1 Samuel 29 - ŊMALƐ KRƆŊKRƆŊ LƐ

Filistibii lɛ kwa David

¹ Filistibii lɛ bua amɛtai lɛ anaa yɛ Afek. Nakai be mli nɔŋŋ lɛ Israelbii lɛ hu ebabua amɛhe naa yɛ nubu ko ni yɔɔ Yezreel lɛ masɛi.

² Be ni Filistibii lɛ alumɛi lɛ to kɛho kɛ amɛtabilɔi ohahai kɛ akpekpei lɛ, ana David hu kɛ ewebii lɛ shi Akish tabilɔi lɛ anɔ. Amɛnyiɛ asafoiasafoi lɛ fɛɛ asɛɛ.

³ Enɛ hã Filistibii lɛ atatsɛmɛi lɛ bi akɛ, “Mɛni nɛkɛ Hebribii nɛɛ feɔ yɛ biɛ?” Akish hã Filistibii atatsɛmɛi lɛ hetoo akɛ, “Israel maŋtsɛ Saul tsulɔ David lɛ nɛ; ni afii abɔ nɛɛ fɛɛ lɛ ekɛ mi yɔɔ. Kɛjɛ ni eshi Saul kɛbaje miŋɔɔ aahu kɛbashi ŋmɛnɛ lɛ minako tɔ̃mɔ ko kwraa yɛ ehe.”

⁴ Shi Filistibii atatsɛmɛi lɛ amli fu Akish naakpa, ni amɛkɛɛ lɛ akɛ, “Wo lɛ gbɛ, ni ohã eku esɛɛ eya maŋ ni ohã lɛ ni eyɔɔ mli lɛ. Wɔnyɛŋ wɔ kɛ lɛ aya ta nɛɛ naa koni ekayatsɔ̃ ehe moŋ ewo wɔ yɛ ta lɛ mli. Mɛni osusuɔ akɛ gbɔmɔ nɛɛ kɛ aaakpãtã enuŋtsɔ ni etɔ̃ enɔ lɛ, fe wɔwebii ni yɔɔ biɛ nɛɛ ayitsei?”

⁵ Kolɛ jeee nɛkɛ David nɛɛ he lala amɛwoɔ ni ahereɔ nɔ yɛ joi amli akɛ, “Saul egbe ekpekpei lɛ; shi David egbe akpei nyɔŋmanyɔŋmai lɛ?”

⁶ Akish tsɛ David, ni ekɛɛ lɛ akɛ, “Mina Yehowa akɛ anɔkwafo ji bo, ejaakɛ kɛjɛ gbi nɔ ni obaje miŋɔɔ aahu kɛbashi ŋmɛnɛ gbi nɛɛ, minako nɔ ko fɔŋ ko yɛ ohe. Kulɛ misumɔ akɛ oshi minɔ kɛya ta nɛɛ naa, shi maŋtsɛmɛi krokomɛi lɛ nyãaa ohe.

⁷ Enɛ hewɔ lɛ, kuu osɛɛ ni oya shĩa; ni oya yɛ hejɔlɛ mli hu koni okawo Filistibii amaŋtsɛmɛi lɛ mlifu moŋ.”

⁸ David kɛɛ Akish akɛ, “Shi mɛni kwraa ji nɔ ni mifee? Mɛni, aleee nɔ, ona yɛ mihe kɛjɛ gbi ni mikɛ bo bahi shi aahu kɛbashi ŋmɛnɛ gbi nɛɛ, hewɔ ni mikɛ minuŋtsɔ maŋtsɛ akaya, koni mikɛ ohenyɛlɔi yawu lɛ?”

⁹ Akish here David nɔ akɛ, “Mi mihiɛ lɛ, mile akɛ ohi tamɔ Nyɔŋmɔ bɔfo; shi Filistibii atatsɛmɛi lɛ kɛɛ okashi amɛnɔ kɛtee ta lɛ.

¹⁰ No hewɔ lɛ, nyɛtea shi wɔ leebi maŋkpa, bo kɛ owebii lɛ ni fata ohe kɛba lɛ, koni jeŋ ni aaatse pɛ nyɛyia mli kɛkua nyɛsɛɛ.”

¹¹ No hewɔ lɛ, David kɛ ewebii lɛ te shi leebi mra, ni amɛyiŋ koni amɛku amɛsɛɛ kɛya Filistibii lɛ ashikpɔŋ lɛ nɔ; ni Filistibii atai lɛ hu fã koni amɛya Yezreel.