1 Mose 21 - ŊMALƐ KRƆŊKRƆŊ LƐ

Isak fɔmɔ

¹ Yehowa baduro Sara tamɔ bɔ ni ewo shi lɛ ni Yehowa fee nɔ ni ewo shi eto lɛ ehã lɛ.

² Be ni Nyɔŋmɔ to hã Sara lɛ shɛ, ni Sara na musu ni ekɛ Abraham fɔ binuu yɛ egbɔlɛ mli.

³ Abraham wo ebi ni ekɛ Sara fɔ lɛ gbɛi akɛ Isak.

⁴ Ni Abraham fo ebi Isak ketia be ni gbekɛ lɛ ena gbii kpaanyɔ, tamɔ bɔ ni Nyɔŋmɔ ewo lɛ kitã lɛ.

⁵ Abraham eye afii oha be ni efɔ ebi Isak lɛ.

⁶ Ni Sara kɛɛ akɛ, “Nyɔŋmɔ ewo minaaŋmɔlɔ, ni mɔ fɛɛ mɔ ni aaanu he lɛ aaaŋmɔ eko.”

⁷ Asaŋ ekɛɛ akɛ, “Kulɛ namɔ aaagba Abraham akɛ Sara aaahã ebii afufɔ? Shi mikɛ lɛ efɔ bi yɛ egbɔlɛ mli.”

⁸ Gbekɛ lɛ bada, ni atse lɛ fufɔ; ni Abraham ŋmɛ okplɔ̃ kpeteŋkple gbi nɔ ni atse lɛ fufɔ lɛ.

Awo Hagar kɛ Ishmael gbɛ

⁹ Shi Sara na Ishmael, Hagar Ijiptyoo lɛ binuu lɛ ni ekɛ Abraham fɔ lɛ, ni ekɛ Sara bi Isak miishwɛ.

¹⁰ Ni Sara kɛɛ Abraham akɛ, “Shwiemɔ tsulɔyoo nɛɛ kɛ ebi lɛ ni amɛya koni tsulɔyoo nɛɛ binuu lɛ kɛ mibi Isak akaja gboshinii lɛ.

¹¹ Wiemɔ nɛɛ eŋɔɔɔ Abraham naa kwraa yɛ ebi Ishmael hewɔ.

¹² Shi Nyɔŋmɔ kɛɛ Abraham akɛ, ‘Kaahã oblanyo lɛ kɛ otsulɔyoo lɛ sane lɛ miidɔ bo. Nɔ fɛɛ nɔ ni Sara aaakɛɛ bo lɛ, bo egbee toi ni ofee ejaakɛ Isak gbɛi mli aaatsɛ oshwiei agbɛi yɛ.

¹³ Tsulɔyoo lɛ binuu lɛ hu, mahã etsɔ̃ maŋ kpele ejaakɛ oshwie ji lɛ.’ ”

¹⁴ Abraham te shi leebi maŋkpa. Ekɔ aboloo ni ewo nu kɛ tɔ ekɛtswa Hagar kɔŋ. Ekɛ gbekɛ lɛ hu hã Hagar, kɛkɛ ni ewo lɛ gbɛ. Hagar yi mli ni eyatsomlo yɛ Beersheba ŋa lɛ nɔ.

¹⁵ Be ni nu lɛ tã yɛ wolo tɔ lɛ mli lɛ, Hagar ŋmɛɛ gbekɛ lɛ he efɔ̃ koowie ko mli.

¹⁶ Ni etee eyata sɛɛ flɛŋŋ aaafee tɛfɔ̃ɔ jɛkɛmɔ yɛ gbekɛ lɛ ŋlɛnɔ; ejaakɛ ekɛɛ akɛ, “Minyɛŋ makwɛ gbekɛ lɛ gbele.” Eho eta shi yɛ gbekɛ lɛ ŋlɛnɔ ni gbekɛ lɛ jwa yaafo.

