1 Samuel 21 - ŊMALƐ KRƆŊKRƆŊ LƐ

David jo Saul naa foi

¹ David ba Osɔfo Ahimelek ŋɔɔ yɛ Nob maŋ lɛ mli. Ahimelek kɛ hekpokpomɔ bakpee David ni ebi lɛ akɛ, “Mɛɛba ni okome too onyiɛ, ni mɔ ko mɔ ko fataaa ohe lɛ?”

² David kɛɛ Osɔfo Ahimelek akɛ, “Minyiɛ maŋtsɛ tsumɔ ko nɔ. Ebɔ mi kɔkɔ akɛ, ‘Kaahã mɔ ko mɔ ko miile nɔ tsumɔ ni mitsu bo nɛɛ kɛ kitã hu ni miwo bo yɛ he lɛ.’ Oblahii ni mikɛyaa lɛ, mitsɔ̃ɔ amɛ he ko ni amɛ kɛ mi akpe yɛ.

³ Mɛni oyɔɔ yɛ onine nɔ? Hã mi aboloo akwaabɔi enumɔ loo nɔ fɛɛ nɔ ni ooona koni mikɛhiɛ midɛŋ.”

⁴ Osɔfo Ahimelek here David nɔ ekɛɛ akɛ, “Mibɛ aboloo ko kwraa yɛ biɛ fe aboloo krɔŋkrɔŋ lɛ. Kɛji oblahii lɛ eko etako yoo he lɛ no lɛ sane ko bɛ he.”

⁵ David to he ehã osɔfo lɛ akɛ, “Anɔkwale mli lɛ wɔtako yoo he tamɔ bɔ ni kɛji wɔnyiɛ tsumɔ folo po nɔ ni wɔtaaa yoo he lɛ. Te aaafee tɛŋŋ ni kɛji oblahii lɛ nyiɛ ŋmɛnɛ tsumɔ wulu ni tamɔ nɛkɛ nɔ lɛ, ni amɛhiɛŋ amɛhe krɔŋkrɔŋ lɛ?”

⁶ Kɛkɛ ni osɔfo lɛ kɛ aboloo krɔŋkrɔŋ lɛ hã David, ejaakɛ aboloo ko aboloo ko bɛ enine nɔ akɛ ja aboloo ni akɛmãa Yehowa hiɛ lɛ, nɔ ni kɛji ajie yɛ jɛi lɛ ja akɛ aboloo kla to emomo lɛ najiaŋ nakai gbi lɛ nɔŋŋ lɛ.

⁷ Gbi nɛɛ lɛ maŋtsɛ Saul tookwɛlɔ nukpa ni atsɛɔ lɛ Doeg, Edomnyo lɛ, yɛ jɛi ni atsi enaa yɛ Sɔlemɔ we lɛ.

⁸ David kɛɛ Osɔfo Ahimelek akɛ, “Obɛ klante loo akplɔ ko yɛ onine nɔ? Maŋtsɛ tsumɔ lɛ yafee kplakpla, ni no hewɔ lɛ, miklante lɛ jio, mikpɔlɔ lɛ jio, mikɔɔɔ ekoeko mihiɛɛɛ midɛŋ kɛbaaa.”

⁹ Osɔfo Ahimelek jie naa ekɛɛ, “Goliat, Filistinyo lɛ ni ogbe yɛ Ela Jɔɔ lɛ mli lɛ klante lɛ yɛ biɛ. Ekã tsitsinɔhaanii lɛ sɛɛ ni abla he. Kɛji oosumɔ lɛ no lɛ kɔ, ejaakɛ no sɛɛ lɛ klante kroko ko bɛ biɛ dɔŋŋ.” Ni David to he ekɛɛ akɛ, “Enɔ bɛ po; kɔ ohã mi.”

¹⁰ David shi Nob maŋ lɛ mli nakai gbi lɛ; eejo Saul naa foi; ni etee Gat Maŋtsɛ Akish ŋɔɔ.

¹¹ Kɛkɛ ni Maŋtsɛ Akish tsuji lɛ kɛɛ lɛ akɛ, “Kwɛ, jeee David lɛ ni etsɔ̃ shikpɔŋ lɛ nɔ maŋtsɛ lɛ nɛ?” Jeee mɔ nɛ he lala alaa akɛjoɔ akɛ, “Saul egbe akpei, ni David egbe akpei nyɔŋmai abɔ lɛ?”

¹² Wiemɔ nɛɛ hã David hɛle shi, ni ebɔ̃i Gat Maŋtsɛ Akish gbeyeishemɔ naakpa.

¹³ Enɛ hewɔ lɛ, David tsake enifeemɔ yɛ maŋbii lɛ ahiɛ. Ekwa eye sɛkɛ, ni efee enii oookɛɛ sɛkɛyelɔ kɛji ahiɛ emli. Eŋmala nii yɛ maŋ agbo lɛ shinaa lɛ nɔ, ni ehã lajɔ̃ tete wu etsɛ̃ŋ mli kpɔtɔɔ.

¹⁴ No hewɔ lɛ, Maŋtsɛ Akish bi etsuji lɛ akɛ, “Kwɛ, gbɔmɔ ni nyɛna akɛ eye sɛkɛ lɛ mɛni nyɛkɛ lɛ baa abahã mi afee?

¹⁵ Sɛkɛyelɔi ahe miihia mi hewɔ ni nyɛyakpala mɔnɛ nɛɛ kɛba koni ebafee sɛkɛyelɔi anii etsɔ̃ɔ mi lɛ? Aso esa kwraa akɛ gbɔmɔ nɛkɛ hiɔ miwe nɛɛ mli tete?”