1 Mose 4 - ŊMALƐ KRƆŊKRƆŊ LƐ

Kain kɛ Habel

¹ Adam kɛ eŋa Hawa na bɔlɛ. Hawa na musu ni efɔ Kain, ni ekɛɛ akɛ, “Mina binuu yɛ Yehowa yelikɛbuamɔ naa”.

² Kain sɛɛ lɛ efɔ enyɛmi Habel. Habel tsɔ̃ tookwɛlɔ, ni Kain tsɔ̃ okwaafonyo.

³ Yɛ mli aahu lɛ Kain kɛ eŋmɔshi nii lɛ eko yashã afɔle ehã Yehowa.

⁴ Habel hu kɛ etoi lɛ akromɔbii ni ewo fɔ ba ekɛbashã afɔle. Yehowa hiɛ sɔ Habel kɛ efɔle lɛ;

⁵ shi ehiɛ esɔɔɔ Kain kɛ efɔle lɛ. No hewɔ lɛ, Kain mli wo la naakpa, ni etũ ehiɛ.

⁶ Yehowa bi Kain akɛ, “Mɛɛba omli ewo la, ni mɛɛba otũ ohiɛ nɛkɛ?

⁷ Aso kɛji ofee ekpakpa lɛ, ohiɛ baŋ nyam? Kɛji ofeee ekpakpa lɛ, esha bu oshinaa lɛ shi, ni bo osɛɛgbɛ etaoɔ lɛ; shi bo lɛ ye enɔ kunim.”

⁸ Kɛkɛ ni Kain kɛɛ enyɛmi Habel akɛ, “Hã ni wɔya ŋa lɛ nɔ wɔba.” Be ni amɛyɔɔ ŋa lɛ nɔ lɛ, Kain te shi wo enyɛmi Habel ni egbe lɛ.

⁹ Kɛkɛ ni Yehowa bi Kain akɛ, “Nɛgbɛ onyɛmi Habel yɔɔ?” Kain to he akɛ, “Mileee; ani minyɛmi lɛ, enɔkwɛlɔ ji mi lo?”

¹⁰ Ni Yehowa kɛɛ lɛ akɛ, “Mɛni ofee nɛɛ? Onyɛmi lɛ la miibolɔ kɛmiijɛ shikpɔŋ sũ mli eetsɛ mi.

¹¹ Agbɛnɛ alomɔ bo yɛ shikpɔŋ ni gbɛ edaaŋ ekɛmi onyɛmi lɛ la lɛ yɛ odɛ̃ŋ lɛ nɔ.

¹² Kɛji ohu shikpɔŋ lɛ ebaŋ nii ehaŋ bo yɛ ehewalɛ naa dɔŋŋ. Kobɔlɔ kɛ shikpalɔ oootsɔ̃ yɛ shikpɔŋ lɛ nɔ!”

¹³ Kain kɛɛ Yehowa akɛ, “Mitɔmɔ lɛ he nyɔmɔwoo lɛ da fe bɔ ni manyɛ matere.

¹⁴ Naa, oshwie mi ŋmɛnɛ yɛ shikpɔŋ lɛ nɔ, ni matee mihe yɛ ohiɛ. Mitsɔ̃ kobɔlɔ kɛ shikpalɔ yɛ shikpɔŋ lɛ nɔ; ni mɔ fɛɛ mɔ ni aaana mi lɛ, eeegbe mi.”

¹⁵ Kɛkɛ ni Yehowa kɛɛ Kain akɛ, “Dabida! Kɛji mɔ ko gbe Kain lɛ, aaatɔ Kain he owele shii kpawo.” No hewɔ lɛ, Yehowa to okadi yɛ Kain he koni kɛji mɔ ko na lɛ lɛ, ekagbe lɛ.

¹⁶ Kɛkɛ ni Kain je Yehowa hiɛ etee, ni eyahi shi yɛ Nod shikpɔŋ lɛ nɔ yɛ Eden bokãgbɛ.

Kain Shwiei

¹⁷ Kain kɛ eŋa lɛ na bɔlɛ, ni ena musu ni efɔ Henok. Kain to maŋ ni ekɛ ebi Henok gbɛi wo maŋ lɛ.

¹⁸ Henok fɔ Irad; Irad fɔ Mehuyael; Mehuyael fɔ Metushael; ni Metushael fɔ Lamek.

¹⁹ Lamek ŋɔ yei enyɔ: mɔ kome gbɛi ji Ada ni mɔ kome hu gbɛi ji Zila.

²⁰ Ada fɔ Yabal, lɛ ji mɛi ni hiɔ bui amli, ni amɛlɛɔ kooloi lɛ atsɛ.

²¹ Yabal nyɛmi lɛ gbɛi ji Yubal; saŋkutswalɔi kɛ blɛkpãlɔi fɛɛ atsɛ ji lɛ.

²² Zila hu fɔ Tubalkain, ni ji ayawa nibii kɛ dade nibii fɛɛ sɔ̃lɔ lɛ; ni Tubalkain nyɛmi yoo gbɛi ji Naama.

²³ Lamek kɛɛ eŋãmɛi lɛ akɛ, “Ada kɛ Zila, nyɛboa migbee toi, Migbe oblanyo ko: ejaakɛ epila mi.

²⁴ Kɛji aaatɔ Kain he owele shii kpawo lɛ, asonɔkwa Lamek lɛ, aaatɔ ehe owele shii nyɔŋmai kpawo kɛ kpawo!”

Set kɛ Enosh

²⁵ Adam kɛ eŋa Hawa na bɔlɛ ekoŋŋ, ni Hawa fɔ binuu, ni Hawa wo lɛ Set, ejaakɛ ekɛɛ, “Nyɔŋmɔ kɛ bi kroko eto mibi Habel ni Kain gbe lɛ lɛ najiaŋ.”

²⁶ Set hu fɔ binuu, ni ewo lɛ gbɛi akɛ Enosh. Nakai be lɛ mli gbɔmɛi bɔi Yehowa gbɛi tsɛmɔ kɛ lɛ jamɔ.