1 Samuel 2 - ŊMALƐ KRƆŊKRƆŊ LƐ

Hana sɔle

¹ Kɛkɛ ni Hana sɔle yɛ jɛi ni ekɛɛ “Yehowa, ohã mimli efili mi, ni minyɛ mihiɛ nɔ miwo. Mibaŋmɔ mihenyɛlɔi lɛ, ejaakɛ ohere mi.

² “Mɔ krɔŋkrɔŋ ko bɛ tamɔ bo, Yehowa, osɛɛ lɛ mɔ ko bɛ dɔŋŋ; Mɔ ko bɛ hewalɛ tamɔ wɔNyɔŋmɔ lɛ.

³ Nyɛkawiea kɛ henɔwomɔ nɛkɛ dɔŋŋ; nyɛkawiea kɛ hetsɔ̃ɔmɔ, ejaakɛ Yehowa lɛ, Nyɔŋmɔ nilelɔ ni, ni lɛ ekojoɔ adesai anifeemɔnii.

⁴ Kãkãlɔi lɛ agãitsei lɛ ekumɔ, ni mɛi ni he waaa lɛ ena hewalɛ.

⁵ Mɛi ni kulɛ amɛyeɔ nii amɛtɔrɔɔ lɛ, amɛmiiye apaa yɛ daaŋ ŋmãa hewɔ, ni mɛi ni kulɛ amɛwɔɔ hɔmɔ lɛ, amɛwɔɔɔ hɔmɔ dɔŋŋ. Naa, kene lɛ efɔ kpawo, ni biianyɛ lɛ moŋ etsɔ̃ mɔ kome mɔ.

⁶ Yehowa ni gbeɔ mɔ, ni etsiɛɔ mɔ hiɛ hu; ehãa ayaa gbohiiaje, ni ehãa akpaleɔ abaa ekoŋŋ.

⁷ Yehowa ni hãa ayeɔ ohia, ni ehãa anaa nii hu; Lɛ ebaa mɔ shi, asaŋ lɛ ewoɔ mɔ nɔ hu.

⁸ Eteɔ ohiafo shi kɛjɛɔ mlu mli, ni ewoɔ mɔ ni efi lɛ nɔ yɛ tumo nɔ, koni amɛ kɛ abladei atara shi, ni amɛna sɛii ni yɔɔ nyam anɔ amɛtara, ejaakɛ je lɛ shishitoo lɛ enɔ ni, ni lɛ etswa je lɛ ema nɔ.

⁹ Eeebaa enɔkwafoi lɛ ayi, shi mɛi fɔ̃ji lɛ amɛhiɛ aaakpãtã yɛ duŋ mli, ejaakɛ jeee gbɔmɔ diɛŋtsɛ hewalɛ naa eyeɔ kunim yɛ.

¹⁰ Yehowa henyɛlɔi lɛ, aaakumɔ amɛ dukuduku ashwie shi; eeehã ŋwɛi ashimɔ awo amɛ; Yehowa ji je lɛ fɛɛ hiɛnyiɛlɔ; ebaahã emaŋtsɛ lɛ ana hewalɛ, ni emɔ ni efɔ lɛ mu lɛ eeehã eye kunim.”

¹¹ Kɛkɛ ni Elkana ku esɛɛ etee ewe lɛ yɛ Rama, ni eshi gbekɛnuu fioo, Samuel, lɛ koni esɔmɔ Yehowa yɛ Osɔfo Eli shishi.

Osɔfo Eli bihii lɛ

¹² Osɔfo Eli bihii lɛ yafee amɛhe yakagbɔmɛi, ni amɛbuu Yehowa,

¹³ loo osɔfoi lɛ agbɛnaanii ni sa akɛ amɛhe yɛ maŋ lɛ dɛŋ lɛ. Nɔ ni afeɔ ji akɛ kɛji mɔ ko ba afɔleshãa lɛ, osɔfo lɛ tsulɔ baa, be mli ni ahoɔ loo lɛ, ni ehiɛ faka kɛ enyanyɔji etɛ̃.

