1 Mose 16 - ŊMALƐ KRƆŊKRƆŊ LƐ

Hagar kɛ Ishmael

¹ Agbɛnɛ Sarai, Abram ŋa lɛ fɔɔɔ; shi eyɛ weyoo Ijiptyoo ko ni egbɛi ji Hagar.

² Ni Sarai kɛɛ Abram akɛ, “Naa, Yehowa etsi mifɔmɔ naa. Okɛ minyɔŋyoo lɛ ayawɔ; eko lɛ mana bii kɛaatsɔ̃ enɔ.” Ni Abram bo Sarai toi.

³ No hewɔ lɛ, Sarai ŋɔ Ijiptyoo Hagar, eweyoo lɛ, ehã ewu Abram gbãlã, be ni Abram eye afii nyɔŋma yɛ Kanaan shikpɔŋ lɛ nɔ lɛ.

⁴ Abram kɛ Hagar na musu; shi be ni Hagar na akɛ ehiɛ musu lɛ, ewula lɛ heguɔ gbo yɛ ehiɛ.

⁵ Kɛkɛ ni Sarai kɛɛ Abram akɛ, “Sane ni eŋɔɔɔ ni akɛyeɔ mi nɛɛ, sɔ̃ lɛ atere bo! Mikɛ miweyoo lɛ hã bo; shi kɛjɛ be ni ena akɛ ena musu lɛ, mihiɛ eshwiei shi yɛ ehiɛ. Nyɔŋmɔ aaakojo mi kɛ bo teŋ sane nɛɛ.”

⁶ Shi Abram kɛɛ Sarai akɛ, “Naa, oweyoo lɛ yɛ odɛ̃ŋ; feemɔ lɛ bɔ ni osumɔɔ.” No hewɔ lɛ, Sarai nyɛ Hagar hiɛ, ni Hagar jo foi kɛje eŋɔɔ.

⁷ Yehowa bɔfo lɛ na Hagar yɛ nubu ko he yɛ ŋa lɛ nɔ, yɛ Shur gbɛ lɛ nɔ nubu lɛ he.

⁸ Bɔfo lɛ bi lɛ akɛ, “Hagar! Sarai weyoo, nɛgbɛ ojɛ? Ni nɛgbɛ hu oyaa?” Hagar to he ekɛɛ, “Miijo foi kɛjɛ miwula Sarai ŋɔɔ.”

⁹ Yehowa bɔfo lɛ kɛɛ lɛ akɛ, “Kuu osɛɛ kɛya owula lɛ ŋɔɔ, ni oba ohe shi ohã lɛ.”

¹⁰ Asaŋ Yehowa bɔfo lɛ kɛɛ Hagar akɛ, “Fa mahã oshwiei afa babaoo bɔ ni anyɛŋ amɛ akane.”

¹¹ Yehowa bɔfo lɛ tee nɔ ekɛɛ Hagar akɛ, “Naa, ohiɛ musu ni obaafɔ binuu ni gbɛi ni ooowo lɛ ji Ishmael, ejaakɛ Nyɔŋmɔ ena bɔ ni onaa nɔ ni oyoyro lɛ,

¹² shi gbekɛ lɛ aaafee enii tamɔ ŋaŋ teji, ekɛ mɔ fɛɛ mɔ aaana, ni mɔ fɛɛ mɔ hu kɛ lɛ aaana, ni ekɛ ewekumɛi efeŋ nɔ ko.”

¹³ Hagar bi ehe akɛ, “Ani mina Nyɔŋmɔ lɛɛlɛŋ ni fɛɛ sɛɛ lɛ mihiɛ kã lolo nɛɛ?” No hewɔ lɛ, etsɛ Yehowa mɔ ni kɛ lɛ wie lɛ akɛ, “Nyɔŋmɔ ni naa mi.”

¹⁴ Enɛ hewɔ lɛ, atsɛ nɛkɛ bu nɛɛ akɛ, “Beer-lahai-roi”, eshishi ji, “Mɔ ni hiɛ kã ni enaa mi” lɛ nubu. Nubu nɛɛ yɛ Kadesh kɛ Bered teŋ.

¹⁵ Ni Hagar kɛ Abram fɔ binuu, ni Abram wo ebi ni Hagar fɔ lɛ gbɛi akɛ Ishmael.

¹⁶ Abram eye afii nyɔŋmai kpaanyɔ kɛ ekpaa be ni Hagar kɛ lɛ fɔ Ishmael lɛ.