1 Samuel 16 - ŊMALƐ KRƆŊKRƆŊ LƐ

Afɔ David mu akɛ Maŋtsɛ

¹ Yehowa kɛɛ Samuel akɛ, “Mɛɛ beyinɔ nɔŋŋ ni oooye Saul he ŋkɔmɔ kɛyashi, be mli ni ona ole akɛ mikwa lɛ Israel maŋtsɛyeli? Wo okoŋ lɛ mli mu obɔ̃; mibatsu bo Yeshai, Betlehemnyo lɛ, ŋɔɔ ejaakɛ miŋɔ maŋtsɛ yɛ ebihii lɛ ateŋ mihã mihe.”

² Samuel to he ekɛɛ, “Te mafee tɛŋŋ matee tsumɔ nɛɛ hu? Kɛji Saul nu he lɛ eeegbe mi.” Yehowa kɛɛ Samuel akɛ, “Ŋɔɔ tsinabi ohiɛ odɛ̃ kɛya, ni oyakɛɛ akɛ, ‘Miba mibashã afɔle mahã Yehowa.’

³ Kpeemɔ Yeshai kɛba afɔleshãahe lɛ, ni mibatsɔ̃ɔ bo nɔ ni ofee koni ofɔ mɔ ni mibatsɔ̃ɔ bo lɛ mu ohã mi.”

⁴ Samuel fee nɔ ni Yehowa kɛɛ lɛ lɛ. Be ni eshɛ Betlehem lɛ, maŋ lɛ mli onukpai lɛ kɛ Samuel bakpe kɛ hekpokpomɔ, ni amɛbi lɛ akɛ, “Hejɔlɛ baa oba nɛɛ lo?”

⁵ Samuel jie naa ekɛɛ akɛ, “Hejɔlɛ baa miba! Miba mibashã afɔle mahã Yehowa. Nyɛtsuua nyɛhe, ni nyɛ kɛ mi ayaa afɔle lɛ shãa.” Etsuu Yeshai kɛ ebihii lɛ ahe, ni ekpee amɛ kɛtee afɔleshãahe lɛ.

⁶ Be ni Yeshai kɛ ebihii lɛ ba ni Samuel na Yeshai bi Eliab lɛ, ekɛɛ yɛ eyitsoŋ akɛ, “Mɔ ni Yehowa efɔ lɛ mu lɛ damɔ Yehowa hiɛ nɛɛ.”

⁷ Shi Yehowa kɛɛ Samuel akɛ, “Kaahã ehiɛŋtso loo ekwɔlɛ nyɛnyereŋŋ lɛ miilaka bo. Jeee bɔ ni gbɔmɔ adesa kwɛɔ nii Yehowa kwɛɔ nii. Gbɔmɔ adesa kwɛɔ kpo nɔ gbɛ nii ekɛyeɔ sane, shi Yehowa lɛ kwɛɔ tsuiŋ.”

⁸ Kɛkɛ ni Yeshai tsɛ ebi Abinadab ni ehã etsɔ̃ Samuel hiɛ kɛho. Shi Samuel kɛɛ akɛ, “Mɔnɛ hu Yehowa eŋɔko lɛ.”

⁹ No sɛɛ lɛ, Yeshai hã ebi Shama hu baho; shi Samuel kɛɛ ekoŋŋ akɛ, “Mɔnɛ hu Yehowa eŋɔko lɛ.”

¹⁰ Yeshai hã ebihii lɛ ateŋ mɛi kpawo baho yɛ Samuel hiɛ; shi Samuel kɛɛ Yeshai akɛ, “Yehowa eŋɔko obii nɛɛ ateŋ mɔ ko mɔ ko.”

¹¹ Kɛkɛ ni Samuel bi Yeshai akɛ, “Ani, oblahii lɛ fɛɛ nɛ?” Yeshai to he akɛ, “Eshwɛ amɛteŋ gbekɛ kwraa fe fɛɛ lɛ; amrɔ nɛɛ eekwɛ mitoi lɛ.” Samuel kɛɛ Yeshai akɛ, “Tsu koni ayaŋɔ lɛ kɛba, ejaakɛ wɔwoŋ afɔle lɛ shãa ja ebashɛ biɛ dã.”

