1 Samuel 18 - ŊMALƐ KRƆŊKRƆŊ LƐ

¹ Be ni Saul kɛ David ewie egbe naa sɛɛ lɛ, Yonatan bana David he miishɛɛ, ni esumɔ David tamɔ lɛ diɛŋtsɛ ehe.

² Saul hu ŋɔ David nakai gbi lɛ, ni ekpɛlɛ̃ɛɛ akɛ David aku esɛɛ kɛya etsɛ we lɛ dɔŋŋ.

³ Bɔ sɔŋŋ ni Yonatan sumɔ David tamɔ lɛ diɛŋtsɛ ehe hewɔ lɛ, ekɛ David bɔ naanyo ni amɛkpãŋ.

⁴ Enɛ hã Yonatan jie ehe nibii ni ekɛwula David, ekɛ etade lɛ kɛ edama lɛ kɛ eklante lɛ kɛ egãi lɛ kɛ emlifiinɔ lɛ hã lɛ.

⁵ Tai fɛɛ ni Saul tsu David wuu lɛ, etee eba kɛ omanye; ni no hewɔ lɛ, Saul fee David etatsɛmɛi ateŋ mɔ kome, amɛ ji nɔ ko ni sa Israel hii tabilɔi lɛ fɛɛ kɛ Saul tsuji lɛ tete fɛɛ ahiɛ.

Saul ye David he awuŋã

⁶ Be ni David egbe Filistinyo Goliat lɛ, ni Israel tabilɔi lɛ eku amɛsɛɛ kɛbaa shĩa lɛ, Israel yei lɛ jɛjɛɛ amɛmaji lɛ amli amɛkɛ lala kɛ joo bakpee Maŋtsɛ Saul. Amɛhiɛ fa bii kɛ ŋoŋoi kɛ miji; ni amɛnya;

⁷ ni amɛla be mli ni amɛnyaa lɛ amɛkɛɛ akɛ, “Saul egbe akpekpei abɔ, shi David egbe akpei nyɔŋmai abɔ.”

⁸ Wiemɔ nɛɛ eyaŋɔɔɔ Saul naa kwraa ni emli wo la, ni wiemɔ ni je enaa ji, “Ei! Akɛɛ David egbe gbɔmɛi akpei nyɔŋmai abɔ, shi mi lɛ akpeii amli kɛkɛ. Mɛni shwɛɔ lɛ dɔŋŋ mɔ fe maŋtsɛ sɛi lɛ nɔtamɔ?”

⁹ Kɛjɛ nakai gbi lɛ nɔ lɛ Saul jie ehiɛ eka David.

¹⁰ Nakai gbi lɛ nɔ jetsɛremɔ, be mli ni David tswaa saŋku ehãa Saul tamɔ bɔ ni efeɔ daa gbi lɛ, Nyɔŋmɔ hã mumɔ fɔŋ ko bayi Saul nɔ, ni egri yɛ maŋtsɛ we lɛ mli. No mli nɔŋŋ lɛ Saul akplɔ lɛ hiɛ edɛ̃.

¹¹ Saul ekɛɛ yɛ eyitsoŋ akɛ, “Matsu David akplɔ lɛ,” shi David wi ehe shii enyɔ sɔŋŋ ni ehe je mli.

¹² Agbɛnɛ Saul she David gbeyei, ejaakɛ ena akɛ Nyɔŋmɔ kɛ David yɛ, shi lɛ lɛ Nyɔŋmɔ ekwa lɛ.

¹³ Enɛ hã Saul jie David yɛ emasɛi, ni ewo lɛ tabilɔi akpe atsɛ. David nyiɛ tabilɔi lɛ ahiɛ kɛtee taitai kɛba;

¹⁴ ni eko fɛɛ eko mli lɛ David yayeɔ kunim, ejaakɛ Yehowa kɛ lɛ yɛ.

¹⁵ Be ni Saul na kunim wuji ni David yeɔ lɛ, gbeyei ni esheɔ David lɛ mli bawo wu.

¹⁶ Shi Israel kɛ Yuda fɛɛ sumɔ David sane ojogbaŋŋ, ejaakɛ enyiɛɔ amɛhiɛ kɛyaa ta ni ekɛ amɛbaa kɛ omanye.

