1 Samuel 6 - ŊMALƐ KRƆŊKRƆŊ LƐ

Akpale Kpãŋmɔ Adeka lɛ kɛba

¹ Yehowa Kpãŋmɔ Adeka lɛ ye nyɔji kpawo yɛ Filistibii lɛ aŋɔɔ.

² Kɛkɛ ni Filistibii lɛ kpee amɛsɔfoi kɛ mɛi ni feɔ nii ni amɛgbaa lɛ, ni amɛbi amɛ akɛ, “Te wɔfee Yehowa Kpãŋmɔ Adeka lɛ tɛŋŋ? Nyɛtsɔa wɔ nɔ ni sa akɛ wɔkɛfata adeka lɛ he ni wɔkɛku sɛɛ kɛya he ni ejɛ.”

³ Osɔfoi lɛ to he akɛ, “Kɛji nyɛmiikpale Israel Nyɔŋmɔ lɛ Kpãŋmɔ Adeka lɛ kɛya lɛ, nyɛkahãa akɛ adeka lɛ miiyaa efolo. Ja nyɛkɛ afɔle fata he kɛtee nyɛyahã Israel Nyɔŋmɔ lɛ akɛ nyɛye sɔ̃; no dani nyɛhe aaatã, ni asaŋ nyɛaale nɔ hewɔ ni ekpako nyɛ piŋmɔ lɛ.”

⁴ Maŋbii lɛ bi akɛ, “Mɛni ji sɔ̃yeli afɔle ni wɔkɛyahã lɛ?” Osɔfoi lɛ jie naa akɛ, “Abua ni fũufuu nyɛ lɛ henɔ nibii enumɔ ni akɛ shika fee, kɛ kwakwei hu enumɔ ni akɛ shika fee yɛ Filistibii amaŋtsɛmɛi lɛ ayikulɛ naa, ejaakɛ hela kometoo lɛ nɔŋŋ ye nyɛ kɛ nyɛmaŋtsɛmɛi lɛ fɛɛ lɛ.

⁵ No hewɔ lɛ, nyɛfea abua ni fũufuu nyɛ lɛ henɔ kɛ kwakwei ni bafite nyɛshikpɔŋ lɛ nɔ lɛ henɔ okadii, asaŋ nyɛwoa Israel Nyɔŋmɔ lɛ. Eko lɛ eeegbɔjɔ piŋmɔ lɛ mli ehã nyɛ kɛ nyɛjemawɔji lɛ kɛ nyɛshikpɔŋ lɛ hu.

⁶ Mɛni hewɔ esa akɛ nyɛkpliŋ nyɛtsui tamɔ Ijiptbii lɛ kɛ amɛmaŋtsɛ lɛ fee lɛ? Kwɛ, be ni ehã amɛna amɛnii ni amɛleee sɛɛ lɛ, bɛ amɛŋmɛɛ Israelbii lɛ ahe ni amɛtee?

⁷ No hewɔ lɛ, nyɛfea shwiili hee; nyɛmɔa tsinayei enyɔ ni aaye amɛ fufɔ lolo, asaŋ ni apã eyako amɛkuɛ dã, ni nyɛfimɔa amɛ nyɛwo shwiili lɛ naa. Amɔmɔ tsinabii lɛ yɛ amɛnyɛmɛi lɛ ahe kɛya shĩa.

⁸ No sɛɛ lɛ, awo Yehowa Kpãŋmɔ Adeka lɛ ama shwiili lɛ nɔ. Ato shika nibii ni akɛyaahã Yehowa akɛ sɔ̃yeli he afɔle lɛ awo adeka fioo mli, ni akɛma Kpãŋmɔ Adeka lɛ masɛi, ni nyɛjie lɛ gbɛ ni eya.

⁹ Nyɛkwɛa eyisɛɛ. Kɛji adeka lɛ wo ehiɛ ema lɛ diɛŋtsɛ eshikpɔŋ lɛ nɔ gbɛ kɛtee Bet-Shemesh lɛ, no tsɔ̃ɔ akɛ Israel Nyɔŋmɔ lɛ ji mɔ ni ye wɔ awui kpeteŋkple nɛɛ lɛ; shi kɛji shwiili lɛ eyaaa jɛi lɛ belɛ wɔna wɔle akɛ jeee Yehowa piŋ wɔ lɛ, shi osharã ko kɛkɛ ni basharã wɔ.”

¹⁰ Amɛfee bɔ ni akɛɛ amɛ lɛ. Amɛmɔmɔ tsinayei enyɔ ni aaye amɛfufɔ lolo, ni amɛfimɔ amɛ amɛwo shwiili lɛ naa, ni amɛŋa amɛbii lɛ ayi yɛ shĩa.

