1 Mose 37 - ŊMALƐ KRƆŊKRƆŊ LƐ

Yosef kɛ enyɛmimɛi lɛ

¹ Yakob hi shi yɛ etsɛ gbɔtoo shikpɔŋ ni ji Kanaan shikpɔŋ lɛ nɔ.

² Yakob weku lɛ he sane nɛ. Be ni Yosef eye afii nyɔŋma kɛ kpawo lɛ, ewaa enyɛmimɛi ni ji etsɛ ŋamɛi Bilha kɛ Zilpa bii lɛ kɛkwɛɔ amɛtsɛ toi lɛ. Yosef bafolɔɔ enyɛmimɛi lɛ anaa ehãa amɛtsɛ.

³ Yakob sumɔɔ Yosef fe ebii krokomɛi lɛ fɛɛ, ejaakɛ egbɔlɛ mli binuu ni. Ekpɛ atade wuyaa fɛɛfɛo ko kɛ eniji kakadaji ehã Yosef.

⁴ Be ni Yosef nyɛmimɛi lɛ na akɛ amɛtsɛ sumɔɔ Yosef fe amɛ fɛɛ lɛ, amɛnyɛ lɛ bɔ sɔŋŋ ni amɛnyɛɛɛ amɛkɛ lɛ awie yɛ tsuijurɔ naa dɔŋŋ.

⁵ Be ko lɛ Yosef la lamɔ ko ni be ni egba enyɛmimɛi lɛ lamɔ lɛ, ehã nyɛɛ ni amɛnyɛɔ lɛ lɛ mli wo wu moŋ fe tsutsu lɛ.

⁶ Ekɛɛ amɛ akɛ, “Nyɛboa lamɔ ni mila nɛɛ toi.

⁷ Wɔmiifimɔ ŋmãa kei yɛ ŋmɔshi; ni naa, miŋmãa ke lɛ te shi damɔ shi trɔmɔɔ, ni nyɛŋmãa kei lɛ babɔle miŋmãa ke lɛ, ni amɛkoto lɛ.”

⁸ Enyɛmimɛi lɛ kɛɛ lɛ akɛ, “Aso osusuɔ akɛ obaatsɔ maŋtsɛ ni oye wɔnɔ lo?” No hewɔ lɛ, amɛnyɛ lɛ fe tsutsu lɛ yɛ elamɔi kɛ ewiemɔi lɛ ahewɔ.

⁹ Kɛkɛ ni esaa ela lamɔ kroko hu, ni egba enyɛmimɛi lɛ ekɛɛ; “Naa, mila lamɔ ko ekoŋŋ. Mila ni hulu kɛ nyɔɔŋtsere kɛ ŋulamii nyɔŋma kɛ ekome bakoto mi.”

¹⁰ Shi be ni egba etsɛ kɛ enyɛmimɛi lɛ lamɔ lɛ, etsɛ kã ehiɛ, ni ekɛɛ lɛ akɛ, “Mɛni lamɔ ola nɛɛ? Belɛ kotomɔ mi kɛ onyɛ kɛ onyɛmimɛi lɛ aaaba abakoto bo lo?”

¹¹ Enyɛmimɛi lɛ bɛ lɛ amɛwo amɛmli; shi etsɛ kɛ wiemɔ lɛ to enakutsoŋ.

Ahɔ̃ɔ Yosef ni akɛ lɛ tee Ijipt

¹² Gbi ko be ni Yosef nyɛmimɛi lɛ etee amɛkwɛɔ amɛtsɛ toi lɛ yɛ Shekem lɛ,

¹³ Yakob kɛɛ Yosef akɛ, “Te onyɛmimɛi lɛ miikwɛ toi yɛ Shekem? Ba ni matsu bo amɛŋɔɔ.” Ni Yosef here nɔ akɛ, “Naa mi, tsu mi.”

¹⁴ Yakob kɛɛ lɛ akɛ, “Yaa amrɔ nɛɛ nɔŋŋ ni oyakwɛ akɛ onyɛmimɛi lɛ kɛ toi lɛ fɛɛ yɛ jogbaŋŋ lo koni obakɛɛ mi.” Kɛkɛ ni etsu Yosef kɛjɛ Hebron jɔɔ lɛ mli; ni Yosef ba Shekem.

¹⁵ Nuu ko na Yosef ni eetsomlo yɛ ŋa lɛ nɔ, ni nuu lɛ bi lɛ akɛ, “Mɛni otaoɔ?”

¹⁶ Ni ekɛɛ, “Miitao minyɛmimɛi lɛ. Miikpa bo fai, tsɔ̃ɔmɔ mi he ni amɛlɛɔ amɛtoi lɛ yɛ.”

¹⁷ Ni nuu lɛ kɛɛ akɛ, “Amɛje biɛ, shi minu ni amɛkɛɛ akɛ, ‘Nyɛhãa wɔyaa Dotan.’ ” No hewɔ lɛ, Yosef tiu enyɛmimɛi lɛ, ni eyanina amɛ yɛ Dotan.

¹⁸ Shi be ni amɛna lɛ yɛ shɔŋŋ ni enako ebɛŋkɛ amɛ lɛ, amɛkpãŋ eyinɔ akɛ amɛbaagbe lɛ.

