1 Samuel 31 - ŊMALƐ KRƆŊKRƆŊ LƐ

Saul kɛ ebihii lɛ agbele

¹ Filistibii lɛ kɛ Israelbii lɛ wu ta, ni Filistibii lɛ anine tsɔ̃ Israelbii lɛ anɔ, ni amɛgbe Israelbii lɛ amɛshwie Gilboa Gɔŋ lɛ nɔ.

² Filistibii lɛ nyiɛ Saul kɛ ebihii lɛ asɛɛ waa. Amɛnine shɛ Saul bihii Yonatan kɛ Abinadab kɛ Malkishua nɔ, ni amɛgbe amɛ.

³ Akɛ ta lɛ nina Saul kpaakpa. Henyɛlɔi lɛ ateŋ gãitsɛ̃lɔi lɛ na Saul, ni amɛtsɛ̃ lɛ gãi, ni apila lɛ ablaŋ.

⁴ Kɛkɛ ni Saul kɛɛ oblanyo ni hiɛɔ etawuunii lɛ akɛ, “Gbalamɔ oklante lɛ, ni okɛdu mi bɔ ni afee ni foolɔi nɛɛ akaba amɛbagbe mi, ni amɛfee mi niseniianii.” Shi oblanyo lɛ emiii nakai feemɔ ejaakɛ gbeyei emɔ lɛ naakpa. Enɛ hewɔ lɛ, Saul gbala lɛ diɛŋtsɛ eklante lɛ, ni eho egbee nɔ.

⁵ Be ni oblanyo lɛ na akɛ Saul egbo lɛ, lɛ hu eho egbee eklante lɛ nɔ, ni ekɛ Saul fɛɛ gbo.

⁶ Bɔ ni Saul kɛ ebihii etɛ̃ lɛ kɛ oblanyo ni hiɛɔ Saul tawuunii lɛ kɛ Saul he gbɔmɛi fɛɛ gboi shi kome yɛ nakai gbi lɛ nɔ nɛ.

⁷ Be ni Israelbii ni yɔɔ Yezreel Jɔɔ lɛ sɛɛ kɛ mɛi hu ni yɔɔ Yordan bokãgbɛ lɛ na akɛ, Israelbii lɛ ejo foi yɛ Filistibii lɛ ahiɛ, ni asaŋ Saul kɛ ebihii etɛ̃ lɛ egboi lɛ, amɛjojoo foi amɛshishii amɛmaji amɛshwie shi, ni Filistibii lɛ baŋɔ maji lɛ ni amɛhi mli.

⁸ Enɔ jetsɛremɔ be ni Filistibii lɛ ba ta lɛ mli gbohii lɛ ahe nii kpɔlɔmɔ lɛ, naa Saul kɛ ebihii etɛ̃ lɛ ni amɛnyɔnyɔi yɛ Gilboa Gɔŋ lɛ nɔ.

⁹ Amɛfo Saul yi, ni amɛkpɔlɔ ehenii yɛ ehe, ni atsu bɔfoi koni amɛyakpa Filistibii ashikpɔŋ lɛ nɔ kpula, ni amɛyashiɛ ta lɛ mli sane kɛ ŋɔɔmɔ lɛ yɛ amɛjemawɔji fɛɛ anaa, kɛ maŋbii hu.

¹⁰ Filistibii lɛ kɛ Saul tawuunii lɛ tee yato jemawɔŋ Astarte we lɛ, ni egbonyo lɛ amɛkɛyatsotsoro Bet-Shan maŋ lɛ gbogbo lɛ he.

¹¹ Shi be ni Yabeshbii ni yɔɔ Gilead lɛ nu bɔ ni Filistibii lɛ efee Saul lɛ,

¹² maŋ lɛ mli hii kãkãlɔi lɛ fɛɛ te shi, ni amɛnyiɛ nyɔɔŋnyɔɔŋ fɛɛ kɛtee, ni amɛyajie Saul gbonyo lɛ kɛ ebihii lɛ hu agbohii lɛ yɛ Bet-Shan gbogbo lɛ he, ni amɛkɛba Yebesh amɛbashã.

¹³ Amɛloo gbohii lɛ awui lɛ, ni amɛfu yɛ tso ko ni atsɛɔ lɛ tamariske tso ni yɔɔ Yabesh lɛ shishi, ni maŋ lɛ hi ŋmaa gbii kpawo.