1 Petro 5 - ŊMALƐ KRƆŊKRƆŊ LƐ

Wiemɔ kɛ tsɔ̃ɔmɔ hã asafo lɛ mli onukpai

¹ No hewɔ lɛ, onukpai ni yɔɔ nyɛteŋ lɛ, mi ni mi ji onukpa lɛ eko kɛ Kristo amanehului lɛ ahe odasefonyo ni baana anunyam ni abaajie kpo lɛ hu eko lɛ; ŋaa ni miwoɔ amɛ nɛ.

² Nyɛlɛa Nyɔŋmɔ tooku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa, shi moŋ yɛ suɔmɔ naa; tamɔ bɔ ni Nyɔŋmɔ taoɔ, asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa;

³ asaŋ jeee akɛ mɛi ni yeɔ mɛi ni akɛhã nyɛ nɔkwɛmɔ lɛ anɔ akɛ nuŋtsɔmɛi, shi moŋ mɛi ni feɔ amɛhe nɔkwɛmɔnɔ amɛhãa toiku lɛ.

⁴ Ni be ni Tookwɛlɔnukpa lɛ aaajie ehe kpo lɛ, nyɛnine aaashɛ anunyam akekre ni ŋalaaa lɛ nɔ.

Heshibaa kɛ hiɛ kɛ Nyɔŋmɔ nɔfɔɔ

⁵ Nakai nɔŋŋ nyɛ oblahii kɛ oblayei, nyɛbaa nyɛhe shi nyɛhãa onukpai lɛ. Ni nyɛ fɛɛ nyɛbabaa nyɛhe shi nyɛhãa nyɛhe ni nyɛkɛ heshibaa afee mama nyɛŋmɔa nyɛhɛ, ejaakɛ ŋmalɛ lɛ kɛɛ, “Nyɔŋmɔ kuɔ hewolɔi anaa, shi eduroɔ heshibalɔi.”

⁶ Hewɔ lɛ nyɛbaa nyɛhe shi yɛ Nyɔŋmɔ nine ni wa lɛ shishi, koni ewo nyɛnɔ yɛ be ni sa mli.

⁷ Nyɛkɛ nyɛhaomɔ fɛɛ afɔ̃a enɔ, ejaakɛ nyɛsane kã etsui nɔ.

Nyɛdamɔa shi shiŋŋ nyɛtsia abonsam gbɛ

⁸ Nyɛhiɛ akãa shi, nyɛsaraa ejaakɛ nyɛhenyɛlɔ, abonsam lɛ, nyiɛ tamɔ jata ni huɔ eetao mɔ ko emi.

⁹ Nyɛdamɔa shi shiŋŋ yɛ hemɔkɛyeli lɛ mli nyɛtsĩa lɛ gbɛ, ejaakɛ nyɛle akɛ nakai amanehului lɛ nɔŋŋ nyɛnyɛmimɛi ni yɔɔ je lɛ mli lɛ hu naa.

¹⁰ Shi dromɔ fɛɛ Nyɔŋmɔ ni tsɛ nyɛ kɛba enaanɔ anunyam lɛ mli yɛ Kristo Yesu mli lɛ, kɛ nyɛna amanehulu fioo nɛɛ etã lɛ, lɛ diɛŋtsɛ eeesaa nyɛ pɛ, ni eeewaje nyɛ, ni eeewo nyɛ hewalɛ ni eeehã nyɛfi shi shiŋŋ.

¹¹ Lɛ nɔŋŋ aaaŋɔ hewalɛ ahã kɛaatee naanɔi anaanɔ lɛ. Amen!

Shɛɛ kɛ bimɔ

¹² Mitsɔ̃ wɔnyɛmi Silvano ni ji anɔkwafo tamɔ bɔ ni mibuɔ lɛ lɛ nɔ miŋma nyɛ wolo fioo nɛɛ mikɛmiiwo nyɛ ekãa, ni mikɛmiiye odase miishi sɛɛ akɛ enɛ ji Nyɔŋmɔ anɔkwa dromɔ lɛ. Nyɛdamɔa shi shiŋŋ yɛ mli.

¹³ Asafo ni yɔɔ Babilon ni ahala amɛ tamɔ ahala wɔ lɛ kɛ mibi Marko hu miibi nyɛ.

¹⁴ Nyɛŋaŋaa nyɛhe kɛ suɔmɔ naashwɔmɔ.