1 Mose 44 - ŊMALƐ KRƆŊKRƆŊ LƐ

¹ Yosef fá eshĩa lɛ sɔ̃ɔlɔ nukpa lɛ akɛ, “Wo hii lɛ akotokui lɛ amli niyenii obɔ̃bɔ̃, bɔ ni amɛaanyɛ amɛtere, ni okɛ mɔ fɛɛ mɔ shika afɔ̃ ebele lɛ nɔ yɛ ekotoku mli,

² ni okɛ mikpulu ni ji mijwiɛtɛi kpulu lɛ afata abele shika lɛ he okɛfɔ̃ gbekɛ fe fɛɛ lɛ abele lɛ nɔ yɛ ekotoku lɛ mli.” Sɔ̃ɔlɔ lɛ fee bɔ ni Yosef kɛɛ lɛ lɛ.

³ Leebi be ni hiɛ gbele pɛ ni awo Yosef nyɛmimɛi lɛ agbɛ kɛ amɛtejii lɛ.

⁴ Be ni amɛshi maŋ lɛ mli lɛ, amɛshɛko shɔŋŋ he ko kɛkɛ ni Yosef kɛɛ eshĩa lɛ mli sɔ̃ɔlɔ nukpa lɛ akɛ, “Tee shi ni otiu gbɔmɛi lɛ ni kɛ oyanina amɛ lɛ, kɛɛmɔ amɛ akɛ ‘Mɛɛ hewɔ nyɛkɛ efɔŋ eto ekpakpa najiaŋ nɛɛ? Mɛɛba nyɛju minuŋtsɔ jwiɛtɛi kpulu lɛ?

⁵ No minuŋtsɔ kɛnuɔ dãa, ni asaŋ no ekɛklaa. Nyɛfee efɔŋ naakpa akɛ nyɛfee enɛ.’ ”

⁶ Be ni eyanina amɛ lɛ, eti nɛkɛ wiemɔi ni Yosef wie nɛɛ mli ehã amɛ.

⁷ Amɛhã hetoo akɛ, “Mɛɛ hewɔ minuŋtsɔ wieɔ nɛkɛ wiemɔi nɛɛ? Kpaoo, otsuji nyɛŋ nɛkɛ nɔ ko afee.

⁸ Shika lɛ ni wɔna jwere wɔbele lɛ nɔ yɛ wɔkotokui lɛ amli lɛ, bɛ wɔkɛku sɛɛ kɛjɛ Kanaan shikpɔŋ lɛ nɔ tɔ̃ɔ wɔkɛbahã bo; te aaafee tɛŋŋ mɔ ni wɔɔju jwiɛtɛi loo shika yɛ onuŋtsɔ lɛ shĩa mli hu?

⁹ Otsuji nɛɛ ateŋ mɔ fɛɛ mɔ dɛŋ ni aaana yɛ lɛ, gbo eeegbo; ni wɔ hu wɔtsɔ̃mɔ minuŋtsɔ nyɔji.”

¹⁰ Ni sɔ̃ɔlɔ nukpa lɛ here nɔ ekɛɛ, “Afee bɔ ni nyɛkɛɛ lɛ; mɔ dɛŋ ni aaana yɛ lɛ eeetsɔ̃ minyɔŋ, shi nyɛ mɛi ni aaashwɛ lɛ sɔ̃ ko ewulaŋ nyɛyi.”

¹¹ Kɛkɛ ni amɛhe fee oya, ni amɛtotoo amɛjatsui lɛ amɛmamɔ shi, ni amɛfɛnefɛnee amɛkotokui lɛ anaa.

¹² Yosef sɔ̃ɔlɔ nukpa lɛ bɔi kpulu lɛ taomɔ kɛjɛ onukpa lɛ nɔ, ni eyagbe naa yɛ gbekɛ fe fɛɛ lɛ nɔ; ni eyana kpulu lɛ yɛ Benyamin kotoku lɛ mli.

¹³ Kɛkɛ ni amɛkɛ dɔlɛ gbalagbalaa amɛhe atadei; ni amɛteŋ mɔ fɛɛ mɔ wo ejatsu etere eteji, ni amɛku amɛsɛɛ kɛba maŋ lɛ mli.

¹⁴ Be ni Yuda kɛ enyɛmimɛi lɛ bashɛ Yosef shĩa lɛ, Yosef yɛ jɛi lolo; ni amɛho amɛgbeegbee shikpɔŋ yɛ ehiɛ.

¹⁵ Yosef kɛɛ amɛ akɛ, “Mɛni pam nyɛfee nɛɛ? Ani nyɛleee akɛ gbɔmɔ ni tamɔ mi lɛ, ele klamɔ̃ lo?”

¹⁶ Yuda here nɔ akɛ, “Mɛni wɔbaakɛɛ minuŋtsɔ? Mɛɛ wiemɔ kwraa yɔɔ wɔnaa? Aloo te wɔbaajie wɔnaa wɔhã tɛŋŋ? Nyɔŋmɔ ena otsuji anɔsha lɛ; naa, wɔtsɔ̃mɔ minuŋtsɔ nyɔji, wɔ kɛ mɔ dɛŋ ni ana kpulu lɛ yɛ lɛ fɛɛ.”

