1 Samuel 5 - ŊMALƐ KRƆŊKRƆŊ LƐ

Kpãŋmɔ Adeka lɛ yɛ Filistibii lɛ adɛŋ

¹ Be ni Filistibii lɛ shɔ̃ Nyɔŋmɔ Kpãŋmɔ Adeka lɛ, amɛwo kɛjɛ Ebenezer kɛtee Ashdod,

² ni amɛkɛtee nyɔŋmɔ ni amɛyɔɔ ni egbɛi ji Dagon lɛ we lɛ, ni amɛkɛyama Dagon amãgã lɛ masɛi.

³ Enɔ jetsɛremɔ leebi maŋkpa be ni Ashdodbii te shi lɛ, naa, Dagon amãgã lɛ ni ekpa egbee shi, ni ehiɛ bu shikpɔŋ yɛ Yehowa Kpãŋmɔ Adeka lɛ hiɛ. No hewɔ lɛ, Ashdodbii lɛ wo Dagon amãgã lɛ nɔ, ni amɛkɛ lɛ ma emaahe lɛ ekoŋŋ.

⁴ Shi enɔ jetsɛremɔ leebi maaŋkpa be ni Ashdodbii lɛ te shi ekoŋŋ lɛ, naa, Dagon ekpa egbee shi ekoŋŋ, ni ehiɛ bu shikpɔŋ yɛ Yehowa Kpãŋmɔ Adeka lɛ hiɛ. Eyitso kɛ eniji enyɔ lɛ fɛɛ hu etserɛ yɛ ehe, ni amɛjwere kpoku lɛ nɔ. Dagon amãgã kuku lɛ kɛkɛ eshwɛ.

⁵ Enɛ hewɔ ni Dagon wulɔmɛi, kɛ mɔ fɛɛ mɔ hu ni boteɔ Dagon we lɛ, enaaa Dagon kpoku lɛ nɔ yɛ Ashdod kɛbashi ŋmɛnɛ lɛ.

⁶ Yehowa piŋ Ashdodbii lɛ waa diɛŋtsɛ. Ehã abua fuufuu amɛ, ni gbeyei mɔmɔ amɛ yɛ Ashdod maŋ lɛ mli diɛŋtsɛ, kɛ ekpokpai anɔ fɛɛ.

⁷ Be ni Ashdod hii lɛ na nɔ ni eba lɛ, amɛkɛɛ akɛ, “Akahã Israel Nyɔŋmɔ lɛ Kpãŋmɔ Adeka lɛ miihi wɔŋɔɔ dɔŋŋ, ejaakɛ Israel Nyɔŋmɔ lɛ kɛ wɔ kɛ wɔnyɔŋmɔ Dagon fɛɛ miiye kɛ joomɔ.”

⁸ No hewɔ lɛ, amɛtsu ni ayakpee Filistibii lɛ alumɛi lɛ fɛɛ kɛba, ni amɛbi amɛ akɛ, “Te wɔfee Israel Nyɔŋmɔ lɛ Kpãŋmɔ Adeka lɛ tɛŋŋ?” Lumɛi lɛ kɛɛ amɛ akɛ, “Awo Israel Nyɔŋmɔ lɛ Kpãŋmɔ Adeka lɛ kɛba Gat.” No hewɔ lɛ, awo Israel Nyɔŋmɔ lɛ Kpãŋmɔ Adeka lɛ kɛtee Gat.

⁹ Be ni akɛ Kpãŋmɔ Adeka lɛ eyashɛ Gat sɛɛ lɛ, Yehowa kɛ abua piŋ maŋ lɛ mli mɛi bibii kɛ mɛi wuji fɛɛ, ni ekɛgbala Gatbii atoi, ni enɛ hã amɛ jijaa.

¹⁰ No hewɔ lɛ, amɛhã awo Nyɔŋmɔ Kpãŋmɔ Adeka lɛ kɛtee Ekron. Shi be ni akɛ Nyɔŋmɔ Kpãŋmɔ Adeka lɛ yashɛ jɛi lɛ, Ekronbii lɛ bolɔ amɛkɛɛ, “Naa, akɛ Israel Nyɔŋmɔ lɛ Kpãŋmɔ Adeka lɛ eba wɔŋɔɔ koni ebagbe wɔ kɛ wɔbii.”

¹¹ No hewɔ lɛ, amɛtsu ni ayakpee Filistibii lɛ alumɛi lɛ fɛɛ kɛbakpe, ni amɛkɛɛ amɛ akɛ, “Nyɛhãa akɛ Israel Nyɔŋmɔ lɛ Kpãŋmɔ Adeka lɛ akua sɛɛ kɛyaa he ni ejɛ koni ekabagbe wɔ kɛ wɔbii.” Maŋ muu lɛ fɛɛ ejijaa ni yɛ gbeyei; ejaakɛ Nyɔŋmɔ kɛ amɛ miiye kɛ joomɔ ni naa wa yɛ jɛi.

¹² Mɛi ni gboiii lɛ abua fuufuu amɛ, ni maŋ lɛ bolɔ waa amɛtsɛ akɛ ahere amɛ.