1 Samuel 13 - ŊMALƐ KRƆŊKRƆŊ LƐ

Israel kɛ Filistibii lɛ wu

¹ Saul eye afii nyɔŋmai etɛ̃ be ni ebɔ̃i Israel nɔ yeli akɛ maŋtsɛ lɛ; ni eye maŋtsɛ lɛ afii nyɔŋmai ejwɛ kɛ enyɔ.

² Saul hala hii tabilɔi akpei etɛ̃ yɛ Israelbii lɛ ateŋ. Ekɛ hii tabilɔi nɛɛ ateŋ mɛi akpei enyɔ hi Mikmash yɛ Betel yɛ gɔji ashikpɔŋ lɛ nɔ, ni amɛteŋ akpe hu kɛ Yonatan hi Gibea yɛ Benyamin shikpɔŋ lɛ nɔ. Israel hii ni shwɛ lɛ Saul wo amɛ gbɛ ni mɔ fɛɛ mɔ tee eshĩa.

³ Yonatan yatua Filistibii asraafoi aku ko ni yɔɔ Gibea lɛ, ni eye amɛnɔ kunim. Filistibii lɛ nu sane nɛɛ he, no hewɔ lɛ, Saul tsu koni ayakpã tɛtɛrɛmantɛrɛ ni ashiɛ kɛtsɛ ta yɛ shikpɔŋ lɛ nɔ fɛɛ, koni akɛɛ akɛ, “Nyɛboa toi, Hebribii!

⁴ Naa, Saul eyaye Filistibii asraafoi aku ko nɔ kunim, ni no hewɔ lɛ, Filistibii lɛ ekã kɛbaaye wie!” Israelbii here tsɛmɔ lɛ nɔ, ni amɛtiu Saul yɛ Gilgal.

⁵ Kɛkɛ ni Filistibii lɛ bua amɛhe naa koni amɛ kɛ Israelbii lɛ abawu. Amɛhiɛ ta shwiilii akpei nyɔŋmai etɛ̃ kɛ okpɔŋɔnɔtalɔi akpei ekpaa kɛ asraafoi ni yifalɛ oookɛɛ ŋshɔnaa shia; ni amɛfã ta kɛgba, ni amɛbabɔ nsra yɛ Mikmash yɛ Bet-Aven bokãgbɛ.

⁶ Be ni Israel hii lɛ na akɛ nine miitao akɛ etsɔ̃ɔ amɛnɔ (ejaakɛ ta lɛ miinyɛ amɛ) lɛ, mɛi yateetee amɛhe yɛ tɛkploi kɛ bui kɛ tɛsai kɛ gbonyobui kɛ nubui amli,

⁷ ni mɛi komɛi hu jo foi amɛyafo Yordan Faa lɛ kɛtee Gad kɛ Gilead shikpɔŋ lɛ nɔ. Be nɛɛ mli fɛɛ lɛ Saul yɛ Gilgal lolo, ni mɛi ni ena nyiɛ esɛɛ lolo fɛɛ miikpokpo kɛ gbeyei.

⁸ Saul mɛ Samuel gbii kpawo, ni ji be ni Samuel to lɛ lɛ; shi Samuel eyashɛɛɛ shi, ni maŋ lɛ hu miijwa kɛmiishi Saul.

⁹ Enɛ hã Saul fã akɛ, “Akɛ shãa afɔle lɛ kɛ shidaa afɔlei lɛ abahã mi yɛ biɛ.” Kɛkɛ ni Saul shã afɔle lɛ.

¹⁰ Shi afɔle lɛ ni eshã egbe naa pɛ, kɛkɛ lɛ naa Samuel ni ebashɛ shi. Saul tee ni ekɛ Samuel yakpe ni efala lɛ.