¹⁷ Shi Yosef kɛɛ akɛ, “Kpaoo! Enɛ akagbale mi fɔ̃ŋfɔ̃; mɔ dɛŋ ni ana kpulu lɛ yɛ lɛ, lɛ kɛkɛ eeetsɔ minyɔŋ; shi nyɛ mɛi ni eshwɛ lɛ, nyɛyaa nyɛtsɛ ŋɔɔ yɛ hejɔlɛ mli.”

Yuda kpa Benyamin he fai

¹⁸ Kɛkɛ ni Yuda tsi ebɛŋkɛ Yosef ni ekɛɛ, “Ofainɛ, minuŋtsɔ, hã otsulɔ awie nɔ kome pɛ, ni minuŋtsɔ abo mi toi ni kaahã omli wo otsulɔ la ejaakɛ otamɔ Farao diɛŋtsɛ nɔŋŋ.

¹⁹ Minuŋtsɔ bi etsuji akɛ, ‘Ani nyɛyɛ tsɛ loo nyɛmi nuu ko?’

²⁰ Ni wɔkɛɛ minuŋtsɔ akɛ, ‘Wɔyɛ tsɛ nuumo kɛ nyɛmi nuu gbekɛ ni ji wɔtsɛ nakutsoŋbi. Gbekɛ nɛɛ enyɛbi lɛ egbo; ni lɛ ji enyɛbi koome ni eshwɛ; ni etsɛ sumɔɔ lɛ.’

²¹ Kɛkɛ ni okɛɛ otsuji akɛ, ‘Nyɛyaŋɔa lɛ kɛbaa koni mana lɛ kɛ mihiŋmɛi.’

²² Ni wɔkɛɛ minuŋtsɔ akɛ, ‘Gbekɛ lɛ nyɛŋ etsɛ eshi, ejaakɛ kɛji eshi etsɛ lɛ, etsɛ baagbo.’

²³ Kɛkɛ ni okɛɛ otsuji akɛ, ‘Kɛji nyɛkɛ nɛkɛ nyɛnyɛmi gbekɛ nɛɛ baaa lɛ, nyɛnaŋ mihiɛ dɔŋŋ.’

²⁴ “Be ni wɔku wɔsɛɛ wɔtee mitsɛ, otsulɔ lɛ ŋɔɔ lɛ, wɔgba lɛ wiemɔi ni minuŋtsɔ wie lɛ fɛɛ.

²⁵ No hewɔ lɛ, be ni wɔtsɛ kɛɛ akɛ, ‘Nyɛyaa ekoŋŋ ni nyɛyahea niyenii fioo ko nyɛbahãa wɔ’ lɛ, wɔkɛɛ lɛ akɛ,

²⁶ ‘Wɔnyɛŋ wɔya, shi kɛji wɔnyɛmi gbekɛ lɛ fata wɔhe lɛ, no lɛ wɔɔtee; shi wɔnyɛŋ nuu lɛ hiɛ wɔna akɛ ja wɔnyɛmi gbekɛ lɛ fata wɔhe dã.’

²⁷ Kɛkɛ ni mitsɛ, otsulɔ lɛ, kɛɛ wɔ akɛ, ‘Nyɛ diɛŋtsɛ nyɛle akɛ miŋa Rahel, lɛ ekɛ mi fɔ bihii enyɔ;

²⁸ mɔ kome eshi mi ni mikɛɛ akɛ, tserɛmɔ nɔŋŋ kɛ̃ kooloo ko etserɛ emli lɛ, ni minako lɛ kɛbashi ŋmɛnɛ.

²⁹ Kɛji nyɛŋɔ mɔ nɛ hu yɛ mihe kɛtee ni osharã ko yasharã lɛ lɛ, no lɛ he ni migbɔ kɛshɛ kɛ miyiteŋ waŋ nɛɛ, nyɛbaahã magbo kɛ awerɛhoo.’

³⁰ “No hewɔ lɛ, agbɛnɛ, kɛji mitee mitsɛ otsulɔ ŋɔɔ, ni gbekɛ lɛ fataaa wɔhe lɛ, akɛni ewala ji gbekɛ lɛ wala lɛ,

³¹ kɛ ena akɛ gbekɛ lɛ bɛ wɔteŋ lɛ, eeetswa shi egbo; ni bɔ ni otsulɔ egbɔ kɛ eyiteŋ waŋ nɛɛ, otsuji aaahã egbo kɛ awerɛhoo.

³² Ejaakɛ otsulɔ kɛ ewala to mitsɛ awaba yɛ gbekɛ lɛ najiaŋ akɛ, ‘Kɛji mikɛ gbekɛ lɛ ekuuu sɛɛ ebahãaa bo lɛ, no lɛ no sɔ̃ lɛ atere mi yɛ mitsɛ hiɛ miwala bei abɔ fɛɛ.’

³³ No hewɔ lɛ, agbɛnɛ, ofainɛ, hã otsulɔ ahi biɛ akɛ minuŋtsɔ nyɔŋ yɛ gbekɛ lɛ najiaŋ koni ohã gbekɛ lɛ kɛ enyɛmimɛi lɛ aku sɛɛ aya.

³⁴ Ejaakɛ te mafee tɛŋŋ maku misɛɛ maya mitsɛ ŋɔɔ kɛji gbekɛ lɛ fataaa mihe hu? Nɔ ni baafee mitsɛ lɛ minyɛŋ makwɛ kɛ mihiŋmɛi.”