2 Korintobii 11 - ŊMALƐ KRƆŊKRƆŊ LƐ

Eba lɛ akɛ Paulo ajie lɛ diɛŋtsɛ ehe yi

¹ Mina ni kulɛ nyɛnaa nyɛhãa mikwashiafeemɔ fioo! Shi anɔkwale nyɛnaa nyɛhãa mi.

² Ejaakɛ nyɛhe awuŋã ni miyeɔ lɛ, miiye lɛ bɔ ni Nyɔŋmɔ baaye; ejaakɛ mitsɛ nyɛhe baa mihã nuu kome ni mikɛ oblayoo foro ni he tse ayahã Kristo.

³ Shi miishe gbeyei akɛ aleenɔ, tamɔ bɔ ni onufu lɛ kɛ ekutumpɔo lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔ ni nyɛŋmɛɛ suɔmɔ krɔŋŋ ni nyɛkɛsumɔɔ Kristo lɛ he.

⁴ Ejaakɛ kɛ mɔ ko ba ni ebashiɛ Yesu kroko ni wɔshiɛko, loo mumɔ kroko ni nyɛnako, loo Sanekpakpa kroko ni nyɛmɔko mli lɛ, no lɛ nyɛhere lɛ jogbaŋŋ.

⁵ Ejaakɛ misusuɔ akɛ eshwɛɛɛ mi nɔ ko nɔ ko ni mikɛ bɔfoi agboi lɛ aye hegbɔ.

⁶ Shi kɛ mi ji gbɔmɔ ko ni leee nɔ ko yɛ wiemɔ gbɛfaŋ tete lɛ, mijeee nakai yɛ nilee gbɛfaŋ; shi moŋ wɔfee enɛ faŋŋ wɔhã nyɛ, yɛ gbɛ fɛɛ gbɛ nɔ, yɛ nii fɛɛ mli.

⁷ Aloo belɛ akɛ miba mihe shi koni awo nyɛnɔ, ejaakɛ mijaje Nyɔŋmɔ Sanekpakpa lɛ mitsɔ̃ɔ nyɛ yaka lɛ mifee esha?

⁸ Mitswa asafoi krokomɛi ojo mihe nyɔmɔwoo yɛ amɛdɛŋ mikɛsɔ̃mɔ nyɛ.

⁹ Ni be ni mikɛ nyɛ yɔɔ ni efi mi tete lɛ, mifeee jatsu mihãaa mɔ ko mɔ ko, ejaakɛ nii ni hia mi lɛ, nyɛmimɛi ni jɛ Makedonia ba lɛ hã shɛ midɛŋ, ni mile mihenɔkwɛmɔ yɛ nɔ fɛɛ nɔ mli, ni masaa male mihenɔkwɛmɔ, koni mikatsɔ̃ jatsu mihã nyɛ.

¹⁰ Gbii abɔ ni Kristo anɔkwale lɛ yɔɔ mimli nɛɛ, mɔ ko mɔ ko etsiŋ mishwãa nɛɛ gbɛ yɛ Akaia niiaŋ.

¹¹ Mɛɛ hewɔŋ? Akɛ misumɔ̃ɔɔ nyɛ hewɔŋ? Nyɔŋmɔ le.

¹² Nɔ ni mifeɔ lɛ, mafee, koni mikɛtsi mɛi ni taoɔ mihe sane lɛ agbɛ, ni ana amɛ yɛ amɛshwãanii lɛ amli, tamɔ bɔ ni anaa wɔ hu lɛ.

¹³ Ejaakɛ nɛkɛ mɛi nɛɛ ji amale bɔfoi, nitsulɔi shishiulɔi ni tsakeɔ amɛhe amɛfeɔ Kristo bɔfoi.

¹⁴ Ni enɛ bɛ naakpɛɛ tete ejaakɛ Satan diɛŋtsɛ tsakeɔ ehe etsɔ̃ɔ la bɔfo;

¹⁵ no hewɔ lɛ, kɛ esɔ̃ɔlɔi lɛ hu tsakeɔ amɛhe amɛfeɔ tamɔ jalɛ sɔ̃ɔlɔi lɛ, ejeee nɔ ko wulu ko; amɛnaagbee baafee tamɔ bɔ ni amɛnitsumɔi lɛ yɔɔ lɛ.

¹⁶ Miikɛɛ ekoŋŋ akɛ mɔ ko akabu mi kwashia, shi kɛjeee nakai lɛ, belɛ nyɛŋɔa mi akɛ kwashia kɛkɛ mɔ, koni mi hu mawo shwãa fioo ko.

