1 Mose 33 - ŊMALƐ KRƆŊKRƆŊ LƐ

Yakob kɛ Esau kpe

¹ Yakob wo ehiɛ nɔ ekwɛ, ni naa Esau miiba kɛ mɛi ohai ejwɛ. No hewɔ lɛ, Yakob ja gbekɛbii lɛ amli ehã Lea kɛ Rahel kɛ weyei enyɔ lɛ.

² Ekɛ weyei lɛ kɛ amɛbii lɛ to hiɛgbɛ; Lea kɛ ebii lɛ nyiɛ amɛsɛɛ; ni Rahel kɛ Yosef nyiɛ sɛɛ kwraa.

³ Shi lɛ Yakob lɛ diɛŋtsɛ lɛ eho eyi ekui lɛ fɛɛ ahiɛ; ni be ni eyaa lɛ ekoto shi flɛoflɛo shii kpawo dani eyashɛ enyɛmi lɛ ŋɔɔ.

⁴ Shi Esau sha foi ekɛ lɛ bakpe. Eloo Yakob atuu, ni eho egbee ekuɛ nɔ, ni eshwɔ enaa, ni amɛfo.

⁵ Be ni Esau wo ehiɛ nɔ ni ena yei lɛ kɛ gbekɛbii lɛ, ebi Yakob akɛ, “Namɛi ji mɛi ni kɛ bo nyiɛ nɛɛ?” Ni Yakob to he akɛ, “Bii ni Nyɔŋmɔ eduro otsulɔ lɛ ni.”

⁶ Kɛkɛ ni weyei lɛ tsi ba, amɛ kɛ amɛbii lɛ, ni amɛbakoto Esau.

⁷ Lea hu kɛ ebii lɛ tsi ba ni amɛbakoto Esau. Ni naagbee kwraa lɛ Yosef kɛ Rahel hu ba ni amɛbakoto lɛ.

⁸ Kɛkɛ ni Esau bi akɛ, “Kuikui ni mikɛkpe nɛɛ fɛɛ lɛ te eshishi hu?” Ni Yakob hã hetoo akɛ, “Bɔ ni afee ni minuŋtsɔ ahã mi hiɛ.”

⁹ Shi Esau kɛɛ akɛ, “Minyɛmi nuu, nɔ ni miyɔɔ lɛ fa, hã onɔ lɛ ahi shi ahã bo!”

¹⁰ Shi Yakob kɛɛ, “Dabida; miikpa bo fai, kɛji mina hiɛ yɛ ohiɛ lɛ, no lɛ hemɔ midɛŋ nikeenii lɛ; ejaakɛ ohiɛ ni mina nɛɛ lɛ etamɔ nɔ ni mina Nyɔŋmɔ hiɛ pɛ, ni ohere mi atuu hu.

¹¹ Miikpa bo fai koni ohe midɛŋ nikeenii ni akɛbahã bo nɛɛ; ejaakɛ Nyɔŋmɔ eduro mi, ni misaa miyɛ nɔ fɛɛ nɔ hu.” Ni Yakob hiɛ Esau kɛ wiemɔ aahu kɛyashi be ni ehe nikeenii lɛ.

¹² Esau kɛɛ, “Hã ni wɔŋɔ shwie nɔ koni wɔya; mi lɛ matsɔ ohiɛ.”

¹³ Shi Yakob kɛɛ lɛ akɛ, “Minuŋtsɔ le akɛ gbekɛbii lɛ ahiɛ esako; asaŋ mihiɛ toi kɛ tsinai ni hãa amɛbii fufɔ; amɛsane kã mitsui nɔ; kɛji atsirɛ amɛyisɛɛ gbi kome jenamɔ lɛ, kooloi lɛ fɛɛ aaabagboi.

¹⁴ No hewɔ lɛ, minuŋtsɔ atsɔ̃ etsulɔ hiɛ, ni mi lɛ manyiɛ blɛooblɛoo bɔ ni kooloi lɛ ni nyiɛ mihiɛ lɛ kɛ gbekɛbii lɛ aaanyɛ anyiɛ kɛyaashi beyinɔ ni mashɛ minuŋtsɔ ŋɔɔ yɛ Edom.”

¹⁵ Ni Esau kɛɛ, “Hã mashi mɛi ni kɛ mi nyiɛ lɛ eko mato ohe.” Yakob to he akɛ, “Mɛɛ hiamɔ ehia? Hã mi mana hiɛ yɛ minuŋtsɔ hiɛ kɛkɛ!”

¹⁶ Kɛkɛ ni Esau ku esɛɛ nakai gbi lɛ, ni eyiŋ kɛtee Edom.

¹⁷ Yakob kɛshwie nɔ kɛtee Sukot ni eyama etsu yɛ jɛi, ni efee asesei ehã ekooloi lɛ. No hewɔ lɛ, awo jɛi Sukot.

¹⁸ Be ni Yakob ku esɛɛ kɛjɛ Mesopotamia ebaa lɛ, ebashɛ Kanaan shikpɔŋ lɛ nɔ maŋ ko ni ji Shekem lɛ shweshweeshwe, ni eto shi yɛ maŋ lɛ klotia.

¹⁹ Yakob kane shika jwiɛtɛi kukuji oha, ni ekɛhe shikpɔŋ he ni ebato shi yɛ lɛ yɛ Hamorbii lɛ adɛŋ. Shekem tsɛ ji Hamor nɛɛ.

²⁰ Yakob ma afɔleshãa latɛ yɛ jɛi, ni ewo lɛ gbɛi akɛ “El, Israel Nyɔŋmɔ lɛ.”