1 Samuel 9 - ŊMALƐ KRƆŊKRƆŊ LƐ

Saul kɛ Samuel

¹ Benyamin nuu niiatsɛ ko hi shi ni atsɛɔ lɛ Kish. Etsɛ gbɛi ji Abiel, Benyaminnyo Afia bi Bekorat bi Zeror lɛ bi ni.

² Kish nɛɛ yɛ binuu, oblanyo nɛɛ he yɛ fɛo yɛ Israelbii lɛ ateŋ; ni kɛjɛ ekɔŋ kɛtee ŋwɛi lɛ oblanyo lɛ kwɔ fe mɔ fɛɛ mɔ yɛ Israel.

³ Saul tsɛ Kish tejii laaje. Kɛkɛ ni Kish kɛɛ ebi Saul akɛ, “Ŋɔɔ tsuji lɛ ateŋ mɔ kome ofata ohe koni oya oyatao tejii lɛ.”

⁴ Saul kɛ tsulɔ lɛ yakpa Efraim gɔji lɛ anɔ kɛyaje Shalisha shikpɔŋ lɛ nɔ ni amɛmiitao kooloi lɛ, shi amɛnaaa amɛ. Amɛyakpa Shaalim shikpɔŋ lɛ nɔ, shi amɛnaaa amɛ; kɛkɛ ni amɛtee Benyamin shikpɔŋ lɛ hu nɔ; shi amɛnaaa tejii lɛ.

⁵ Be ni Saul kɛ tsulɔ lɛ yashɛ Zuf shikpɔŋ lɛ nɔ lɛ, Saul kɛɛ oblanyo ni fata ehe lɛ akɛ, “Hã wɔku wɔsɛɛ wɔya shĩa; kɛjeee nakai lɛ mitsɛ aaafɔ̃ɔ tejii lɛ ahe jwɛŋmɔ, ni etsui baaye yɛ wɔ moŋ wɔhe.”

⁶ Oblanyo lɛ kɛɛ Saul akɛ, “Ole? Nyɔŋmɔ gbɔmɔ ko yɛ maŋ nɛɛ mli ni abuɔ lɛ jogbaŋŋ diɛŋtsɛ, ni nɔ fɛɛ nɔ ni egbaa lɛ baa mli; hã wɔtee wɔyana lɛ; eko lɛ eeegba wɔ nyiɛmɔ ni wɔnyiɛ nɛɛ he nɔ ko.”

⁷ Saul kɛɛ oblanyo lɛ akɛ, “Mɛni nɛkɛ wɔhiɛ ni kɛ wɔtee ni wɔkɛbaayahã nuu lɛ? Aboloo ni yɔɔ wɔkotokui amli lɛ hu etã. Mɛni dɔŋŋ wɔhiɛ ni wɔkɛaatee wɔyake Nyɔŋmɔ gbalɔ lɛ?”

⁸ Oblanyo lɛ hã Saul hetoo ekɛɛ, “Mihiɛ jwiɛtɛi shekel mlijaa ejwɛ mli ekome yɛ biɛ; mikɛbaahã Nyɔŋmɔ gbalɔ lɛ koni etsɔ̃ɔ wɔ he ni wɔtsɔ̃.”

⁹ (Sa lɛ kɛji mɔ ko yaabi Nyɔŋmɔ nii lɛ, bɔ ni akɛɔ yɛ Israel ji “Wɔtee ninalɔ lɛ ŋɔɔ.” Ejaakɛ mɔ ni atsɛɔ lɛ gbalɔ ŋmɛnɛŋmɛnɛ lɛ sa lɛ ninalɔ atsɛɔ lɛ.)

¹⁰ Kɛkɛ ni Saul kɛɛ oblanyo lɛ akɛ, “Ojogbaŋŋ! Hã wɔtee.” Ni amɛyi mli kɛtee maŋ lɛ mli he ni Nyɔŋmɔ gbɔmɔ lɛ yɔɔ lɛ.

¹¹ Be ni amɛhereɔ ŋmeŋme lɛ kɛyaa maŋ lɛ mli lɛ, amɛkɛ oblayei komɛi kpe ni amɛmiiya amɛyayɛ nu, ni amɛbi amɛ akɛ, “Nyɛfai nɛ! Ninalɔ lɛ yɛ maŋ lɛ mli lo?”

¹² Amɛhere nɔ amɛkɛɛ, “Eyɛ. Naa, lɛ eyaa yɛ nyɛhiɛ nɔŋŋ nɛɛ. Nyɛhe afea oya. Amrɔ nɛɛ ebashɛ maŋ lɛ mli, ejaakɛ maŋbii lɛ miishã afɔle ŋmɛnɛ yɛ jamɔhe lɛ yɛ gɔŋ lɛ nɔ.

¹³ Maŋ lɛ mli botemɔ nɔŋŋ lɛ nyɛaana lɛ dani eya gɔŋ lɛ nɔ eyaye nii. Ja eyashɛ shi dani maŋbii lɛ baaye nii lɛ, ejaakɛ lɛ ebaajɔɔ niyenii lɛ nɔ dani mɛi ni akpee lɛ aye. Nyɛyaa oya, ejaakɛ be mli nɔŋŋ ni nyɛnine aaashɛ enɔ nɛ.”