¹¹ Kɛkɛ ni Samuel bi Saul akɛ, “Kwɛ, mɛni ofee nɛɛ?” Saul jie enaa akɛ, “Be ni mina akɛ maŋ lɛ miijwa kɛmiishi mi, ni gbi ni oto lɛ ebaho fɛɛ ni obashɛko shi, ni asaŋ Filistibii lɛ anaa ebakpe shi yɛ Mikmash lɛ,

¹² nɔ ni misusu ji akɛ Filistibii lɛ baaba abatua mi yɛ Gilgal, be mli ni mibiko Yehowa dɛŋ yelikɛbuamɔ. No hewɔ lɛ, fimɔ naa lɛ, mimia mihiɛ, ni mishã afɔle lɛ.”

¹³ Samuel to he ehã Saul akɛ, “Oye gbekɛbii asane pam. Oyeko kitã ni Yehowa, oNyɔŋmɔ, lɛ wo bo lɛ nɔ. Kulɛ kpaako Yehowa baawaje omaŋtsɛyeli yɛ Israel nɔ ema shi shiŋŋ kɛya naanɔ.

¹⁴ Shi agbɛnɛ lɛ omaŋtsɛyeli lɛ sɛɛ baafo. Yehowa ŋɔ lɛ diɛŋtsɛ etsui naa gbɔmɔ ni ewo lɛ emaŋ lɛ nɔ lumɔ; mɛni hewɔ lɛ oyayeee kitã ni Yehowa wo bo lɛ nɔ.”

¹⁵ Sane nɛɛ sɛɛ lɛ Saul shi Gilgal ni etee Geba yɛ Benyamin shikpɔŋ lɛ nɔ. Ekane hii tabilɔi ni fata ehe lɛ, ena mɛi aaafee ohai ekpaa.

¹⁶ Saul kɛ ebi Yonatan kɛ tabilɔi ni fata amɛhe lɛ wa yɛ Geba, yɛ Benyamin shikpɔŋ lɛ nɔ. No mli lɛ Filistibii lɛ ewo shi yɛ Mikmash.

¹⁷ Kɛkɛ ni Filistibii lɛ wo asafoi etɛ̃ agbɛ kɛjɛ amɛta lɛ mli koni amɛyatua Israelbii lɛ koni amɛha amɛnii. Ku kome tsɔ̃ Ofra gbɛ kɛtee Shual shikpɔŋ lɛ nɔ; ni ku kome hu tsɔ̃ Bet-Horon gbɛ,

¹⁸ ni ku kome ko hu tsɔ̃ husu lɛ ni kwɛɔ Zeboim Jɔɔ lɛ mli lɛ nɔ kɛtee shiaŋa lɛ nɔ.

¹⁹ Nɛkɛ be mli lɛ sɔ̃lɔ kome nɛkɛ bɛ Israel shikpɔŋ lɛ nɔ he ko he ko, ejaakɛ Filistibii lɛ kɛɛ akɛ, “Kɛji afeee nakai lɛ, no lɛ Hebribii lɛ aaasɔ̃ klantei kɛ akplɔi ato amɛhe.”

²⁰ Belɛ Filistibii lɛ aŋɔɔ Israelbii lɛ ateŋ mɔ fɛɛ mɔ yaa ni eyajɔɔ etsina kɔi kɛ shitsaa kɔi kɛ lema kɛ jwɛifoo kakla fɛɛ naa.

²¹ Aheɔ amɛ nɔ ko fioo ko kɛji ajɔ tsina kɔi loo shitsaa kɔi naa. Shi kɛji ajɔ tsinakplamɔ dade naa lɛ, aheɔ jwiɛtɛi shekel kome mlijaa etɛ̃ mli enyɔ ni kɛhã lema lɛ naajɔɔ lɛ aheɔ shekel kome mlijaa etɛ̃ mli ekome.

²² Enɛ hewɔ lɛ, gbi ni atswa ta lɛ, anaaa Saul kɛ Yonatan sɛɛbii lɛ ateŋ mɔ ko mɔ ko kwraa ni ehiɛ klante loo akplɔ, fe Saul kɛ ebi Yonatan kɛkɛ ni amɛ lɛ amɛhiɛ eko.

²³ Filistibii lɛ wo asraafoi aku gbɛ kɛtee Mikmash jɔɔ lɛ mli koni amɛyabu jɛi tsɔ̃mɔhe lɛ he.