1 Mose 20 - ŊMALƐ KRƆŊKRƆŊ LƐ

Abraham kɛ Abimelek

¹ Abraham fã yɛ he ni eyɔɔ lɛ kɛtee wuoyigbɛ shikpɔŋ lɛ nɔ. Eyahi Kadesh kɛ Shur teŋ, ni eyato gbɔ yɛ Gerar.

² Abraham kɛɛ yɛ eŋa hewɔ akɛ, “Minyɛmi yoo ji lɛ.” Kɛkɛ ni Abimelek, Gerar maŋtsɛ lɛ, tsu ayaŋɔ Sara abahã lɛ.

³ Shi Nyɔŋmɔ ba Abimelek ŋɔɔ nyɔɔŋ yɛ lamɔ mli, ni ekɛɛ lɛ akɛ, “Naa, obaagbo yɛ yoo lɛ ni oyaŋɔ lɛ hewɔ, ejaakɛ mɔ ko ŋa ni.”

⁴ Shi Abimelek nako ata Sara he, no hewɔ lɛ, ekɛɛ akɛ, “Nuŋtsɔ, ani ooobutu maŋ ko ni efeko efɔŋ ko lo?

⁵ Ani jeee Abraham diɛŋtsɛ kɛɛ mi akɛ, ‘Minyɛmi yoo ji lɛ’ lɛ? Ni yoo lɛ diɛŋtsɛ hu kɛɛ akɛ, ‘Minyɛmi nuu ji lɛ’ lɛ? Mihe nɔ ni amɛkɛɛ mi lɛ miye, ni nɔ ni mifee nɛɛ lɛ, mijɛ tsui ni tse mli mikɛfee, ni midɛŋ hu diii.”

⁶ Kɛkɛ ni Nyɔŋmɔ kɛɛ Abimelek yɛ lamɔ lɛ mli akɛ, “Hɛɛ, mi hu mile akɛ onɔkwale fɛɛ okɛfee enɛ. Asaŋ, mi ni mitsi onaa koni okafee esha oshi mi, no hewɔ ni mihãaa bo hegbɛ akɛ ota ehe lɛ.

⁷ No hewɔ lɛ, agbɛnɛ kɛ nuu lɛ ŋa lɛ aku sɛɛ oyahã lɛ ejaakɛ gbalɔ ji lɛ, ni eeesɔle ekpa fai ehã bo, ni oyi aaana wala. Shi kɛji okɛ lɛ hãaa lɛ lɛ, no lɛ na ole akɛ gbo ooogbo, bo kɛ mɛi fɛɛ ni ji onɔ lɛ.”

⁸ No hewɔ lɛ, Abimelek te shi leebi maŋkpa, ni etsɛ etsuji lɛ fɛɛ, ni ebɔ amɛ nɔ ni ba lɛ fɛɛ; ni hii lɛ she gbeyei naakpa.

⁹ Kɛkɛ ni Abimelek tsɛ Abraham ni ekɛɛ lɛ akɛ, “Mɛni ofee wɔ nɛɛ? Mɛni esha mifee bo hewɔ ni otsi mi kɛ mimaŋtsɛyeli lɛ owo esha kpeteŋkple tamɔ nɛkɛ mli nɛɛ? Nɔ ni afeee ofee mi nɛɛ.”

¹⁰ Asaŋ Abimelek bi Abraham akɛ, “Mɛni osusu hewɔ ofee enɛ?”

¹¹ Abraham to he akɛ, “Miyasusu akɛ ekolɛ mɛi ni yɔɔ biɛ nɛɛ lɛ sheee Nyɔŋmɔ gbeyei, ni amɛbaagbe mi yɛ miŋa lɛ hewɔ.

¹² Ni asaŋ eyɛ mli lɛɛlɛŋ akɛ minyɛmi yoo ni, ejaakɛ mitsɛbi ni, shi jeee minyɛbi ni, ni etsɔ miŋa.

¹³ No hewɔ lɛ, be ni Nyɔŋmɔ hã mije mitsɛ we lɛ ni miyatsomlo lɛ, mikɛɛ miŋa lɛ akɛ, ‘Enɛ ji ejurɔ ni mitaoɔ ni ofee mi: He fɛɛ he ni wɔɔshɛ lɛ, kɛɛmɔ yɛ mihe akɛ minyɛmi nuu ni.’ ”

¹⁴ Kɛkɛ ni Abimelek ŋɔ toi kɛ tsinai kɛ wehii kɛ weyei eyahã Abraham, ni ekɛ eŋa Sara lɛ ku sɛɛ ehã lɛ.

¹⁵ Abimelek kɛɛ Abraham akɛ, “Mishikpɔŋ lɛ kã ohiɛ nɛɛ; hii he ni osumɔɔ.”

¹⁶ Ni Sara lɛ ekɛɛ lɛ akɛ, “Naa, mihã onyɛmi nuu lɛ shika jwiɛtɛi kukuji akpe ni yeɔ odase yɛ mɛi ni kɛ bo yɔɔ lɛ ahiɛ akɛ muji ko bɛ ohe.”

¹⁷ Kɛkɛ ni Abraham kpa Nyɔŋmɔ fai, ni Nyɔŋmɔ tsa Abimelek kɛ eŋa kɛ eweyei lɛ, ni amɛfɔfɔɔ bii,

¹⁸ ejaakɛ kulɛ Yehowa eŋa yei fɛɛ ni yɔɔ Abimelek we lɛ amusu naa yɛ Abraham ŋa Sara sane lɛ hewɔ.