1 Mose 5 - ŊMALƐ KRƆŊKRƆŊ LƐ

Adam Shwiei lɛ

¹ Adam shwiei lɛ ahe sane nɛ. Gbi ni Nyɔŋmɔ bɔ Adam lɛ, Nyɔŋmɔ su nɔ ebɔ lɛ yɛ.

² Ebɔ nuu ni ebɔ yoo ni ejɔɔ amɛ ni ewo amɛ gbɛi akɛ “Gbɔmɔ adesa” gbi nɔ ni ebɔ amɛ lɛ.

³ Adam eye afii oha kɛ nyɔŋmai etɛ̃ momo dani efɔ binuu tamɔ lɛ pɛpɛɛpɛ, ni ewo lɛ gbɛi akɛ Set.

⁴ Be ni afɔ Set sɛɛ lɛ, Adam hi shi afii ohai kpaanyɔ, ni efɔ bihii kɛ biyei krokomɛi.

⁵ No hewɔ lɛ, afii abɔ fɛɛ ni Adam ye dani egbo ji afii ohai nɛɛhu kɛ nyɔŋmai etɛ̃.

⁶ Set eye afii oha kɛ enumɔ ni efɔ Enosh.

⁷ Be ni efɔ Enosh sɛɛ lɛ, ehi shi afii ohai kpaanyɔ kɛ kpawo, ni efɔ bihii kɛ biyei.

⁸ Hewɔ lɛ be ni Set gbo lɛ afii ni eye lɛ fɛɛ feɔ afii ohai nɛɛhu kɛ nyɔŋma kɛ enyɔ.

⁹ Enosh ye afii nyɔŋmai nɛɛhu ni efɔ Kenan.

¹⁰ Be ni efɔ Kenan sɛɛ lɛ, ehi shi afii ohai kpaanyɔ kɛ nyɔŋma kɛ enumɔ, ni efɔ bihii kɛ biyei.

¹¹ No hewɔ lɛ, be ni Enosh gbo lɛ, afii abɔ fɛɛ ni eye ji afii ohai nɛɛhu kɛ enumɔ.

¹² Kenan eye afii nyɔŋmai kpawo dani efɔ Mahalalel;

¹³ Mahalalel fɔmɔ sɛɛ lɛ, ehi shi afii ohai kpaanyɔ kɛ nyɔŋmai ejwɛ. Efɔ bihii kɛ biyei krokomɛi.

¹⁴ Hewɔ lɛ be ni Kenan gbo lɛ afii ni eye lɛ fɛɛ feɔ afii ohai nɛɛhu kɛ nyɔŋma.

¹⁵ Mahalalel eye afii nyɔŋmai ekpaa kɛ enumɔ dani efɔ Yared;

¹⁶ ni be ni efɔ Yared sɛɛ lɛ, ehi shi afii ohai kpaanyɔ kɛ nyɔŋmai etɛ̃. Efɔ bihii kɛ biyei krokomɛi.

¹⁷ No hewɔ lɛ, afii fɛɛ ni Mahalalel ye lɛ fɛɛ feɔ ohai kpaanyɔ kɛ nyɔŋmai nɛɛhu kɛ enumɔ.

¹⁸ Yared ye afii oha kɛ nyɔŋmai ekpaa kɛ enyɔ dani efɔ Henok;

¹⁹ ni be ni efɔ Henok sɛɛ lɛ, ehi shi afii ohai kpaanyɔ, ni efɔ bihii kɛ biyei krokomɛi.

²⁰ No hewɔ lɛ, be ni Yared gbo lɛ, afii abɔ ni eye lɛ fɛɛ feɔ afii ohai nɛɛhu kɛ nyɔŋmai ekpaa kɛ enyɔ.

²¹ Henok ye afii nyɔŋmai ekpaa kɛ enumɔ dani efɔ Metusela, ni be ni efɔ Metusela sɛɛ lɛ, eja Nyɔŋmɔ afii ohai etɛ̃,

²² ni efɔ bihii kɛ biyei krokomɛi.

²³ No hewɔ lɛ, afii ni Henok ye lɛ fɛɛ feɔ afii ohai etɛ̃ kɛ nyɔŋmai ekpaa kɛ enumɔ.

²⁴ Henok mɔ Nyɔŋmɔjamɔ mli waa, no hewɔ lɛ, Nyɔŋmɔ ŋɔ lɛ kɛtee, ni no sɛɛ lɛ anaaa lɛ dɔŋŋ.

²⁵ Metusela ye afii oha kɛ nyɔŋmai kpaanyɔ kɛ kpawo dani efɔ Lamek;

²⁶ be ni efɔ Lamek sɛɛ lɛ, ehi shi afii ohai kpawo kɛ nyɔŋmai kpaanyɔ kɛ enyɔ; efɔ bihii kɛ biyei krokomɛi.

²⁷ No hewɔ lɛ, be ni Metusela gbo lɛ, afii ni eye lɛ fɛɛ feɔ afii ohai nɛɛhu kɛ nyɔŋmai ekpaa kɛ nɛɛhu.

²⁸ Lamek ye afii oha kɛ nyɔŋmai kpaanyɔ kɛ enyɔ dani efɔ binuu.

²⁹ Ewo lɛ Noa, ni ekɛɛ akɛ, “Mɔ nɛ baashɛje wɔmii yɛ wɔninenaa nitsumɔ kɛ tɔlɛ ni etɔɔ wɔ yɛ loomɔ ni Nuŋtsɔ lɛ lomɔ shikpɔŋ lɛ hewɔ.”

³⁰ Be ni Lamek fɔ Noa sɛɛ lɛ, ehi shi afii ohai enumɔ kɛ nyɔŋmai nɛɛhu kɛ enumɔ; ni efɔ bihii kɛ biyei krokomɛi.

³¹ No hewɔ lɛ, be ni Lamek gbo lɛ, afii fɛɛ ni eye lɛ fee ohai kpawo kɛ nyɔŋmai kpawo kɛ kpawo.

³² Be ni Noa eye afii ohai enumɔ lɛ efɔ Shem kɛ Ham kɛ Yafet.