David ŋɔ Saul biyoo ŋa

¹⁷ Saul wo David shi akɛ, “Bɛ ona mibiyoo nukpa Merab lɛ? Mikɛ lɛ baahã bo gbãlã kɛji ooofee ekãa kɛkɛ ni okɛ Yehowa henyɛlɔi lɛ aaawu ahã mi lɛ.” Saul susumɔ ji akɛ, lɛ tuuŋtu lɛ, ekɛ enine etaŋ David he, shi Filistibii lɛ ji mɛi ni baagbe David ahã lɛ yɛ tai lɛ eko mli.

¹⁸ David kɛɛ Saul akɛ, “Namɔ ji mi, ni namɛi ji miwekumɛi kɛ mitsɛ weku lɛ yɛ Israel, ni matsɔ̃ maŋtsɛ shaanuu?”

¹⁹ Be ni shɛ be ni esa akɛ akɛ Saul biyoo, Merab, ahã David gbãlã lɛ, akɛ Merab hã Adriel, Meholatnyo lɛ, moŋ.

²⁰ Nakai be mli lɛ Saul biyoo ni gbɛi ji Mikal lɛ miisumɔ David. Be ni atswa Saul adafi akɛ Mikal miisumɔ David lɛ ena mishɛɛ,

²¹ ni ekɛɛ “Yiɛ! Mikɛ Mikal baahã lɛ koni etsɔ̃ tamɔ akpa ehã lɛ, koni Filistibii lɛ anine agbe lɛ ahã mi.” Enɛ hã Saul wo David shi nɔ ni ji shii enyɔ nɔ akɛ, “Ŋmɛnɛ obaatsɔ mishaanuu.”

²² Saul fã etsuji lɛ akɛ, “Nyɛnaa David yɛ teemɔ mli, ni nyɛkɛa lɛ akɛ, ‘Bɔ ni maŋtsɛ lɛ yɔɔ ohe mishɛɛ, ni etsuji lɛ fɛɛ hu sumɔɔ osane lɛ, mɛɛba ni okɛ maŋtsɛ lɛ biyoo ehiii shi ni otsɔ̃ maŋtsɛ shaanuu?’ ”

²³ Be ni Saul tsuji lɛ kɛ David yawie wiemɔ nɛɛ lɛ, David kɛɛ tsuji lɛ akɛ, “Kolɛ nyɛkɛɛ benɛ maŋtsɛ shaanuu tsɔ̃mɔ lɛ shwɛmɔ sane ni? Mi hu nɛ, ohiafobi humi ni mijeee mɔ ko.”

²⁴ Saul tsuji lɛ yabɔ lɛ hetoo ni David hã amɛ lɛ.

²⁵ Shi Saul tsu amɛ ekoŋŋ ni ekɛɛ amɛ akɛ, “Nyɛyakɛa David akɛ aheee Mikal yinii ko kwraa fe Filistibii lɛ afoo naa loo komekomei oha kɛkɛ, koni akɛtɔ maŋtsɛ he owele yɛ ehenyɛlɔi lɛ anɔ.” Saul susumɔ ji akɛ foo naa loo lɛ taomɔ nɔ baatsɔ̃ ni Filistibii lɛ anine baagbe David.

²⁶ Be ni Saul tsuji lɛ yabɔ David amaniɛ lɛ, emii shɛ ehe akɛ ebatsɔ̃ maŋtsɛ shaanuu. No hewɔ lɛ, be ni eshwɛ fioo ni gbi lɛ shɛɔ lɛ,

²⁷ David yiŋ etee, lɛ kɛ eshishi tabilɔi lɛ, ni eyagbe Filistibii ohai enyɔ, ni efolɔ amɛfoo naa loi lɛ kɛba, ni ebakane ehã Maŋtsɛ Saul bɔ ni afee kɛkɛ ni etsɔ̃ maŋtsɛ shaanuu. No hewɔ lɛ, Saul kɛ ebiyoo Mikal hã David gbãlã.

²⁸ Shi be ni Saul kɛ ehiŋmɛi ŋmɛ shi ni ena akɛ Yehowa miibu David he, ni asaŋ akɛ Israel fɛɛ miisumɔ David sane lɛ,

²⁹ gbeyei ni Saul sheɔ David lɛ mli bawa fe tsuutsu ko lɛ. Kɛkɛ ni Saul tsɔ̃ David henyɛlɔ kwraa.

³⁰ Be nɛɛ mli fɛɛ lɛ Filistibii amaŋtsɛmɛi fãfãa tai; shi be fɛɛ be ni amɛaafã ta lɛ, David yeɔ Filistibii lɛ anɔ kunim fe Saul tsuji krokomɛi fɛɛ. Enɛ hã David gbɛi hehe naakpa.