¹⁷ Nyɔŋmɔ nu oblanyo lɛ gbee, ni Nyɔŋmɔ bɔfo jɛ ŋwɛi etsɛ Hagar, ni ekɛɛ lɛ akɛ, “Mɛni gbaa onaa Hagar? Kaashe gbeyei, shi Nyɔŋmɔ enu gbekɛ lɛ gbee yɛ he ni gbekɛ lɛ yɔɔ lɛ.

¹⁸ Tee shi ni owo gbekɛ lɛ nɔ, hiɛmɔ lɛ jogbaŋŋ, ejaakɛ mahã etsɔ maŋ kpeteŋkple.”

¹⁹ Kɛkɛ ni Nyɔŋmɔ gbele Hagar hiŋmɛii, ni ena nubu ko. Eyiŋ etee, ni eyayɛ nu ewo wolo tɔ lɛ mli obɔ̃, ni ehã gbekɛ nuu lɛ eko enu.

²⁰ Nyɔŋmɔ kɛ gbekɛ nuu lɛ yɛ ni eda. Ehi shi yɛ ŋa lɛ nɔ ni etsɔ gãitsɛ̃lɔ ni he esa naakpa.

²¹ Ehi shi yɛ Paran ŋa lɛ nɔ, ni enyɛ yaŋɔ yoo kɛjɛ Ijipt shikpɔŋ lɛ nɔ ebahã lɛ.

Abraham kɛ Abimelek kpãŋ

²² Nɛkɛ be nɛɛ mli lɛ, Abimelek kɛ etatsɛ Fikol bakɛɛ Abraham akɛ, “Nyɔŋmɔ kɛ bo yɛ, yɛ nibii fɛɛ ni ofeɔ lɛ mli.

²³ No hewɔ lɛ, agbɛnɛ, okɛ Nyɔŋmɔ akã mi kitã yɛ biɛ nɛɛ akɛ oyeŋ mi loo mibii loo mihɔi kutumpɔo; shi bɔ ni miyeɔ bo anɔkwa lɛ, nakai obaafee mi kɛ shikpɔŋ ni obato gbɔ yɛ nɔ nɛɛ.”

²⁴ Ni Abraham kɛɛ akɛ, “Makã kitã lɛ.”

²⁵ Shi Abraham kɛ Abimelek wie kɛ dɔlɛ yɛ nubu ko ni Abimelek tsuji lɛ eshɔ̃ ekãa naa yɛ edɛ lɛ he.

²⁶ Ni Abimelek kɛɛ akɛ, “Mileee mɔ ni ye nɛkɛ sane nɛɛ, ni bo hu otsiii tã okɛɛɛ mi lɛ, asaŋ minuko da hu, akɛ ja ŋmɛnɛ.”

²⁷ Kɛkɛ ni Abraham kɛ toi kɛ tsinai hã Abimelek ni amɛyi enyɔ lɛ fɛɛ amɛkpãŋ.

²⁸ Abraham jie toi lɛ amli gwantɛŋ biyei kpawo eto afã.

²⁹ Abimelek bi Abraham akɛ, “Nɛkɛ gwantɛŋ biyei kpawo ni ojie oto afã nɛɛ, te eshishiŋ?”

³⁰ Ni Abraham kɛɛ, “Gwantɛŋ biyei kpawo nɛɛ, ŋɔɔ yɛ midɛŋ koni okɛye odase ohã mi akɛ mi mije nɛkɛ nubu nɛɛ.”

³¹ No hewɔ lɛ, Abraham tsɛ jɛi Beersheba, ejaakɛ jɛi amɛyi enyɔ lɛ fɛɛ amɛkãmɔ kitã yɛ.

³² Amɛkpãŋ yɛ Beersheba. Kɛkɛ ni Abimelek kɛ etatsɛ Fikol te shi, ni amɛku amɛsɛɛ kɛba Filistibii lɛ ashikpɔŋ lɛ nɔ ekoŋŋ.

³³ Abraham tɛo tso ko ni atsɛɔ lɛ akɛ tamariske tso lɛ yɛ Beersheba, ni eja Yehowa, Naanɔ Nyɔŋmɔ lɛ, yɛ jɛi.

³⁴ Abraham to gbɔ yɛ Filistibii ashikpɔŋ lɛ nɔ be kplaŋŋ.