1 Mose 28 - ŊMALƐ KRƆŊKRƆŊ LƐ

¹ Kɛkɛ ni Isak tsɛ Yakob ni ejɔɔ lɛ, ni ewo lɛ akpɔ ni ekɛɛ, “Kaaŋɔ yoo yɛ Kanaan yei lɛ ateŋ.

² Yaa onyɛ tsɛ Betuel we lɛ, yɛ Mesopotamia, ni oyaŋɔ onyɛ nyɛmi nuu Laban biyei lɛ eko akɛ oŋa.

³ Nyɔŋmɔ Ofe lɛ ajɔɔ bo, ni ehã oshwere ni owo shwiei babaoo koni oshwiei atsɔ̃ majimaji asafo.

⁴ Bɔ ni ejɔɔ Abraham lɛ, ejɔɔ bo kɛ oshwiei nakai nɔŋŋ koni ogbɔtoo shikpɔŋ nɛɛ ni Nyɔŋmɔ kɛhã otsɛ Abraham lɛ atsɔ̃ onɔ.”

⁵ Kɛkɛ ni Isak wo Yakob gbɛ koni eya Mesopotamia yɛ Aramnyo Betuel bi Laban ni ji Yakob kɛ Esau nyɛ Rebeka nyɛmi nuu lɛ ŋɔɔ.

Esau ŋɔ yoo kroko hu

⁶ Esau na akɛ Isak ejɔɔ Yakob, ni ewo lɛ gbɛ kɛtee Mesopotamia koni eyaŋɔ yoo yɛ jɛi.

⁷ Ena ele hu akɛ be ni Isak jɔɔ Yakob lɛ, ewo lɛ akpɔ akɛ ekaŋɔ yoo yɛ Kanaan yei lɛ ateŋ, ni Yakob ebo etsɛ kɛ enyɛ toi ni etee Mesopotamia.

⁸ Esau na hu akɛ etsɛ nyãaa Kanaan yei lɛ ahe.

⁹ Enɛɛmɛi ahewɔ lɛ, Esau yiŋ etee Abraham bi Ishmael ŋɔɔ, ni eyaŋɔ ebiyoo Mahalat, Nabaiot nyɛmi yoo lɛ, efata eŋãmɛi ni eyɔɔ lɛ ahe.

Yakob la lamɔ ko yɛ Betel

¹⁰ Yakob jɛ Beersheba ni eyiŋ eeya Haran.

¹¹ Eshɛ he ko ni eto jɛi ejaakɛ hulu enyɔ shi. Ekɔ jɛi tɛi lɛ eko etsɔle, ni ekã jɛi ewɔ.

¹² Ni ela ni aŋtswere ko ma shikpɔŋ ni eyiteŋ eyashi ŋwɛi. Nyɔŋmɔ bɔfoi miikwɔ miikpeleke shi,

¹³ ni Yehowa damɔ aŋtswere lɛ yiteŋ ni ekɛɛ akɛ, “Mi ji Yehowa, otsɛ Abraham Nyɔŋmɔ, kɛ Isak Nyɔŋmɔ lɛ; shikpɔŋ ni okã nɔ nɛɛ, bo kɛ oshwiei mikɛbaahã.

¹⁴ Oshwiei aaafa tamɔ shikpɔŋ mlu, ni ooogbɛ oshwã anai kɛ bokã kɛ kooyi kɛ wuoyi. Bo kɛ oshwiei amli aaajɛ ajɔɔ shikpɔŋ lɛ nɔ akutsei fɛɛ.

¹⁵ Na ole akɛ mikɛ bo yɛ ni he fɛɛ he ni oyaa lɛ, mabu ohe, ni mikɛ bo aaaba shikpɔŋ nɛɛ nɔ ekoŋŋ, ejaakɛ mishiŋ bo kɛyaashi beyinɔ ni mafee nɔ ni mitsi tã mikɛɛ bo lɛ.”

¹⁶ Kɛkɛ ni Yakob hiɛ tsɛ̃ kɛjɛ ewɔ lɛ mli, ni ekɛɛ akɛ, “Yehowa yɛ biɛ kwa, ni mi lɛ mileee nɛɛ!”

¹⁷ Yakob she gbeyei, ni ekɛɛ akɛ, “Biɛ nɛɛ yɛ gbeyei eei! Biɛ nɛɛ jeee he ko he ko akɛ Nyɔŋmɔ we, ni ŋwɛi naa agbo nɛ!”

¹⁸ Yakob te shi leebi maŋkpa ni etee tɛ lɛ ni etsɔle lɛ shi ema shi ekɛto okadi, ni efɔse mu eshwie nɔ.

¹⁹ Ewo jɛi Betel; shi sa lɛ, nakai maŋ lɛ gbɛi ji Luz.

²⁰ Yakob wo shi ni ekɛɛ akɛ, “Kɛji Nyɔŋmɔ kɛ mi aaahi shi, ni eeebu mihe yɛ gbɛ ni miyanyiɛ nɛɛ mli, ni eeehã miŋmãa maye kɛ atade mawo,

²¹ ni maku misɛɛ maba mitsɛ we lɛ kɛ omanye lɛ, no lɛ Yehowa aaatsɔ̃ miNyɔŋmɔ,

²² ni nɛkɛ tɛ nɛɛ ni mikɛma shi mikɛto okadi nɛɛ aaatsɔ̃ Nyɔŋmɔ we; ni maŋɔ nibii fɛɛ ni ooohã mi lɛ amlijaa nyɔŋma kome mahã bo.”