1 Samuel 22 - ŊMALƐ KRƆŊKRƆŊ LƐ

Agbe osɔfoi

¹ David shi Gat maŋ lɛ mli, ni ejo foi kɛtee eyahi Adullam tɛkplo lɛ mli. Be ni enyɛmimɛi lɛ kɛ etsɛ we lɛ fɛɛ na le lɛ, amɛtee eŋɔɔ yɛ jɛi.

² Kɛkɛ ni mɛi fɛɛ ni aawa amɛ yi kɛ mɛi hu ni hiɛhiɛ nyɔji kɛ mɛi fɛɛ hu ni bɛ shihilɛ he miishɛɛ lɛ bua amɛhe naa ni amɛyafata David he. Kɛkɛ ni David batsɔ̃ amɛsafoiatsɛ. Hii aaafee ohai ejwɛ sɔŋŋ ni bafata David he nɛɛ.

³ David shi Adullam tɛkplo lɛ mli ni etee Mizpa yɛ Moab shikpɔŋ lɛ nɔ, ni eyakɛɛ Moab maŋtsɛ lɛ akɛ, “Ofainɛ, hã mitsɛ kɛ minyɛ afã kɛba ni amɛbahi nyɛŋɔɔ kɛyaashi beyinɔ ni male bɔ ni Nyɔŋmɔ aaato mi ahã.”

⁴ No hewɔ lɛ, David shi efɔlɔi lɛ ehã Moab maŋtsɛ lɛ, ni efɔlɔi lɛ hi Moab Maŋtsɛ lɛ ŋɔɔ bei abɔ fɛɛ ni David yɔɔ tɛkplo lɛ mli lɛ.

⁵ Fee sɛɛ lɛ gbalɔ lɛ ni atsɛɔ lɛ Gad lɛ ba, ni ebakɛɛ David akɛ, “Kaahi tɛkplo nɛɛ mli dɔŋŋ. Shi biɛ ni oya Yuda shikpɔŋ lɛ nɔ.” No hewɔ lɛ, David shi tɛkplo lɛ mli ni etee eyahi Heret koo lɛ mli.

⁶ Gbi nɛɛ Saul yɛ Gibea, ni eta shi yɛ tso ko ni atsɛɔ lɛ akɛ tamariske tso lɛ shishi yɛ gɔŋkpɔ lɛ nɔ; ehiɛ ekpɔlɔ yɛ edɛŋ, ni etsuji lɛ ebɔle ehe kɛkpe.

⁷ Kɛkɛ ni abakɛɛ lɛ akɛ ayana he ni David kɛ esɛɛbii lɛ yɔɔ lɛ. Kɛkɛ ni Saul kɛɛ etsuji ni damɔ ehe lɛ akɛ, “Nyɛmiibo toi, nyɛ Benyaminbii! Ani Yeshai bi lɛ baahã nyɛteŋ mɔ fɛɛ mɔ ŋmɔji kɛ waintromii hu; aloo eeewo nyɛ mɛi akpekpe akui kɛ mɛi ohaohai akui asafoiatsɛmɛi hu,

⁸ hewɔ ni nyɛ fɛɛ tswɛm nyɛkpãŋ miyi nɔ lɛ? Te mɔ ko ejeee nyɛteŋ ebawooo mitoi nɔ akɛ mi diɛŋtsɛ mimusuŋbi lɛ kɛ Yeshai bi lɛ efee ekome? Mɔ ko mɔ ko bɛ nyɛteŋ ni misane dɔɔ lɛ bɔ ni eeewo mitoi nɔ akɛ mimusuŋbi lɛ ewo mitsulɔ lɛ yiŋ koni ete shi ewo mi tamɔ bɔ ni nyɛnaa ŋmɛnɛ nɛɛ?”

⁹ Doeg, Edomnyo lɛ, damɔ Saul tsuji lɛ amasɛi. Kɛkɛ ni ehere nɔ ekɛɛ akɛ, “Mina Yeshai bi lɛ yɛ Nob ni eba Osɔfo Ahimelek, Ahitub bi lɛ, ŋɔɔ,

¹⁰ ni Ahimelek bi Yehowa nii ehã lɛ, ni ehã lɛ gbɛnɔ niyenii, ni asaŋ ekɛ Goliat, Filistinyo lɛ, klante lɛ hu ehã lɛ.”