¹⁴ Tsulɔ lɛ kɛ faka lɛ tsuɔ loo ni ahoɔ lɛ yɛ tsɛnsi loo dadesɛŋ loo kukwɛi lɛ mli, ni loo fɛɛ loo ni faka lɛ baatsu kɛje kpo lɛ osɔfo lɛ ŋɔɔ. Nɛkɛ afeɔ Israelbii fɛɛ ni yaa afɔleshãa yɛ Shilo lɛ.

¹⁵ Shi agbɛnɛ be mli ni anako ashã loo lɛ mli fɔ lɛ tete lɛ, osɔfo lɛ tsulɔ lɛ baa ni ebakɛɔ mɔ ni shãa afɔle lɛ akɛ, “Jiemɔ loo ohã ni ayashã ahã osɔfo lɛ ejaakɛ esumɔɔɔ loo ni ahoo lɛ, eetao loo lɛ eŋmɔŋ.”

¹⁶ Kɛji mɔ ni shãa afɔle lɛ kɛɛ tsulɔ lɛ akɛ, “Mɛɛ koni ashã fɔ lɛ dã; no sɛɛ koni ojie loo lɛ bɔ fɛɛ bɔ ni osumɔɔ” lɛ, tsulɔ lɛ toɔ he akɛ, “Dabida, jiemɔ loo lɛ ohã nɔŋŋ, kɛjeee nakai lɛ mi diɛŋtsɛ majie loo lɛ ekãa naa.”

¹⁷ No hewɔ lɛ, Eli bihii lɛ anɔsha lɛ da yɛ Yehowa hiɛ, ejaakɛ amɛhiɛ eyasɔɔɔ nii ni akɛshãa afɔle ahãa Yehowa lɛ.

Samuel yɛ Shilo

¹⁸ Samuel sɔmɔɔ yɛ Yehowa hiɛ. Ewoɔ tsitsinɔhaanii ni akɛ klala kpɛ, ni efiɔ emliteŋ.

¹⁹ Enyɛ kpɛɔ atade yuu pɛmpɛoo ko, ni ekɛbahãa Samuel koni ewo kɛji ekɛ ewu ba daa afi afɔleshãa lɛ.

²⁰ Kɛji amɛba lɛ, Eli jɔɔ Elkana kɛ eŋa lɛ ni ekɛɔ akɛ, “Yehowa ahã yoo nɛɛ awo shwiei ahã bo yɛ ebi nɛɛ ni ejɔɔ enɔ ehã Yehowa hewɔ.” Kɛkɛ lɛ amɛku amɛsɛɛ kɛtee amɛmaŋ.

²¹ Yehowa jɔɔ Hana, ni efɔ Samuel sɛɛ bihii etɛ̃ kɛ biyei enyɔ hu. Ni oblanyo fioo, Samuel, lɛ bada yɛ Yehowa we lɛ.

Eli kɛ ebihii lɛ

²² Eli egbɔ naakpa; ni ababɔɔ lɛ nibii fɛɛ ni ebihii lɛ feɔ Israelbii lɛ, kɛ bɔ ni amɛkɛ yei ni batsuɔ nii yɛ Kpee Buu lɛ shinaa lɛ shi lɛ wɔɔ.

²³ No ni Eli kɛɛ ebihii lɛ akɛ, “Mɛɛba ni nyɛyeɔ nɛkɛ saji? Maŋ muu lɛ fɛɛ miiwie nibii gbohii ni nyɛfeɔ lɛ ahe, ni miinu.

²⁴ Nyɛkafea nakai kɔkɔɔkɔ, mibii. Saji ni minuɔ yɛ Yehowa webii anaa yɛ nyɛhe lɛ, ehiii.

²⁵ Kɛji gbɔmɔ fee enyɛmi gbɔmɔ esha lɛ, Nyɔŋmɔ ji mɔ ni kojoɔ lɛ; shi kɛji gbɔmɔ fee esha eshi Yehowa lɛ, namɔ po ni aaakpa fai ahã lɛ?” Shi oblahii lɛ eyabooo amɛtsɛ, Eli, toi ejaakɛ Yehowa eto akɛ ebaagbe amɛ.

