1 Samuel 3 - ŊMALƐ KRƆŊKRƆŊ LƐ

Yehowa jie ehe kpo etsɔ̃ɔ Samuel

¹ Oblanyo fioo, Samuel, lɛ sɔmɔɔ Yehowa yɛ Eli shishi. Nɛkɛ be mli lɛ Yehowa diɛŋtsɛ daaŋwiemɔ he efɔɔɔ kaa; asaŋ afɔɔɔ ninaa hu namɔ.

² Gbi ko lɛ Eli kã shi yɛ ewɔɔhe lɛ; no mli lɛ ehiŋmɛii anɔ ebɔ̃i haa, ni no hewɔ lɛ, enaaa nii jogbaŋŋ;

³ ni Yehowa kane lɛ ma nɔ lolo ni enako egbo, ni Samuel hu kã shi yɛ Yehowa Sɔlemɔtsu lɛ mli he ni Nyɔŋmɔ Kpãŋmɔ Adeka lɛ yɔɔ lɛ.

⁴ Kɛkɛ ni Yehowa tsɛ Samuel ekɛɛ, “Samuel! Samuel!” Ehere nɔ akɛ, “Minuŋtsɔ, Naa mi!”

⁵ Samuel sha foi kɛtee Eli ŋɔɔ eyakɛɛ lɛ akɛ, “Ofainɛ, naa mi; minu akɛ ootsɛ mi.” Shi Eli kɛɛ Samuel akɛ, “Mitsɛko bo, mibi; kuu osɛɛ ni oyakã shi.” No hewɔ lɛ, Samuel tee ni eyakã shi.

⁶ Yehowa saa tsɛ lɛ ekoŋŋ ekɛɛ, “Samuel!” Samuel te shi ni etee Eli ŋɔɔ eyakɛɛ lɛ akɛ, “Ofainɛ, naa mi; minu akɛ ootsɛ mi.” Eli kɛɛ lɛ akɛ, “Mitsɛko bo, mibi; kuu osɛɛ ni oyakã shi ekoŋŋ.”

⁷ Nɛkɛ be mli lɛ Samuel nako ale Yehowa ni asaŋ Yehowa kɛ lɛ ewieko dã.

⁸ Yehowa saa etsɛ Samuel nɔ ni tĩa shii etɛ̃; ni Samuel te shi etee Eli ŋɔɔ eyakɛɛ lɛ akɛ, “Ofainɛ, naa mi, minu akɛ ootsɛ mi.” Kɛkɛ ni Eli bayoo sɛɛ agbɛnɛ akɛ Yehowa ni tsɛɔ oblanyo fioo lɛ lɛ.

⁹ No hewɔ lɛ, ekɛɛ Samuel akɛ, “Yaakã shi; kɛji atsɛ bo ekoŋŋ lɛ, heremɔ nɔ akɛ, ‘Wiemɔ Yehowa, shi mi, otsulɔ, miibo bo toi!’ ” Kɛkɛ ni Samuel tee eyakã shi yɛ ewɔɔhe lɛ.

¹⁰ Yehowa ba ni ebadamɔ shi, ni etsɛ lɛ tamɔ tsuutsu lɛ akɛ, “Samuel! Samuel!” Samuel here nɔ akɛ, “Wiemɔ, shi otsulɔ miibo toi.”

¹¹ Yehowa kɛɛ Samuel akɛ, “Naa, mibafee nɔ titri ko yɛ Israel, ni mɔ fɛɛ mɔ ni aaanu he lɛ he aajɔ̃ ehe.

¹² Ejaakɛ nakai gbi lɛ mahã nibii fɛɛ ni miwie yɛ Eli we lɛ he lɛ aba mli kɛjɛ shishijee kɛyashi naagbee.

¹³ Mikɛɛ lɛ mito akɛ mibagbala ewe lɛ toi kɛya naanɔ yɛ nɔ sha ni ele lɛ hewɔ, ejaakɛ ebihii lɛ bɔ musu amɛshi mi, Nyɔŋmɔ, shi etutuuu ehiɛ ewooo amɛ.

¹⁴ No hewɔ lɛ, mikã Eli we lɛ he kitã akɛ kɛji akɛ gbee afɔle loo niyenii afɔle ko aaakpãta Eli we lɛ nɔ sha lɛ kɛyashi naanɔ fĩi.”

¹⁵ Kɛkɛ ni Samuel ho ekã shi kɛyashi je tsɛre ni egbele Yehowa we lɛ shinai lɛ. Samuel she he gbeyei akɛ eeegba Eli ninaa lɛ.

¹⁶ Shi Eli tsɛ Samuel ni ekɛɛ lɛ akɛ, “Mibi Samuel,” Ehere nɔ akɛ, “Naa mi.”

¹⁷ Eli kɛɛ lɛ akɛ, “Mɛni Yehowa kɛɛ bo lɛ? Kaashiu mi nɔ. Kɛji oshiu mi wiemɔi fɛɛ ni ekɛ bo wie lɛ eko nɔ lɛ, Yehowa baagbala otoi yɛ no hewɔ.”

¹⁸ Kɛkɛ ni Samuel gba Eli nɔ fɛɛ nɔ ni eshiuuu lɛ sane lɛ eko nɔ. Kɛkɛ ni Eli to he ekɛɛ, “Lɛ ji Yehowa, nɔ ni hi yɛ lɛ ehiɛ lɛ efee!”

¹⁹ Samuel bada, ni Yehowa kɛ lɛ yɛ, ni ehãaa Samuel naa wiemɔ ko afee yaka.

²⁰ No hewɔ lɛ, gbɔmɛi ni yɔɔ Israel shikpɔŋ lɛ nɔ fɛɛ, kɛjɛ Dan aahu kɛyashwie Beersheba, na le akɛ Samuel lɛ Yehowa gbalɔ anɔkwafo ni.

²¹ Yehowa kã he etsɔ̃ɔ ewiemɔ lɛ nɔ ejieɔ ehe kpo etsɔ̃ɔ Samuel yɛ Shilo. Ni kɛji Samuel wie lɛ, Israel fɛɛ boɔ lɛ toi.