔ lɛ ŋɔɔ.

⁹ No hewɔ lɛ, oti ni wɔkɛma wɔhiɛ ji akɛ, shĩa wɔyɔɔ jio, dommɔ wɔdom jio, esa ni wɔsa ehiɛ.

¹⁰ Ejaakɛ ja wɔ fɛɛ wɔpue faŋŋ yɛ Kristo kojomɔ sɛi lɛ hiɛ, koni mɔ fɛɛ mɔ ana nii ni efee yɛ gbɔmɔtso mli lɛ he nyɔmɔwobɔɔ ni efee lɛ, ekpakpa jio, efɔŋ jio.

Kristo ekpãtã wɔ kɛ Nyɔŋmɔ

¹¹ No hewɔ lɛ, akɛni wɔle Nuŋtsɔ lɛ he ni yɔɔ gbeyei lɛ, wɔwieɔ wɔtsɔ̃ɔ gbɔmɛi; shi wɔ lɛ wɔyɛ faŋŋ yɛ Nyɔŋmɔ hiɛ; ni mihiɛ kã nɔ akɛ wɔyɛ faŋŋ yɛ nyɛhenilee mli hu.

¹² Ejaakɛ jeee wɔ diɛŋtsɛ wɔhe yi wɔjieɔ wɔhãa nyɛ ekoŋŋ, shi moŋ wɔkɛmiihã nyɛ gbɛ ni nyɛkɛshwã nyɛfɔ̃ wɔnɔ, koni nyɛna eko nyɛkɛɛ mɛi ni shwãa yɛ gbɔmɛi ahiɛ shi jeee yɛ tsui mli lɛ.

¹³ Ejaakɛ kɛ sɛkɛ wɔyeɔ jiŋŋ, Nyɔŋmɔ hewɔ wɔyeɔ, ni kɛ wɔyɛ shishiishi hu jiŋŋ, nyɛ hewɔ ni.

¹⁴ Ejaakɛ Kristo suɔmɔ lɛ nyɛɔ wɔnɔ, ni wɔkojoɔ nɛkɛ akɛ, kɛ mɔ kome gbo mɛi fɛɛ ayigbele lɛ, belɛ mɛi lɛ fɛɛ egboi.

¹⁵ Ni egbo mɛi fɛɛ ayigbele, koni mɛi ni hiɛ kãmɔ lɛ ahiɛ akakãmɔ miihã amɛ diɛŋtsɛ amɛhe dɔŋŋ, shi moŋ amɛhiɛ akãmɔ ahã mɔ ni gbo ni atee lɛ shi ekoŋŋ ahã amɛ lɛ.

¹⁶ Belɛ, kɛjɛ ŋmɛnɛ nɔ kɛyaa nɛɛ, wɔleee mɔ ko mɔ ko dɔŋŋ yɛ gbɔmɛi asusumɔ naa; ni kɛ gbɔmɛi asusumɔ naa wɔle Kristo yɛ tete lɛ, agbɛnɛ lɛ wɔleee lɛ nakai dɔŋŋ.

¹⁷ Hewɔ lɛ, kɛ mɔ ko yɛ Kristo mli lɛ, bɔɔnɔ hee ji lɛ; blema nii lɛ eho; naa, nibii fɛɛ etsɔ̃mɔ ehee.

¹⁸ Shi nibii nɛɛ fɛɛ jɛ Nyɔŋmɔ, mɔ ni tsɔ̃ Yesu Kristo nɔ ekɛ wɔ kpãtã, ni ekɛ kpãtãmɔ sɔ̃ɔmɔ hã wɔ lɛ dɛŋ;

¹⁹ no ji akɛ Nyɔŋmɔ tsɔ̃ Kristo nɔ ekɛ je lɛ kpãtã, ni ebuuu amɛnɔ̃tɔ̃mɔi lɛ ehãaa amɛ, ni etu kpãtãmɔ wiemɔ lɛ ewo wɔdɛŋ.

²⁰ No hewɔ lɛ, wɔji bɔfoi yɛ Kristo najiaŋ, tamɔ akɛ Nyɔŋmɔ etsɔ̃ wɔnɔ eewie eetsɔ̃ɔ mɛi: wɔdamɔ Kristo najiaŋ wɔmiikpa nyɛ fai akɛ, nyɛhãa akpãtã nyɛ kɛ Nyɔŋmɔ teŋ!

²¹ Ejaakɛ mɔ ni leee esha lɛ, wɔhewɔ lɛ ehã etsɔ̃ esha, koni wɔ lɛ wɔtsɔ̃mɔ Nyɔŋmɔ jalɛ yɛ emli.