²⁶ Oblanyo fioo, Samuel, lɛ bada ni esane sa gbɔmɛi kɛ Yehowa fɛɛ hiɛ.

Agba ashi Eli weku

²⁷ Gbalɔ ko ba Eli ŋɔɔ be ko ni ebakɛɛ lɛ akɛ, “Nɔ ni Yehowa kɛɔ nɛ, Mijie mihe mitsɔ̃ɔ otsɛ we lɛ be mli ni amɛyɔɔ Ijipt akɛ Farao nyɔji lɛ.

²⁸ Ni miŋɔ otsɛ we lɛ yɛ Israel akutsei lɛ fɛɛ ateŋ koni eye osɔfo ehã mi, ni esɔmɔ mi yɛ afɔleshãa latɛ lɛ naa, ni eshã tsofakɛŋma ehã mi, ni ewo efod lɛ kɛsɔmɔ mi. Ni no hewɔ lɛ, miŋɔ afɔlei fɛɛ ni akɛ la shãa mihã lɛ.

²⁹ Mɛɛba mɔ ni nyɛhiɛ kɔ̃ɔ mi hu migbɛfaŋnii ni yɔɔ gbee afɔlei kɛ niyenii afɔlei lɛ amli lɛ anɔ, be mli ni miwo nyɛ he kitã; ni obuɔ obihii lɛ moŋ fe mi, ni nyɛkɛ mimaŋbii lɛ afɔle fɛɛ afɔle mli nii ni hi fe fɛɛ lɛ lɛɔ nyɛ moŋ nyɛhe lɛ?

³⁰ No hewɔ lɛ, mi, Yehowa, Israel Nyɔŋmɔ lɛ, mikɛɛ akɛ eyɛ mli akɛ mikɛɛ akɛ owe lɛ kɛ otsɛmɛi awe lɛ ni baasɔ̃mɔ mi akɛ osɔfoi kɛya naanɔ, shi agbɛnɛ miigbala nakai shiwoo lɛ sɛɛ, ejaakɛ mɛi ni buɔ mi lɛ, mawo amɛhiɛ nyam: shi mɛi ni ebuuu mi lɛ, abuŋ amɛ ahaŋ nɔ ko nɔ ko.

³¹ Naa, be lɛ miiba, ni mibagbe owe lɛ kɛ otsɛmɛiawe lɛ mli bii fɛɛ yɛ amɛblahiiaŋ koni akana nuumo yɛ oweku mli.

³² Ni okɛ hejaramɔ baana shweremɔ ni abaahã Israel ashwere lɛ: shi owe lɛ nuumo ehiŋ mli kɛaatee naanɔ.

³³ Ni owekunyo ni mahã ashwɛ ni esɔmɔ yɛ afɔleshãa latɛ lɛ naa lɛ tete, ehiŋmɛii baajwara, ni ebaaye awerɛho kɛteke nɔ; ni shwiei fɛɛ ni abaawo yɛ owe lɛ baagbo akranaŋ naa gbele.

³⁴ Nɔ ni baaba obihii enyɔ lɛ, Hofni kɛ Finehas, nɔ lɛ baatsɔ̃ okadi ahã bo. No ji akɛ amɛyi enyɔ lɛ fɛɛ amɛaagboi gbi kome.

³⁵ Matee osɔfo anɔkwafo ko shi mahã mi diɛŋtsɛ mihe, mɔ ni baafee miyiŋtoo kɛ mitsuinaanii, ni mahã ewo shwiei ni shishi etaŋ, mɛi ni baasɔ̃mɔ yɛ mɔ ni mifɔ lɛ mu lɛ hiɛ daa.

³⁶ Ni mɔ fɛɛ mɔ ni mahã ashwɛ yɛ owe lɛ aaaba abakoto gbɔmɔ nɛɛ koni ebaba edɛŋ jwiɛtɛi loo aboloo akwaabɔ, ni ekɛɛ lɛ akɛ, ‘Miikpa bo fai ni ohã mi osɔfo nitsumɔ lɛ mli nii lɛ eko matsu bɔ ni afee ni mana midaaŋ ŋmaa kɛkɛ.’ ”