1 Samuel 24 - ŊMALƐ KRƆŊKRƆŊ LƐ

David kɛ Saul he ke lɛ

¹ Be ni Saul kɛ Filistibii lɛ eyawu ni eku esɛɛ eba lɛ, abatswa lɛ adafi akɛ, “Naa, David yɛ En-Gedi Shiaŋa lɛ nɔ.”

² Kɛkɛ ni Saul hala Israel tabilɔi fɛɛ amli hii akpei etɛ̃, ni ekɛ amɛ yiŋ kɛtee koni eyatao David kɛ esɛɛbii lɛ yɛ Duji Atɛsai lɛ nɔ.

³ Amɛyashɛ tɛkplo ko he yɛ toi atsui komɛi ahe yɛ gbɛ lɛ nɔ, ni Saul tee niiaŋ yɛ tɛkplo nɛɛ mli. Asomoaŋ David kɛ esɛɛbii lɛ eyatee yɛ tɛkplo kometoo nɛɛ nɔŋŋ sɛɛgbɛ tɔ̃ɔ.

⁴ Kɛkɛ ni David webii lɛ kɛɛ lɛ akɛ, “Shi ni Yehowa wo bo akɛ, ‘Majie ohenyɛlɔ lɛ mawo odɛ̃ŋ koni ofee lɛ bɔ ni osumɔɔ’ lɛ no eba mli ŋmɛnɛ nɛɛ.” Kɛkɛ ni David te shi, ni etee ni eyafo Saul atade lɛ naabu nigii.

⁵ Shi fee sɛɛ lɛ David henilee bɔi lɛ haomɔ yɛ Saul atade lɛ naabu ni eyafo lɛ hewɔ.

⁶ Enɛ hã David kɛɛ ewebii lɛ akɛ, “Yehowa akahã enɛ miigbale mi fɔ̃ŋfɔ akɛ mawo minine nɔ yɛ minuŋtsɔ, mɔ ni Yehowa efɔ lɛ mu lɛ, nɔ. Esaaa akɛ minine saa ehe ejaakɛ gbɔmɔ ni Yehowa diɛŋtsɛ ewo lɛ maŋtsɛ ni.”

⁷ David kɛ nɛkɛ wiemɔ nɛɛ jɔɔ ewebii lɛ ahe, ni ekpɛlɛ̃ɛɛ amɛ akɛ amɛtua Saul. Saul te shi eshi tɛkplo lɛ mli, ni eyi egbɛ lɛ nɔ.

⁸ Fee sɛɛ lɛ David hu je kpo yɛ tɛkplo lɛ mli, ni eyabo Saul yisɛɛ, ni ekɛɛ lɛ akɛ, “Minuŋtsɔ, Maŋtsɛ!” Be ni Saul fo ehe ni ekwɛ esɛɛ lɛ, David kɛ ehiɛ bu shi ni ekoto Saul,

⁹ ni ekɛɛ lɛ akɛ, “Mɛɛ hewɔ ni oboɔ mɛi anaa toi akɛ mi David, miitao bo efɔŋ lɛ?

¹⁰ Bɛ ŋmɛnɛ lɛ ona kɛ ohiŋmɛi tsei enyɔ bɔ ni Yehowa jie bo wo midɛŋ ŋmɛnɛ gbi nɛɛ yɛ tɛkplo lɛ mli? Mɛi kɛɛ mi akɛ migbe bo; shi mikɛ ohe ke bo. Nɔ moŋ ni mikɛɛ ji akɛ, ‘Mikɛ minine esaŋ minuŋtsɔ he ejaakɛ gbɔmɔ ni Yehowa efɔ lɛ mu ni.’

¹¹ Mitsɛ Ataa, Okwɛɛɛ? Otade lɛ naabu ko ni mifo lɛ mihiɛ nɛɛ. Akɛ mifo otade lɛ naabu, ni mitswaaa bo nɔ migbeee bo lɛ, no aaatsɔ̃ɔ bo koni ona ole akɛ mibɛ ohe yiŋtoo fɔŋ ko. Mifeko bo esha ko, shi kɛ̃lɛ bo lɛ gbɔbimɔ sɔŋŋ kɛkɛ ogbɔbiɔ mi koni ogbe mi.

¹² Mikɛ misane lɛ fɛɛ ehã Yehowa koni eye ehã mi; ni lɛ nɔŋŋ ebaatɔ mihe owele yɛ onɔ; shi mi ni ji mi lɛ, mikɛ minine esaŋ ohe kɔkɔɔkɔ.

¹³ Onukpai buɔ abɛ akɛ ‘Mɛi fɔ̃ji adɛŋ nɔ fɔŋ jɛɔ, shi mi lɛ minine esaŋ ohe.

¹⁴ Ni namɔ sɛɛ po Israel maŋtsɛ lɛ diɛŋtsɛ efã kɛnyiɛ nɛɛ? Namɔ po otiuɔ nɛɛ? Gbee gbonyo ni; oflikiti ni!

¹⁵ Yehowa aaaye misane lɛ ehã mi, ni eeekojo mi kɛ bo teŋ, ni eejie mi yɛ odɛ̃ŋ?”

¹⁶ Be ni David kɛ Saul wie nɛkɛ egbe naa lɛ, Saul bi lɛ akɛ, “Bo nɔŋŋ ogbee minuɔ nɛɛ, mibi David?” Kɛkɛ ni Saul jwa yaafo,

¹⁷ ni ekɛɛ David akɛ, “Oja fe mi, ejaakɛ be mli ni ofeɔ mi ekpakpa lɛ belɛ mi lɛ miifee bo efɔŋ moŋ kɛmiito bo najiaŋ.

¹⁸ Otsɔ̃ɔ faŋŋ ŋmɛnɛ akɛ ekpakpa otaoɔ mi, akɛni Yehowa tu mi wo odɛ̃ŋ shi ogbeee mi lɛ.

¹⁹ Ejaakɛ namɔ hu nine shɛɔ ehenyɛlɔ nɔ ni ekɛ ehe keɔ lɛ. No hewɔ lɛ, Yehowa aaafee bo ejurɔ yɛ nɔ ni ofee ohã mi ŋmɛnɛ nɛɛ hewɔ.

²⁰ Agbɛnɛ lɛ efee faŋŋ ehã mi akɛ bo kɛ̃ obaaba obaye Israel maŋtsɛ, ni Maŋtsɛyeli lɛ baahe shi.

²¹ No hewɔ lɛ, okɛ Yehowa akã mi kitã akɛ ogbeŋ mishwiei ni baa yɛ misɛɛ lɛ bɔ ni afee ni migbɛi akalaaje.”

²² David kã Saul kitã ni ebi lɛ lɛ, kɛkɛ ni Saul yiŋ etee ewe; shi David kɛ esɛɛbii lɛ ku amɛsɛɛ kɛtee tɛkplo lɛ mli.