¹¹ Amɛwo Yehowa Kpãŋmɔ Adeka lɛ amɛma shwiili lɛ nɔ ni amɛwo adeka lɛ ni amɛto shika kwakwei lɛ kɛ shika abua lɛ amɛwo mli lɛ hu amɛma shwiili lɛ nɔ.

¹² Tsinai lɛ yi tɛmpɔŋ lɛ nɔ, ni amɛwo amɛyi amɛma Bet-Shemesh tɔ̃ɔ. Be ni amɛyaa nɛɛ fɛɛ lɛ belɛ tsinai lɛ miibolɔ. Amɛgbaaa ninejurɔ lɛ, amɛgbaaa abɛku hu. Filistibii alumɛi lɛ nyiɛ Kpãŋmɔ Adeka lɛ kɛ tsinai lɛ kɛ shwiili lɛ sɛɛ aahu kɛyashɛ Bet-Shemesh husu lɛ nɔ.

¹³ Bet-Shemeshbii miiku ŋmãa nɛkɛ be mli yɛ gɔji ateŋ jɔɔ lɛ mli. Be ni amɛyaawo amɛhiɛ nɔ lɛ, naa Kpãŋmɔ Adeka lɛ; amɛnya jogbaŋŋ diɛŋtsɛ.

¹⁴ Shwiili lɛ babote Yoshua ni jɛ Bet-Shemesh lɛ ŋmɔshi, ni ebawa yɛ tɛ wulu ko ni yɔɔ jɛi lɛ masɛi. Ŋmɔ lɛ shi bii lɛ gbala shwiili lɛ tsei lɛ amli ni amɛkɛ tsinai lɛ shã shãafɔle amɛhã Yehowa.

¹⁵ Levibii ni yɔɔ jɛi lɛ wo Yehowa Kpãŋmɔ Adeka lɛ kɛ adeka ni ma emasɛi ni shika nibii lɛ yɔɔ mli lɛ hu, ni amɛkɛmamɔ tɛ wulu lɛ nɔ. Bet-Shemeshbii lɛ shãshãa afɔlei, ni amɛgbegbee kooloi hu amɛkɛshã afɔlei amɛkɛhã Yehowa nakai gbi lɛ.

¹⁶ Filistibii amaŋtsɛmɛi enumɔ lɛ na nɔ ni afee lɛ, ni amɛku amɛsɛɛ amɛtee Ekron nakai gbi lɛ nɔŋŋ.

¹⁷ Abua ni fuufuu Filistibii lɛ henɔ shika nii ni Filistibii lɛ fee lɛ, bɔ ni amɛkɛyahã Yehowa akɛ amɛsɔ̃yeli he afɔle yɛ maji lɛ agbɛii amli nɛ: Ashdod nɔ ekome, kɛ Gaza nɔ ekome, kɛ Ashkelon nɔ ekome.

¹⁸ Nakai nɔŋŋ akɛ shika kwakwei lɛ hu yahã yɛ Filistibii lɛ amaji fɛɛ ni yɔɔ maŋtsɛmɛi enumɔ lɛ ashishi lɛ ayikulɛ naa. Maji ni atswa gbogbo awo amɛhe kɛ akrowai fɛɛ shi nɔ. Tɛ kpeteŋkple lɛ ni akɛ Yehowa Kpãŋmɔ Adeka lɛ ma nɔ yɛ Yoshua, Bet-Shemeshnyo lɛ ŋmɔ lɛ mli lɛ yɛ jɛi eeye sane nɛɛ he odase kɛbashi ŋmɛnɛ.

¹⁹ Yehowa gbe Bet-Shemeshbii lɛ ateŋ mɛi nyɔŋmai kpawo komɛi, ejaakɛ amɛkɛ amɛhiŋmɛii yakwɛ Kpãŋmɔ Adeka lɛ mli. Enɛ hã maŋtso muu lɛ fɛɛ ye awerɛho ejaakɛ Yehowa eplenee mɛi babaoo.

Kpãŋmɔ Adeka lɛ yɛ Kiriat Yearim

²⁰ Sane nɛɛ hã BetShemeshbii lɛ kɛɛ akɛ; “Namɔ po aaanyɛ Yehowa Nyɔŋmɔ krɔŋkrɔŋ nɛɛ hiɛ adamɔ? Ni kɛ adeka lɛ jɛ wɔŋɔɔ lɛ, namɛi aŋɔɔ po eeeya?”

²¹ Kɛkɛ ni Bet-Shemeshbii lɛ tsu bɔfoi kɛtee Kiriat-Yearimbii lɛ aŋɔɔ, ni amɛyakɛɛ amɛ akɛ, “Naa, Filistibii lɛ ekpale Yehowa Kpãŋmɔ Adeka lɛ amɛkɛbahã wɔ. Nyɛbaŋɔa kɛyaa.”