1 Mose 8 - ŊMALƐ KRƆŊKRƆŊ LƐ

Nu afua lɛ mii

¹ Kɛkɛ ni Nyɔŋmɔ kai Noa kɛ ŋaŋ kooloi lɛ kɛ shĩa kooloi lɛ fɛɛ ni kɛ lɛ yɔɔ adeka lɛ mli lɛ; ni Nyɔŋmɔ hã kɔɔyɔɔ ko batswa yɛ shikpɔŋ lɛ nɔ, ni nu lɛ bɔ̃i kpɔ̃ŋmɔ.

² Aŋamɔ nu ni tueɔ kɛjɛ shikpɔŋ lɛ kɛ ŋwɛi samfɛji lɛ anaa; ni nu ni tueɔ kɛjɛɔ ŋwɛi lɛ kpa.

³ Nu lɛ hiɛ kpɔ̃ŋmɔ fiofio yɛ shikpɔŋ lɛ nɔ; ni gbii oha kɛ nyɔŋmai enumɔ lɛ sɛɛ lɛ nu lɛ nɔ gbɔ.

⁴ Nyɔŋ ni ji kpawo lɛ nɔ gbi ni ji nyɔŋma kɛ kpawo lɛ nɔ lɛ, adeka lɛ yama shi yɛ Ararat gɔji lɛ anɔ.

⁵ Nu lɛ hiɛ kpɔ̃ŋmɔ aahu kɛyashi nyɔŋ ni ji nyɔŋma lɛ nɔ. Nakai nyɔŋ lɛ nɔ klɛŋklɛŋ gbi lɛ nɔ lɛ, ana gɔji lɛ ayiteiaŋ.

⁶ Gbii nyɔŋmai ejwɛ sɛɛ lɛ, Noa gbele adeka ni efee lɛ samflɛ lɛ,

⁷ ni etsu kwãakwãalabite ko. Kwãakwãalabite lɛ hiɛ yaa kɛ baa kɛyashi beyinɔ ni nu lɛ mii yɛ shikpɔŋ lɛ nɔ.

⁸ Kɛkɛ ni Noa tsu okpo ko koni ekɛna kɛji nu lɛ emii yɛ shikpɔŋ lɛ nɔ lo.

⁹ Shi be ni okpo lɛ tee lɛ enaaa he ko esɔ̃ ejaakɛ nu lɛ ha shikpɔŋ lɛ nɔ fɛɛ lolo. Hewɔ lɛ eku esɛɛ kɛba Noa ŋɔɔ yɛ adeka lɛ mli.

¹⁰ Noa mɛ gbii kpawo kroko, ni esaa etsu okpo lɛ ekoŋŋ.

¹¹ Okpo lɛ ku esɛɛ kɛba eŋɔɔ gbɛkɛnaashi, ni naa, mutso baa fɔ kɔ̃ enaa. Enɛ hã Noa na le akɛ nu lɛ emii yɛ shikpɔŋ lɛ nɔ.

¹² Esaa emɛ gbii kpawo kroko hu, ni etsu okpo lɛ ekoŋŋ, shi okpo lɛ ekuuu esɛɛ ebaaa eŋɔɔ dɔŋŋ.

¹³ Eba mli akɛ Noa wala mli afi ni ji ohai ekpaa kɛ ekome lɛ nɔ, yɛ klɛŋklɛŋ nyɔŋ lɛ nɔ klɛŋklɛŋ gbi lɛ nɔ lɛ, nu lɛ mii yɛ shikpɔŋ lɛ nɔ; ni Noa jie nɔ ni ekɛha adeka lɛ nɔ lɛ. Ekwɛ ni ena akɛ shikpɔŋ lɛ nɔ egbi.

¹⁴ Nyɔŋ ni ji enyɔ lɛ nɔ gbi ni ji nyɔŋmai enyɔ kɛ kpawo lɛ nɔ lɛ, shikpɔŋ lɛ nɔ gbi kwraa.

¹⁵ Kɛkɛ ni Nyɔŋmɔ kɛ Noa wie ni ekɛɛ,

¹⁶ “Jee adeka lɛ mli, bo kɛ oŋa kɛ obii kɛ obii aŋamɛi ni fata ohe lɛ.

¹⁷ Nɔ fɛɛ nɔ ni hiɛ kã, ni ji heloo fɛɛ heloo ni kɛ bo yɔɔ lɛ, loofɔji kɛ kooloi kɛ nii fɛɛ ni wamɔɔ yɛ shikpɔŋ lɛ nɔ lɛ, okɛ amɛ aje kpo koni amɛfɔ ni amɛyi afa yɛ shikpɔŋ lɛ nɔ!”

¹⁸ Kɛkɛ ni Noa kɛ ebii lɛ kɛ eŋa kɛ ebii lɛ aŋamɛi ni fata ehe lɛ je kpo;

¹⁹ kooloi fɛɛ kɛ nii ni wamɔɔ fɛɛ kɛ loofɔji fɛɛ kɛ nɔ fɛɛ nɔ ni tsiɔ ehe yɛ shikpɔŋ lɛ nɔ je kpo yɛ adeka lɛ mli yɛ amɛwekui anaa.

Noa shã afɔle

²⁰ Kɛkɛ ni Noa ma afɔleshãa latɛ ehã Yehowa. Eŋɔ shĩaŋ kooloi ni he tse lɛ fɛɛ mli eko kɛ loofɔji ni he tse lɛ fɛɛ mli eko, ni ekɛshã shãa afɔle yɛ afɔleshãa latɛ lɛ nɔ.

²¹ Be ni Yehowa here afɔle lɛ ŋma jurɔ lɛ, ekɛɛ ehe akɛ, “Milomɔŋ shikpɔŋ lɛ yɛ gbɔmɔ hewɔ dɔŋŋ, ejaakɛ nii ni gbɔmɔ jwɛŋɔ yɛ eyiŋ lɛ efɔŋ ni kɛjɛ egbekɛbiiashi; ni asaŋ mikpãtãŋ nɔ fɛɛ nɔ ni hiɛ kã hiɛ dɔŋŋ, tamɔ bɔ ni mifee nɛɛ.

²² Gbii abɔ fɛɛ ni shikpɔŋ lɛ yɔɔ nɛɛ lɛ, nidumɔ kɛ nikpamɔ, latsaabe kɛ fɛ̃ibe, Agbiɛnaa kɛ Aharabata, shwane kɛ nyɔɔŋ sɛɛ efoŋ.”