¹⁹ Amɛkɛɛkɛɛ amɛhe akɛ, “Naa, lamɔiatsɛ lɛ baa lɛ.

²⁰ Nyɛbaa, nyɛhãa wɔgbea lɛ ni wɔshɛa lɛ wɔfɔ̃a bui lɛ eko mli, ni wɔkɛɛ akɛ, ‘Kooloo fɔŋ ko eye lɛ,’ koni wɔkwɛ kɛji elamɔi lɛ aaaba mli.”

²¹ Shi be ni Ruben nu yiŋ ni ato lɛ, akɛni eetao ni ejie lɛ yɛ amɛdɛŋ hewɔ lɛ, ekɛɛ amɛ akɛ, “Nyɛkahãa wɔgbea lɛ.”

²² Ruben saa kɛɛ amɛ akɛ, “Nyɛkashwiea lá shi, shi moŋ nyɛkɛ lɛ awoa bu nɛɛ ni yɔɔ ŋa nɛɛ nɔ lɛ mli, ni nyɛkafea lɛ efɔŋ ko!” Ruben kɛɛ enɛ bɔ ni afee ni ejie lɛ yɛ amɛdɛŋ koni ekɛ lɛ ayahã etsɛ ekoŋŋ.

²³ Be ni Yosef shɛ enyɛmimɛi lɛ aŋɔɔ lɛ, amɛkpɔlɔ atade wuyaa fɛɛfɛo kɛ eniji kakadaji lɛ yɛ ehe,

²⁴ ni amɛmɔ lɛ, ni amɛkɛ lɛ wo bu lɛ mli; shi bu folo ni, nu bɛ mli.

²⁵ Kɛkɛ ni amɛho amɛtara shi ni amɛbɔi niyeli. Be ni amɛwo amɛhiɛ nɔ lɛ, amɛna Ishmaelbii gbɛnyiɛlɔi aku ko ni jɛ Gilead miiba kɛ amɛyoomai ni tere tsofakɛŋmai kɛ gbonyowoo tsofa kɛ ohɛ ni jeɔ ŋma kɛmiiya Ijipt.

²⁶ Kɛkɛ ni Yuda kɛɛ enyɛmimɛi lɛ akɛ, “Mɛɛ sɛɛ wɔɔna yɛ mli kɛji wɔgbe wɔnyɛmi lɛ ni wɔtsimɔ nɔ?

²⁷ Nyɛbaa, nyɛhãa wɔhɔɔa lɛ wɔhã Ishmaelbii lɛ; shi nyɛkahãa wɔkɛ wɔnine miita ehe, ejaakɛ wɔnyɛmi kɛ wɔla ji lɛ.” Ni enyɛmimɛi lɛ bo lɛ toi.

²⁸ Kɛkɛ ni Midia guɔyelɔi lɛ bashɛ jɛi; ni Yosef nyɛmimɛi lɛ jie Yosef yɛ bu lɛ mli; ni amɛhɔ̃ɔ lɛ amɛhã Ishmaelbii lɛ amɛhe jwiɛtɛi kukuji nyɔŋmai enyɔ. Ishmaelbii lɛ kɛ Yosef tee Ijipt.

²⁹ Shi be ni Ruben ku esɛɛ kɛba bu lɛ he ekoŋŋ lɛ, Yosef bɛ bu lɛ mli. Kɛkɛ ni Ruben gbala ehe atadei lɛ,

³⁰ ni eku esɛɛ kɛba enyɛmimɛi lɛ aŋɔɔ, ni ekɛɛ akɛ; “Gbekɛ lɛ bɛ jɛi; te mafee tɛŋŋ?”

³¹ Kɛkɛ ni amɛkɔlɔ Yosef atade lɛ, ni amɛgbe too kpakpo ko ni amɛkɛ atade lɛ tsɔ la lɛ mli.

³² Ni amɛkɛ atade wuyaa fɛɛfɛo lɛ tsu ni akɛyatsɔ̃ɔ amɛtsɛ; amɛkɛɛ akɛ, “Wɔna nii nɛɛ, kwɛmɔ akɛ obi lɛ atade lɛ ni loo jeee noŋ.”

³³ Ni Yakob yoo atade lɛ ni ekɛɛ, “Mibi lɛ atade lɛ ni! Kooloo kakawua ko eye lɛ; tserɛmɔ etserɛ Yosef mli nɛɛ?”

³⁴ Ni Yakob gbala ehe atade lɛ, ni ekɔ kpekpe emia ehɛ, ni eye ebi lɛ he ŋkɔmɔ gbii pii.

³⁵ Ebihii kɛ ebiyei lɛ fɛɛ te shi koni amɛbashɛje emii, shi ekpɛlɛɛɛ miishɛjemɔ, ni ekɛɛ, “Ŋkɔmɔyeli mikɛaaya ayanina mibi lɛ yɛ gbohiiaje.” Nɛkɛ gbɛ nɔ Yosef tsɛ tsɔ efo lɛ.

³⁶ Nɛkɛ be mli lɛ Midianbii lɛ eyahɔ̃ɔ Yosef yɛ Ijipt amɛhã Potifar ni ji Farao piafonyo kɛ eblafoiatsɛ lɛ.