¹⁴ No hewɔ lɛ, Saul kɛ etsulɔ lɛ yiŋ kɛtee maŋ lɛ mli. Be ni amɛboteɔ maŋ lɛ mli lɛ amɛna Samuel ni eeya jamɔhe grɔŋŋ lɛ. Ni amɛkɛ lɛ kpe.

¹⁵ Gbi ni enɔ jetsɛremɔ dani Saul ba maŋ lɛ mli lɛ, Yehowa ekɛɛ Samuel akɛ,

¹⁶ “Wɔ benɛ mli lɛ mibatsu nuu ko ni jɛ Benyamin akutso lɛ mli oŋɔɔ koni ofɔ lɛ mu, ni owo lɛ mimaŋ Israel maŋtsɛ. Lɛ ebaahere mimaŋbii lɛ yɛ Filistibii lɛ adɛŋ. Mina amɛnɔnaa lɛ, ni minu tsɛmɔ ni amɛtsɛɔ koni ahere amɛ lɛ.”

¹⁷ Be ni Samuel na Saul lɛ Yehowa kɛɛ Samuel akɛ “Mɔ he ni mi kɛ bo wie lɛ nɛ. Mɔnɛ ji mɔ ni baaye mimaŋ lɛ nɔ lɛ.”

¹⁸ Saul kɛ Samuel kpe yɛ maŋ lɛ agbo lɛ naa, kɛkɛ ni Saul kɛɛ lɛ akɛ, “Ofainɛ ni otsɔ̃ɔ mi ninalɔ lɛ shĩa lɛ.”

¹⁹ Samuel here Saul nɔ ni ekɛɛ, “Mi ni. Tsɔ̃ mihiɛ kɛya gɔŋ lɛ nɔ, ejaakɛ nyɛkɛ mi baaye nii ŋmɛnɛ; wɔ leebi lɛ mawo bo gbɛ, ni magba bo nɔ fɛɛ nɔ ni gbaa ojwɛŋmɔ naa lɛ.

²⁰ Kɛ ka nyɛtejii lɛ ni laaje ŋmɛnɛ ji gbii etɛ̃ lɛ ahewɔ lɛ, kaaye otsui, ejaakɛ ana amɛ. Namɔ ole ni Israel shweɔ amrɔ nɛɛ fe bo kɛ otsɛ we lɛ fɛɛ?”

²¹ Saul here nɔ ni ekɛɛ, “Benyaminnyo ji mi, no hewɔ lɛ, mijɛ Israel akutsei lɛ ateŋ bibioo fe fɛɛ lɛ mli; ni Benyamin akutso lɛ mli wekui lɛ ateŋ humi fe fɛɛ mli mijɛ? Te feɔ tɛŋŋ ni okɛɔ mi enɛ nɛɛ lɛ?”

²² Saul nyiɛ Samuel kɛ etsulɔ lɛ hiɛ kɛtee niyelihe asa lɛ nɔ, ni ehã amɛyatara mɛi aaashɛ nyɔŋmai etɛ̃ ni akpee amɛ niyeli lɛ ayitso.

²³ Kɛkɛ ni ekɛɛ nihoolɔ lɛ akɛ, “Loo lɛ ni mikɛhã bo shitoo ni mikɛɛ bo akɛ okɛto afã lɛ, kɛba.”

²⁴ Nihoolɔ lɛ yawo loo shuɔ lɛ kɛba ni ekɛbama Saul hiɛ. Ni Samuel kɛɛ Saul akɛ, “Nɔ ni akɛsara osɛɛ nɛ. Ye, ejaakɛ bo ohewɔ akɛto koni kɛ ŋmɛlɛtswaa lɛ shɛ lɛ okɛ mɛi ni akpee lɛ afutu aye nii.” No hewɔ lɛ, Saul kɛ Samuel ye nii nakai gbi lɛ.

²⁵ Be ni amɛshi gɔŋ lɛ nɔ amɛkpeleke shi kɛba maŋ lɛ mli lɛ, afee saa yɛ shĩa lɛ yiteŋ ahã Saul, ni ekã jɛi ewɔ.

²⁶ Enɔ maŋkɛ mra be ni je bɔ̃i tsɛremɔ lɛ, Samuel tsɛ Saul yɛ shĩa lɛ yiteŋ ekɛɛ, “Tee shi ni oba koni mawo bo gbɛ ni oya.” Saul te shi, ni lɛ kɛ Samuel fɛɛ je kpo amɛyi tɛmpɔŋ lɛ nɔ.

²⁷ Be ni amɛbɛŋkɛɔ maŋ lɛ klotia lɛ Samuel kɛɛ Saul akɛ, “Kɛɛmɔ tsulɔ lɛ koni ebaho eyi wɔhiɛ koni ekitee. Kɛji eyi hiɛ ni eekitee lɛ, bo lɛ owa ni omɛ shrao koni magba bo nɔ ni Nyɔŋmɔ yɔɔ bo kɛɛmɔ.”