1 Samuel 8 - ŊMALƐ KRƆŊKRƆŊ LƐ

Israelbii bi akɛ ahã amɛ Maŋtsɛ

¹ Be ni Samuel gbɔ lɛ ewo ebihii lɛ kojolɔi ni amɛkojoɔ maŋbii lɛ ateŋ saji yɛ Israel.

² Ekromɔbi ni gbɛi ji Yoel lɛ, kɛ lɛ esɛɛho ni gbɛi ji Abia lɛ ji nɔyelɔi ni ekɛto Beersheba.

³ Shi Samuel bihii lɛ eyakɔɔɔ amɛtsɛ jeŋba kwraa. Amɛyadi ninamɔ sɛɛ ni amɛhehee nyɔɔŋnii, ni amɛtsɔ̃mɔ saji ahiɛ amɛbumɔ shi.

⁴ Enɛ hã Israel maŋ onukpai lɛ fɛɛ bua amɛhe naa, ni amɛba Samuel ŋɔɔ yɛ Rama,

⁵ ni amɛbakɛɛ lɛ akɛ, “Amrɔ nɛɛ ogbɔ, ni obihii lɛ eyakɔɔɔ ojeŋba. No hewɔ lɛ, wo maŋtsɛ ohã wɔ koni lɛ ekwɛ wɔnɔ tamɔ eyɔɔ yɛ majimaji krokomɛi fɛɛ anɔ lɛ.”

⁶ Sane lɛ eyaŋɔɔɔ Samuel naa akɛ amɛaakɛɛ akɛ, “Hã wɔ maŋtsɛ ni ekwɛ wɔnɔ lɛ.” No hewɔ lɛ, Samuel sɔle etsɛ Yehowa,

⁷ ni Yehowa kɛɛ Samuel akɛ, “Nibii fɛɛ ni maŋbii lɛ kɛɔ bo lɛ, feemɔ ohã amɛ; ejaakɛ jeee bo amɛkwa; shi mi moŋ amɛkwa akɛ mikaye amɛnɔ dɔŋŋ lɛ.

⁸ Bɔ pɛ ni amɛfee mi kɛjɛ gbi nɔ ni mijie amɛ kɛje Ijipt aahu kɛbashi ŋmɛnɛ gbi nɛɛ, ni amɛkwa mi ni amɛyasɔmɔ nyɔŋmɔi krokomɛi lɛ, nakai nɔŋŋ amɛfeɔ bo hu nɛɛ.

⁹ No hewɔ lɛ, bo amɛ toi; shi kɛ̃lɛ gba mli kpoo okɛɛ amɛ, ni otsɔ̃ɔ amɛ nibii ni mɔ ni baaye amɛnɔ maŋtsɛ lɛ baatao yɛ amɛdɛŋ.”

¹⁰ Samuel gba maŋbii ni biɔ lɛ koni ewo maŋtsɛ ehã amɛ lɛ nɔ ni Yehowa wie lɛ fɛɛ.

¹¹ Ekɛɛ amɛ akɛ “Bɔ ni maŋtsɛ lɛ ni baaye nyɛnɔ lɛ kɛ nyɛ baaye ehã nɛ: Ebaaŋɔ nyɛbihii lɛ, ni ebaahã amɛteŋ mɛi komɛi ahi eshwiilii ahe, ni mɛi komɛi akwɛ ekpɔŋɔi, ni mɛi komɛi ajojoo foi kɛnyiɛ eshwiilii ahiɛ.

¹² Ebaawo mɛi komɛi asafoiatsɛmɛi ehã mɛi akpekpei kui kɛ mɛi nyɔŋmai enumɔenumɔ kui ehã ehe. Ebaahã mɛi komɛi ahu eŋmɔji amɛhã lɛ, ni mɛi komɛi hu akpa eŋmɔshinii, ni mɛi komɛi atswia etawuunii kɛ eshwiilii ahe nii.

¹³ Nyɛbiyei lɛ agbɛfaŋ lɛ, ebaafee mɛi komɛi tsofakɛŋma futulɔi, kɛ mɛi komɛi nihoolɔi kɛ mɛi komɛi hu aboloo shãlɔi.

¹⁴ Ebaashɔ̃shɔ̃ɔ nyɛŋmɔji kɛ nyɛwain abɔi kpakpai kɛ nyɛmutsei ni hi fe fɛɛ lɛ, ni ekɛbaahã etsuji.

¹⁵ Kɛji nyɛkpa ŋmɔshi ŋmãa kɛ nyɛwain abɔi amli nii lɛ hu, ebaaŋɔ amɛmlijaa nyɔŋma mli ekome ni ekɛbaahã epiafoi kɛ etsuji.

¹⁶ Ebaashɔ̃ nyɛwehii kɛ nyɛweyei kɛ nyɛblahii fɛɛfɛji kɛ nyɛtsinai kɛ nyɛteji kpakpai ni hi fe fɛɛ lɛ koni amɛyatsu lɛ enii amɛhã lɛ.

¹⁷ Ebaaŋɔ nyɛtooi amlijaa nyɔŋma mli ekome ehã ehe, ni nyɛaatsɔ̃mɔ enyɔji.

¹⁸ Nakai be lɛ mli lɛ, nyɛbaafo shi Yehowa efoŋ nyɛdaaŋ.”

¹⁹ Shi kɛ̃lɛ maŋbii lɛ ekpɛlɛ̃ɛɛ Samuel toiboo, ni amɛkɛɛ, “Wɔnu; shi fɛɛ sɛɛ lɛ ja wɔna maŋtsɛ ni eye wɔnɔ kɛ̃,

²⁰ koni wɔ hu wɔtamɔ majimaji fɛɛ akɛ wɔyɛ maŋtsɛ, ni lɛ ekwɛɔ wɔnɔ, koni asaŋ kɛ ta ba lɛ enyiɛ wɔhiɛ kɛ wu tai lɛ ehã wɔ.”

²¹ Be ni Samuel nu hetoo ni maŋbii lɛ hã lɛ ejaje etsɔ̃ɔ Yehowa.

²² Ni Yehowa kɛɛ Samuel akɛ, “Bo amɛ toi, ni owo maŋtsɛ ohã amɛ.” Samuel kɛɛ Israel hii lɛ agbɛnɛ akɛ, “Ojogbaŋŋ! Mɔ fɛɛ mɔ aya lɛ diɛŋtsɛ emaŋ.”