2 Korintobii 12 - ŊMALƐ KRƆŊKRƆŊ LƐ

Nii ni ajie kpo atsɔ̃ɔ Paulo

¹ Shwãa he ehĩa moŋ, shi ehĩii hãaa mi, kɛ̃lɛ mibawie ninai kɛ Nuŋtsɔ lɛ kpojiemɔi ahe.

² Mile gbɔmɔ ko yɛ Kristo mli. Afii nyɔŋma kɛ ejwɛ nɛ lɛ, ashá nɛkɛ gbɔmɔ nɛɛ kɛtee ŋwɛi ni ji etɛ̃ lɛ; ashá lɛ ni eyɛ gbɔmɔtso mli jio, mileee; ebɛ gbɔmɔtso mli jio, mileee; Nyɔŋmɔ le.

³ Ni mile nɛkɛ gbɔmɔ nɛɛ akɛ ashá lɛ yɛ gbɔmɔtso mli jio, jeee yɛ gbɔmɔtso mli jio, mileee; Nyɔŋmɔ le.

⁴ Shi akɛ asha lɛ kɛtee Paradeiso ni eyanu wiemɔi ni anyɛŋ awie, ni gbɔmɔ ko bɛ hegbɛ akɛ etsĩɔ tã lɛ, no lɛ mile.

⁵ Gbɔmɔ ni tamɔ nɛkɛ hewɔ mashwã, shi mishwãŋ mihãŋ mi diɛŋtsɛ mihe, akɛ ja yɛ migbedemɔi lɛ ahe.

⁶ Ejaakɛ kɛji miitao mashwã lɛ, mifeŋ kwashia, ejaakɛ anɔkwale mawie; shi mikuɔ mihiɛ mifɔ̃ɔ nɔ, koni mɔ ko akabu mi fe bɔ ni enaa mi aloo enuɔ yɛ minaa lɛ.

⁷ Shi bɔ ni afee ni mikawo mihe nɔ tuutu ko yɛ kpojiemɔi lɛ adaramɔ ni amɛdara kɛtɛke nɔ lɛ hewɔ lɛ, ahã mi ŋmei ko yɛ miheloo mli, ni ji Satan bɔfo, koni egbala mi mai, ni mikawo mihe nɔ tuutu.

⁸ Enɛ hewɔ lɛ, mikpa Nuŋtsɔ lɛ fai shii etɛ̃ sɔŋŋ koni eje minɔ;

⁹ ni ekɛɛ mi akɛ, “Miduromɔ lɛ fa hã bo, ejaakɛ mihewalɛ lɛ, gbedeefeemɔ mli eyeɔ emuu yɛ.” No hewɔ lɛ, misumɔɔ titri akɛ mashwã mafɔ̃ migbedeefeemɔi lɛ anɔ moŋ, koni Kristo hewalɛ lɛ abu mihe.

¹⁰ No hewɔ lɛ, yɛ Kristo hewɔ lɛ, mimii shɛɔ yɛ gbedeefeemɔi amli, yɛ hiɛnaanɔniinamɔi amli, yɛ fimɔ̃i amli, yɛ yiwaa mli, yɛ jaramɔ mli; ejaakɛ kɛ mifee gbedee lɛ, no minaa hewalɛ.

Paulo wie asafo lɛ hiɛ

¹¹ Mifee kwashia; nyɛ nyɛnyɛ minɔ ni mifee nakai. Ejaakɛ kulɛ esa akɛ nyɛ moŋ nyɛjieɔ miyi; ejaakɛ kɛji mijeee nɔ ko tete po, eshwɛɛɛ mi nɔ ko ni mikɛ bɔfoi agboi lɛ aye hegbɔ.

¹² Okadii ni tsɔ̃ɔ bɔfo nitsumɔ lɛ afee yɛ nyɛteŋ yɛ tsuishitoo fɛɛ mli, yɛ okadii kɛ naakpɛɛnii kɛ hewalɛ nitsumɔi amli.

¹³ Ejaakɛ mɛni mli nyɛkpeɔ sɛɛ yɛ fe asafoi krokomɛi lɛ, fe akɛ mi diɛŋtsɛ lɛ mikãaa nyɛnɔ? Nyɛkɛ nɛkɛ tɔ̃mɔ nɛɛ afaa mi!

Paulo fã ehe

¹⁴ Naa, enɛ ji shii etɛ̃ ni misaa mihe akɛ maba nyɛŋɔɔ, shi mikɛ mihe ebafɔŋ nyɛnɔ, ejaakɛ jeee nyɛnii lɛ mitaoɔ, shi moŋ nyɛ diɛŋtsɛ. Ejaakɛ esaaa akɛ bii tiaa nii toɔ amɛfɔlɔi, shi moŋ fɔlɔi ni tiaa nii toɔ amɛbii.

¹⁵ Shi masumɔ babaoo akɛ mafite nii ni miyɔɔ lɛ yɛ nyɛhe, ni asaŋ mikɛ mihe ashã afɔle yɛ nyɛsusumai ahewɔ. Ani esa akɛ bɔ ni suɔmɔ ni miyɔɔ kɛhã nyɛ lɛ faa lɛ, nyɛsuɔmɔ lɛ nɔ agbɔ lo?

¹⁶ Nyɛaakɛɛ akɛ, eyɛ mli akɛ mikãaa nyɛnɔ nɛ; shi akɛni ŋaalɔ ji mi hewɔ lɛ, mimɔ nyɛ yɛ ŋaa mli.

¹⁷ Ani mitsɔ̃ mɛi ni mitsu nyɛŋɔɔ lɛ eko nɔ miye nyɛ amim lo?

¹⁸ Mikpa Tito fai ni mitsu lɛ kɛ wɔnyɛmi ko; ani Tito baye nyɛ amim ko? Ani jeee nakai mumɔ lɛ nɔŋŋ wɔkɛnyiɛ? Jeee nakai najiamaamɔhei lɛ amli nɔŋŋ wɔnyiɛ?

Kɔkɔbɔɔ

¹⁹ Asaŋ nyɛsusuɔ akɛ wɔnaa sɔŋŋ wɔjieɔ wɔtsɔ̃ɔ nyɛ nɛɛ lo? Nyɔŋmɔ hiɛ wɔwieɔ yɛ, yɛ Kristo mli; shi, suɔmɔmɛi, nii nɛɛ fɛɛ lɛ, nyɛnaneshimɔmɔ hewɔ wɔwieɔ.

²⁰ Ejaakɛ miishe gbeyei akɛ ekolɛ kɛ miba lɛ, mibanaŋ nyɛ bɔ ni misumɔɔ, ni nyɛ hu nyɛnaŋ mi bɔ ni nyɛsumɔɔ; bei, awuŋayeli, mlilawoo, pɛsɛŋkuminya, oshekuyeli, mɔhewiemɔ, hefaa, sakasakafeemɔ;

²¹ ni misaa miishe gbeyei akɛ kɛ miba ekoŋŋ lɛ, miNyɔŋmɔ lɛ aaaba mi shi yɛ nyɛhiɛ, ni maye ŋkɔmɔ mahã mɛi ni efee esha sa ni amɛtsakeee amɛtsui lɛ ateŋ mɛi pii, yɛ amɛmujinii kɛ ajwamãŋbɔɔ kɛ nyɛnyɛŋtswibɔɔ lɛ hewɔ.