¹¹ Enɛ hã Saul tsu koni ayakpee Ahimelek, Ahitub bi lɛ, kɛ etsɛ we lɛ mli bii ni amɛ nɔŋŋ ji osɔfoi ni yɔɔ Nob lɛ fɛɛ abahã lɛ. Be ni gbɔmɛi nɛɛ fɛɛ bashɛ Maŋtsɛ Saul hiɛ lɛ,

¹² Saul kɛɛ akɛ, “Oobo toi lo, Ahitub bi?” Ahimelek here lɛ nɔ ekɛɛ, “Hɛɛ, minuŋtsɔ!”

¹³ Kɛkɛ ni Saul bi lɛ akɛ, “Mɛɛba ni, bo kɛ Yeshai bi lɛ, nyɛkpãŋ miyi nɔ, ni ohã lɛ niyenii, ni asaŋ owo edɛŋ klante, ni obi Nyɔŋmɔ nii ohã lɛ, ni no hewɔ ni ete shi ewo mi, ni ewo mi ka bɔ ni nyɛnaa ŋmɛnɛ gbi nɛɛ lɛ?”

¹⁴ Ahimelek to he ehã maŋtsɛ lɛ ekɛɛ, “Nɔ ni mile ji akɛ maŋtsɛ tsuji lɛ ateŋ mɔ ko bɛ ni eji ehe anɔkwafo tamɔ David. Maŋtsɛ shaanuu ji lɛ, ni agbɛnɛ maŋtsɛ he bulɔi lɛ asafoiatsɛ ji lɛ, ni awoɔ lɛ yɛ maŋtsɛ we lɛ mli.

¹⁵ Jeee ŋmɛnɛ ji klɛŋklɛŋ gbi nɔ ni mibi Nyɔŋmɔ nii mihã David. Enɛ akagbale mi fɔ̃ŋfɔ akɛ Maŋtsɛ kɛ sane aaafɔ̃ mi, etsulɔ, loo mitsɛ we lɛ mli mɔ ko kwraa nɔ, ejaakɛ mileee sane nɛɛ he nɔ ko nɔ ko kwraa.”

¹⁶ Shi Maŋtsɛ lɛ kɛɛ akɛ, “Ahimelek, ja agbe bo kɛ otsɛ we lɛ mli bii fɛɛ.”

¹⁷ Kɛkɛ ni maŋtsɛ lɛ fã ehebulɔi ni damɔ emasɛi lɛ ekɛɛ, “Nyɛtsɔ̃a nyɛhe ni nyɛgbea Yehowa osɔfoi nɛɛ, ejaakɛ amɛ hu amɛwa David eko. Amɛna amɛle akɛ David miijo foi, shi amɛbawooo mitoi nɔ shi maŋtsɛ lɛ ekpɛlɛ̃ɛɛ akɛ amɛawo amɛnine nɔ amɛtswia osɔfo lɛ nii.”

¹⁸ No hewɔ lɛ, Maŋtsɛ Saul fã Doeg ni ekɛɛ lɛ akɛ, “Gbee osɔfoi nɛɛ!” Ni lɛɛlɛŋ, Doeg, Edomnyo lɛ, tsɔ̃ ehe ni edɔ klante eto osɔfoi lɛ anɔ; ni nakai gbi lɛ egbe osɔfoi ni ji mɛi ni woɔ tsitsinɔhaanii lɛ nyɔŋmai kpaanyɔ kɛ enumɔ sɔŋŋ.

¹⁹ Saul hã akɛ klante kpãtã Nob maŋ muu lɛ fɛɛ hiɛ; agbe hii kɛ yei kɛ gbekɛbii kɛ abifabii kɛ tsinai kɛ teji kɛ toi fɛɛ.

²⁰ Shi Ahitub bi Ahimelek bihii lɛ ateŋ mɔ kome ko ni atsɛɔ lɛ Abiatar lɛ he je mli, ni ejo foi etee David ŋɔɔ,

²¹ ni eyabɔ lɛ amaniɛ akɛ Saul egbe Yehowa osɔfoi lɛ.

²² David kɛɛ Abiatar akɛ, “Nakai gbi lɛ beebe, be ni mina Doeg, Edomnyo lɛ, yɛ Nob lɛ pɛ ni mina akɛ bɔ fɛɛ bɔ lɛ ebaaya eyakɛɛ Saul. Mi ejɛ ni otsɛ we lɛ mli bii fɛɛ egboi nɛɛ.

²³ Okɛ mi ahi shi; ni okashe gbeyei, ejaakɛ mɔ ni taoɔ mi egbe lɛ, lɛ nɔŋŋ etaoɔ bo hu egbe nɛɛ; shi kɛji oyɛ mimasɛi lɛ oyɛ shweshweeshwe.”