¹² Yeshai tsu ni ayaŋɔ ebi gbekɛ lɛ kɛba: etsuɔ fioo, ni ehiŋmɛii yɛ fɛo; anɔkwa ehe yɛ fɛo. Yehowa kɛɛ Samuel akɛ, “Tee shi ni ofɔ oblanyo lɛ mu, ejaakɛ lɛ nɛ.”

¹³ Samuel wo mu kɛ koŋ lɛ, ni efɔ David mu yɛ enyɛmimɛi lɛ ateŋ. Kɛjɛ nakai gbi lɛ nɔ lɛ, Yehowa mumɔ lɛ yi David nɔ! Kɛkɛ ni Samuel te shi, ni eyiŋ etee Rama.

David yɛ Saul we lɛ mli

¹⁴ Yehowa mumɔ lɛ je Saul nɔ agbɛnɛ, ni Yehowa hãa mumɔ fɔŋ ko moŋ bahaoɔ lɛ.

¹⁵ No hewɔ lɛ, Saul tsuji lɛ kɛɛ lɛ akɛ, “Wɔsusuɔ akɛ mumɔ fɔŋ ko ni Nyɔŋmɔ ehã haoɔ bo nɛɛ.

¹⁶ Ofãa wɔ otsuji ni damɔ ohiɛ amrɔ nɛɛ kulɛ, wɔɔɔya wɔyatao mɔ ko ni he esa jogbaŋŋ kɛ saŋkutswaa kɛba koni kɛji Nyɔŋmɔ hã mumɔ fɔŋ lɛ bayi onɔ lɛ, etswa saŋku lɛ koni ahi ahã bo.”

¹⁷ Saul kɛɛ etsuji lɛ akɛ, “Nyɛyataoa mɔ ko ni le saŋkutswaa jogbaŋŋ nyɛhãa mi, ni nyɛkɛ lɛ abaa.”

¹⁸ Oblahii lɛ ateŋ mɔ kome here nɔ ni ekɛɛ akɛ, “Mile Yeshai, Betlehemnyo lɛ, binuu ko ni ehe esa kɛ saŋkutswaa jogbaŋŋ diɛŋtsɛ; oblanyo kãkãlɔ ni sheee ta naa gbeyei, ni ele mɔ kɛ wiemɔ, ni ehe hu yɛ fɛo, ni Yehowa kɛ lɛ yɛ.”

¹⁹ No hewɔ lɛ, Saul tsu bɔfoi kɛ wiemɔ kɛtee Yeshai ŋɔɔ akɛ, “Hã obi David lɛ ni kwɛɔ otoi lɛ abana mi.”

²⁰ Yeshai kɛ aboloo kɛ wain ni yɔɔ kooloo wolo tɔ mli kɛ abotiabi tere teji, ni ekɛhã David koni ekɛyahã Saul.

²¹ David yashɛ Saul ŋɔɔ, ni ebɔi lɛ sɔ̃ɔmɔ. Saul basumɔ David sane bɔ sɔŋŋ ni efee lɛ etawuuniihiɛlɔ.

²² Fee sɛɛ lɛ Saul kɛ shɛɛ maje ayahã Yeshai akɛ, “Hã David ahi biɛ kwraa, ni esɔmɔ mi ejaakɛ miisumɔ esane.”

²³ Kɛjɛ nakai be lɛ, be fɛɛ be ni Nyɔŋmɔ aaahã mumɔ fɔŋ lɛ aba Saul nɔ lɛ, David tswaa saŋku lɛ, ni mumɔ fɔŋ lɛ jeɔ Saul nɔ; ni Saul he jɔɔ lɛ, ni ehiɔ ehãa lɛ.