1 Samuel 28 - ŊMALƐ KRƆŊKRƆŊ LƐ

¹ Yɛ mli aahu lɛ Filistibii lɛ tsɛ ta. Kɛkɛ ni amɛbuabua amɛtai lɛ anaa koni amɛkɛ Israel ayawu. Ni Akish kɛɛ David akɛ, “Na ole akɛ bo kɛ owebii lɛ baashi mitabilɔi lɛ anɔ kɛya ta nɛɛ.”

² David to he ehã Akish akɛ, “Ojogbaŋŋ, obaana nɔ ni otsulɔ baatsu.” Akish kɛɛ David akɛ, “Mo! Mibafee bo mihebulɔ owalabe fɛɛ.”

Saul tee eyafee nii

³ Nɛkɛ be mli lɛ Samuel egbo, ni Israel fɛɛ efo lɛ, ni afu lɛ yɛ Rama, ni ji lɛ diɛŋtsɛ emaŋ lɛ mli, ni Saul eshwie mɛi ni feɔ nii kɛ klamɔfoi lɛ fɛɛ yɛ Israel shikpɔŋ lɛ nɔ.

⁴ Filistibii atai lɛ bua amɛhe naa ni amɛfã ta kɛba Shunem ni amɛbato shi yɛ jɛi. Saul hu bua Israel tai lɛ anaa kɛkpe, ni amɛfã kɛba Gilboa amɛbato shi yɛ jɛi.

⁵ Be ni Saul na Filistibii lɛ ayikulɛ lɛ eshe gbeyei, ni etsui fã naakpa.

⁶ No hewɔ lɛ, Saul tee eyabi Yehowa nii. Shi yɛ lamɔ mli jio, yɛ Urim lɛ naa jio, yɛ gbalɔi anaa jio, Yehowa efooo Saul daaŋ.

⁷ Kɛkɛ ni Saul fã etsuji lɛ akɛ, “Nyɛyataoa yoo okɔmfo ko nyɛhãa mi koni maya eŋɔɔ mayabi nii.” Etsuji lɛ kɛɛ lɛ akɛ, “Yoo okɔmfo ko yɛ Endor.”

⁸ Kɛkɛ ni Saul bakɔlɔ atadei komɛi kɛkɛ ewo ekɛtsake ehe koni akayoo lɛ, ni ekɛ hii enyɔ komɛi fata ehe, ni eyiŋ etee yoo okɔmfo lɛ ŋɔɔ nyɔɔŋ. Saul kɛɛ yoo lɛ akɛ, “Miitao koni ofee nii ohã mi, ni otsɛ mɔ tã ni matsi mahã bo lɛ ohã mi.”

⁹ Yoo lɛ to he akɛ, “Bɛ ole nɔ sane ni Maŋtsɛ Saul eye kɛho lɛ fɛɛ, bɔ ni ekpãtã okɔmfoi kɛ klamɔfoi ahiɛ ehã yɛ Israel shikpɔŋ nɛɛ nɔ lɛ? Mɛɛba ni oba otsɔ̃ɔ mi tsɔne koni ohã agbe mi nɛɛ?”

¹⁰ Shi Saul kã yoo okɔmfo lɛ kitã ekɛɛ, “Mina Yehowa akɛ onaŋ amane ko amane ko yɛ nɔ ni obaatsu ohã mi nɛɛ hewɔ.”

¹¹ Yoo lɛ bi Saul akɛ, “Namɔ mitsɛ mihã bo lɛ?” Saul to he akɛ, “Tsɛ Samuel ohã mi.”

¹² Be ni yoo okɔmfo lɛ na Samuel susuma lɛ, ebo waa ni ekɛɛ Saul akɛ, “Mɛɛba olaka mi nakai? Maŋtsɛ Saul ji bo.”

¹³ Saul kɛɛ yoo lɛ akɛ, “Kaashe gbeyei. Mɛni onaa?” Yoo lɛ jie naa akɛ, “Mina sisa ko ni miifã kpo kɛmiijɛ shikpɔŋ kɛmiiba.”

