2 Korintobii 10 - ŊMALƐ KRƆŊKRƆŊ LƐ

Paulo miifã ebɔfo nitsumɔ lɛ he

¹ Shi mi Paulo diɛŋtsɛ miikpa nyɛ fai yɛ Kristo hejɔlɛ kɛ kpoofeemɔ lɛ hewɔ, mi ni akɛɛ kɛ miyɛ nyɛhiɛ lɛ mifeɔ mihe humi yɛ nyɛteŋ, shi kɛ mibɛ nyɛŋɔɔ lɛ, mijeɔ ekãa miwoɔ nyɛ lɛ.

² Shi miikpa nyɛ fai ni kɛ miba lɛ, nyɛkahã mikɛ hewalɛ ni mito akɛ mikɛbaawie lɛ miijie ekãa kpo mitsɔ̃ɔ mɛi ni susuɔ akɛ wɔtamɔ mɛi ni nyiɛɔ heloo naa lɛ.

³ Eyɛ mli akɛ gbɔmɛi adesai ji wɔ moŋ, shi wɔwuuu ta yɛ heloo naa.

⁴ Ejaakɛ wɔtawuunii lɛ jeee heloo mli nii ni, shi moŋ, yɛ Nyɔŋmɔ hiɛ lɛ, hewalɛnii ni akɛkumɔɔ mɔji ni yɔɔ hewalɛ ni,

⁵ ni wɔkumɔɔ jwɛŋmɔi kɛ he nɔ ni awoɔ ashiɔ Nyɔŋmɔ nilee lɛ, ni wɔŋɔɔ jwɛŋmɔ fɛɛ jwɛŋmɔ nom ni ebo Kristo toi,

⁶ ni wɔsaa wɔhe wɔto koni, kɛ nyɛtoiboo lɛ ye emuu lɛ, wɔgbala toigbele fɛɛ he toi.

⁷ Nyɛkwɛa nibii bɔ ni nyɛnaa amɛ lɛ. Kɛ mɔ ko heɔ yeɔ akɛ Kristo nɔ ji lɛ lɛ, esusu he ekoŋŋ, ejaakɛ tamɔ bɔ ni eji Kristo nɔ lɛ, nakai nɔŋŋ kɛ̃ wɔ hu wɔji Kristo nii.

⁸ Ejaakɛ kɛ shwãa po mashwã kɛtɛke nɔ yɛ wɔhegbɛ ni Nuŋtsɔ lɛ ehã wɔ ni wɔkɛhã nyɛnane amɔ shi ni jeee akɛ wɔkɛbutu nyɛ lɛ hewɔ lɛ, mihiɛ gboŋ,

⁹ koni mikafee akɛ mɔ ko ni woɔ nyɛhe gbeyei kɛ woji.

¹⁰ Ejaakɛ akɛɔ akɛ, woji lɛ amli saji tsii ni amɛmli wa moŋ, shi kɛ lɛ gbɔmɔ lɛ diɛŋtsɛ eyɛ biɛ lɛ, no lɛ ehe waaa ni ewiemɔ he bɛ sɛɛnamɔ.

¹¹ Nakai gbɔmɔ lɛ ana ale enɛ akɛ, bɔ ni wɔwiemɔ yɔɔ yɛ woji amli kɛ wɔbɛ jɛi lɛ, nakai nɔŋŋ kɛ̃ kɛ wɔyɛ jɛi lɛ wɔnifeemɔnii hu yɔɔ.

¹² Ejaakɛ wɔkaaa akɛ wɔɔbu wɔhe wɔshi mɛi komɛi ni jieɔ amɛhe yi lɛ anɔ, aloo akɛ wɔkɛ wɔhe aaato amɛhe. Amɛ lɛ, akɛni amɛkɛ amɛ diɛŋtsɛ amɛhe susuɔ amɛ diɛŋtsɛ amɛhe ni amɛkɛ amɛ diɛŋtsɛ amɛhe toɔ amɛ diɛŋtsɛ amɛhe hewɔ lɛ, amɛyooo sɛɛ.

¹³ Shi wɔ lɛ, wɔshwãŋ fe nine, shi moŋ wɔshwãa yɛ susumɔ kpãa ni Nyɔŋmɔ esusu ehã wɔ ni kɛlɛ shɛɔ nyɛ hu nyɛŋɔɔ lɛ naa.

¹⁴ Ejaakɛ wɔkpãaa wɔmli tsɔ tamɔ mɛi ni shɛɛɛ nyɛŋɔɔ, ejaakɛ wɔ klɛŋklɛŋ wɔkɛ Kristo he Sanekpakpa lɛ shɛ nyɛŋɔɔ;

¹⁵ wɔshwãaa fe nine yɛ mɛi krokomɛi anitsumɔi ahewɔ; shi wɔhiɛ kã nɔ akɛ kɛ nyɛhemɔkɛyeli lɛ shwere lɛ, wɔnitsɔ̃ɔmɔ lɛ mli baagbele kɛtɛke nɔ yɛ nyɛteŋ yɛ wɔsusumɔ kpãa lɛ naa,

¹⁶ koni wɔyajaje Sanekpakpa lɛ yɛ nyɛsɛɛgbɛ niiaŋ, ni wɔkashwã wɔfɔ̃ nii ni atsu momo yɛ mɔ kroko nɔ mli lɛ anɔ.

¹⁷ Shi mɔ ni shwãa lɛ, Nuŋtsɔ lɛ nɔ eshwã efɔ̃!

¹⁸ Ejaakɛ jeee mɔ ni jieɔ ehe yi lɛ ji mɔ ni sa, shi moŋ mɔ ni Nuŋtsɔ lɛ jieɔ eyi lɛ.