¹⁷ Nɔ ni miwieɔ nɛɛ, miwieee lɛ tamɔ bɔ ni Nuŋtsɔ lɛ baawie, shi moŋ tamɔ kwashia wieɔ, yɛ nɔmimaa ni miyɔɔ akɛ miyɛ shwãa nɔ lɛ hewɔ.

¹⁸ Akɛni mɛi pii shwãa yɛ heloo naa hewɔ lɛ, mi hu mashwã eko.

¹⁹ Akɛni nyɛ diɛŋtsɛ lɛ nilelɔi ji nyɛ hewɔ lɛ, nyɛkɛ miishɛɛ toɔ nyɛtsui shi nyɛhãa mɛi ni bɛ yitseiaŋ;

²⁰ ejaakɛ kɛ mɔ ko miiye nyɛ nyɔŋ, kɛ mɔ ko miitswa nyɛ ojo, kɛ mɔ ko miimɔ nyɛ, kɛ mɔ ko miiwó ehe nɔ yɛ nyɛnɔ, kɛ mɔ ko miigbala nyɛhiɛ ma lɛ, nyɛkpɛlɛ̃ɔ lɛ.

²¹ Miiwie kɛ hiɛgbele akɛ etamɔ nɔ ni wɔfee gbedee tsɔ̃. Shi nɔ mli ni mɔ ko feɔ ekãa yɛ lɛ, miiwie tamɔ kwashia, mi hu mifeɔ ekãa yɛ mli.

²² Hebribii ji amɛ? Mi hu eko ji mi. Israelbii ni? Mi hu eko ji mi. Abraham shwiei ni? Mi hu eko ji mi.

²³ Kristo sɔ̃ɔlɔi ji amɛ? Miiwie tamɔ mɔ ni yitsoŋ kãa lɛ. Mife amɛ yɛ tɔlɛ nitsumɔi ni tɛke nɔ amli, yɛ tsuŋwoi babaoi amli, yɛ yii ni fa tsɔ̃ amli, yɛ gbelei amli kpitiokpitio.

²⁴ Yudafoi yi mi shii enumɔ, eko fɛɛ eko lɛ, shwɛ ekome ni afee kpãi nyɔŋmai ejwɛ.

²⁵ Atswia mi kpãi shii etɛ̃, atswia mi tɛi shi kome, mikɛ lɛlɛ sha shi shii etɛ̃. Miye jenamɔ kɛ jetsɛremɔ yɛ bu kwɔŋkwɔŋ lɛ mli.

²⁶ Mifã gbɛ kpitiokpitio kɛ emli osharãi yɛ fai ahiɛ, emli osharãi yɛ ojotswalɔi adɛŋ, emli osharãi yɛ mijakubii adɛŋ, emli osharãi yɛ jeŋmajiaŋbii adɛŋ, emli osharãi yɛ maŋ, emli osharãi yɛ ŋa nɔ, emli osharãi yɛ ŋshɔ hiɛ, emli osharãi yɛ nyɛmimɛi shiwodudui lɛ ateŋ.

²⁷ Mitsu nii kɛ tɔlɛ, yɛ kpeshii amli kpitiokpitio, yɛ hɔ̃mɔ kɛ kumai mli, yɛ ŋmaahilɛi amli kpitiokpitio, yɛ fɛ̃i kɛ yayainyiɛmɔ mli.

²⁸ Nibii ni yɔɔ sɛɛ ayakã; shi nɔ ni haoɔ mi daa gbi ji asafoi lɛ fɛɛ ahe susumɔ.

²⁹ Namɔ gbedeɔ, ni mi lɛ migbedeee? Namɔ nane atɔ̃tɔ̃ɔ, ni mimli eshãaa mi?

³⁰ Kɛ ehe ehĩa akɛ mashwã kɛ̃lɛ, mashwã mafɔ̃ migbedemɔnii anɔ.

³¹ Nyɔŋmɔ ni ji wɔNuŋtsɔ Yesu Kristo Tsɛ, mɔ ni ajɔɔ lɛ kɛyashiɔ naanɔ lɛ, le akɛ mimaleee.

³² Yɛ Damasko lɛ, lumɔ ni yɔɔ maŋtsɛ Areta shishi lɛ hã bulɔi bu Damaskobii amaŋ lɛ he ni amɔ mi,

³³ ni ashiu mi yɛ kafu mli kɛtsɔ̃ samflɛ ni yɔɔ gbogbo lɛ mli kɛyi shi, ni mijo foi yɛ edɛŋ.