¹⁴ Ni Saul bi lɛ akɛ, “Te esu hu?” Yoo lɛ here nɔ akɛ, “Nuumo ko ni baa lɛ; ewo atade yuu ko.” Kɛkɛ ni Saul yoo akɛ Samuel ni, ni no hewɔ lɛ, ekɛ ehiɛ bu shi, ni ekoto sisa lɛ.

¹⁵ Kɛkɛ ni Samuel bi Saul akɛ, “Mɛɛ hewɔ obagba minaa kɛ tsɛmɔ ni obatsɛ mi nɛɛ?” Saul jie naa ekɛɛ akɛ, “Efi mi naakpa. Filistibii lɛ kɛ mi jwere ta nɔ, ni Nyɔŋmɔ hu eje misɛɛ bɔ sɔŋŋ ni yɛ gbalɔi anaa jio, yɛ lamɔ mli jio, Nyɔŋmɔ efooo midaaŋ kwraa dɔŋŋ. Enɛ hewɔ ni mibatsɛ bo nɛɛ koni otsɔ̃ɔ mi nɔ ni mifee.”

¹⁶ Samuel kɛɛ Saul akɛ, “Kɛji Yehowa eje osɛɛ, ni etsɔ̃ ohenyɛlɔ lɛ, mɛɛba oba obiɔ mi nii?

¹⁷ Yehowa tsɔ̃ minɔ ewo bo shi, ni no he nii etsu lɛ. Eshɔ̃ maŋtsɛyeli lɛ yɛ odɛ̃ŋ, ni ekɛhã omaŋnyo David.

¹⁸ Ejaakɛ obooo Yehowa gbee toi; ni emli ni fu Amalek waa lɛ oyatsuuu he nii ohãaa lɛ. No hewɔ ni Yehowa feɔ bo nɔ ni efeɔ bo ŋmɛnɛ nɛɛ lɛ.

¹⁹ Fɛɛ ayakã, Yehowa baahã Filistibii lɛ aye bo kɛ Israel fɛɛ nɔ kunim. Wɔ ni ji wɔ lɛ, bo kɛ obihii baaba abashɛ gbohiiaje he ni miyɔɔ nɛɛ, ni Filistibii lɛ baaye Israel ta lɛ hu nɔ kunim.”

²⁰ Amrɔ lɛ nɔŋŋ lɛ Saul flɛo kɛjɛ ŋwɛi egbee shi ejaakɛ gbeyei wulu mɔ lɛ yɛ Samuel naa wiemɔi lɛ ahewɔ. Egbɔjɔ bliboo hu, ejaakɛ eyeko nɔ ko nɔ ko shwaneshwane kɛ nyɔɔŋnyɔɔŋ fɛɛ.

²¹ Fee sɛɛ be ni yoo okɔmfo lɛ tsi ebɛŋkɛ Saul, ni ena akɛ gbeyei emɔ lɛ lɛ, ekɛɛ Saul akɛ, “Oweyoo bo bo toi bianɛ, ni mikɛ mihe wo osharã mli, ni mifee nɔ ni obi mi akɛ mifee lɛ.

²² No hewɔ lɛ, ofainɛ, agbɛnɛ bo hu bo oweyoo toi. Mahã bo niyenii fioo ko ni oye bɔ ni afee ni ona hewalɛ okɛnyiɛ ogbɛ lɛ.”

²³ Saul ekpɛlɛ̃ɛɛ, ni ekɛɛ, “Miyeee.” Shi Saul tsuji lɛ kɛ yoo okɔmfo lɛ fɛɛ nyɛ Saul nɔ; ni naagbee mli lɛ ebo amɛ toi. No hewɔ lɛ, Saul te shi yɛ shikpɔŋ lɛ, ni eho eta saa lɛ nɔ.

²⁴ Oya nɔŋŋ ni yoo lɛ mɔ etsinabi ko ni ewo fɔ lɛ, ni egbe lɛ; ni ekpɔtɔ mamu ekɛshã mã akpiti aboloo.

²⁵ Ekɛ niyenii nɛɛ bama Saul kɛ etsuji lɛ ahiɛ, ni amɛye. Niyeli lɛ sɛɛ lɛ Saul kɛ etsuji lɛ yiŋ ni amɛtee nakai nyɔɔŋ lɛ mli nɔŋŋ.