1 Petro 4 - ŊMALƐ KRƆŊKRƆŊ LƐ

Nyɛhĩa shi akɛ mɛi ni wala etsake

¹ Agbɛnɛ akɛni Kristo na amanehulu ehã wɔ yɛ heloo mli hewɔ lɛ, nyɛ hu nyɛkɛ nakai jwɛŋmɔ lɛ nɔŋŋ amiaa akɛ tawuunii, ejaakɛ mɔ fɛɛ mɔ ni ena amanehulu yɛ heloo mli lɛ, ekpa eshafeemɔ.

² Koni be ni eshwɛ ehã lɛ yɛ heloo mli shihilɛ nɛɛ mli lɛ, ekahi shi yɛ gbɔmɛi akɔnɔi anaa dɔŋŋ, shi moŋ yɛ Nyɔŋmɔ suɔmɔnaanii anaa.

³ Ejaakɛ be ni eho momo lɛ mli lɛ, nyɛna be bɔ ni sa nyɛkɛtsu jeŋmajiaŋbii atsui naanii lɛ, ni nyɛba nyɛjeŋ yɛ nyɛnyɛŋtswibɔɔ, akɔnɔi, dãanumɔ mli basabasafeemɔ, ninumɔ kɛ wɔŋjamɔ ni ahiɔ lɛ amli.

⁴ Ni agbɛnɛ ni nyɛhe etswaaa shi nyɛkɛ amɛ eyaaa nɛkɛ shihilɛ gbonyo nɛɛ nɔŋŋ mli hewɔ lɛ, efeɔ amɛ naakpɛɛ ni amɛwieɔ nyɛhe musubɔɔ wiemɔi.

⁵ Shi amɛbaabu akɔntaa amɛhã mɔ ni esaa ehe eto ni ebaakojo hiɛkãalɔi kɛ gbohii fɛɛ lɛ.

⁶ Ejaakɛ enɛ hewɔ ni ajaje Sanekpakpa lɛ atsɔ̃ɔ gbohii tete hu, koni amɛhi shi yɛ mumɔŋ bɔ ni Nyɔŋmɔ taoɔ, tsɛ akojo amɛ bɔ ni akojoɔ gbɔmɛi fɛɛ lɛ.

Nyɛkɛ nyɛduromɔ keenii lɛ asɔ̃mɔsɔ̃mɔa nyɛhe

⁷ Shi nibii fɛɛ anaagbee lɛ eshɛ etã. Hewɔ lɛ nyɛjwɛŋmɔ mli atsea ni nyɛhiɛ akãa shi ahãa sɔlemɔi.

⁸ Shi titri lɛ nyɛsuɔmɔ ni nyɛkɛsumɔsumɔɔ nyɛhe lɛ mli awa, ejaakɛ suɔmɔ haa eshai babaoo nɔ.

⁹ Nyɛfeefea nyɛhe gbɔ ni huhũumɔ akahi mli.

¹⁰ Nyɛduromɔ keenii lɛ, bɔ ni nyɛteŋ mɔ fɛɛ mɔ ena lɛ, nyɛkɛsɔ̃mɔsɔ̃mɔa nyɛhe tamɔ Nyɔŋmɔ dromɔ ni jeɔ kpo yɛ gbɛi srɔtoi anɔ lɛ nɔkwɛlɔi kpakpai.

¹¹ Kɛ wiemɔ mɔ ko wieɔ lɛ, ewie lɛ akɛ Nyɔŋmɔ wiemɔi; kɛ sɔ̃ɔmɔ mɔ ko sɔ̃mɔɔ lɛ, esɔ̃mɔ akɛ hewalɛ ni Nyɔŋmɔ hãa lɛ lɛ mli ejeɔ esɔ̃mɔɔ, koni atsɔ̃ Yesu Kristo nɔ awo Nyɔŋmɔ hiɛ nyam yɛ nii fɛɛ mli; lɛ enɔ ji anunyam lɛ kɛ hewalɛ lɛ kɛyashiɔ naanɔi anaanɔ lɛ. Amen!

Nyɛbaana amanehulu akɛ Kristofoi

¹² Suɔmɔmɛi, nyɛkahãa amanehulu la ni akɛkãa nyɛ lɛ miifee nyɛ sane srɔto ko, tamɔ akɛ nɔ ko srɔto ko feɔ nyɛ lɛ;

¹³ shi moŋ bɔbɔ ni nyɛnaa Kristo amanehului lɛ eko lɛ, nakai nyɛmii ashɛa, koni enunyam kpojiemɔ lɛ mli hu nyɛmii ashɛ ni nyɛmli afili nyɛ.

¹⁴ Kɛ Kristo gbɛi hewɔ ajɛɔ nyɛ lɛ, ajɔɔ nyɛ, ejaakɛ anunyam Mumɔ kɛ Nyɔŋmɔ mumɔ lɛ yɛ nyɛnɔ.

¹⁵ Shi nyɛteŋ mɔ ko mɔ ko akana amanehulu akɛ gbɔmɔgbelɔ loo julɔ loo efɔŋfeelɔ aloo mɔ ko ni kɛ ehe woɔ mɛi krokomɛi asaji amli.

¹⁶ Shi kɛ mɔ ko na amanehulu akɛ Kristofonyo lɛ, ehiɛ akagbo, shi moŋ ewo Nyɔŋmɔ hiɛ nyam ejaakɛ ehiɛ Kristo gbɛi.

¹⁷ Ejaakɛ be ni abaaje kojomɔ shishi kɛjɛ Nyɔŋmɔ We lɛ eshɛ etã; shi kɛ wɔnɔ tsutsu ejɛ lɛ, belɛ mɛi ni booo Nyɔŋmɔ Sanekpakpa lɛ toi lɛ, te amɛnaagbee aaafee tɛŋŋ?

¹⁸ Ni kɛ ekpakpa ko dani aaahere jalɔ yiwala lɛ, “Mɔ ni sheee Nyɔŋmɔ gbeyei kɛ eshafeelɔ lɛ, nɛgbɛ amɛbaadamɔ?”

¹⁹ No hewɔ lɛ, mɛi ni naa amanehulu yɛ Nyɔŋmɔ suɔmɔnaa lɛ hu atu amɛsusumai amɛwo bɔlɔ anɔkwafo lɛ dɛŋ yɛ ekpakpafeemɔ mli.