1 Mose 13 - ŊMALƐ KRƆŊKRƆŊ LƐ

Abram kɛ Lot gbala mli

¹ Abram kɛ eŋa kɛ nɔ fɛɛ nɔ ni eyɔɔ lɛ je Ijipt, ni Lot fata ehe; amɛtee wuoyigbɛ.

² No mli lɛ Abram ena nii babaoo: shĩaŋ kooloi kɛ jwiɛtɛi kɛ shika tsuru.

³ Etsa egbɛfãa lɛ nɔ fiofio kɛjɛ wuoyigbɛ aahu kɛtee Betel. Eyashɛ he ko yɛ Betel kɛ Ai teŋ, he ni eshi ebuu lɛ yɛ ni ema afɔleshãa latɛ yɛ tsutsu ko lɛ.

⁴ Biɛ Abram ja Yehowa yɛ.

⁵ Lot ni kɛ Abram nyiɛ lɛ hu yɛ toi kɛ tsinai kɛ bui,

⁶ ni no hewɔ lɛ, shikpɔŋ lɛ faaa hãaa amɛ bɔ ni amɛyi enyɔ lɛ fɛɛ amɛaahi he kome, ejaakɛ amɛnibii fa.

⁷ Kɛkɛ ni bei ba Abram koolookwɛlɔi lɛ kɛ Lot koolookwɛlɔi lɛ ateŋ. Nɛkɛ be nɛɛ mli lɛ Kanaanbii lɛ kɛ Perizbii lɛ yɛ shikpɔŋ lɛ nɔ.

⁸ Kɛkɛ ni Abram kɛɛ Lot akɛ, “Kaahã bei miiba mi kɛ bo teŋ kɛ mikoolookwɛlɔi lɛ kɛ okoolookwɛlɔi lɛ ateŋ, ejaakɛ nyɛmimɛi ji wɔ.

⁹ Shikpɔŋ muu lɛ fɛɛ kã ohiɛ nɛɛ. Tse ohe yɛ mihe. Kɛji okɔ abɛkugbɛ lɛ, no lɛ makɔ ninejurɔgbɛ; ni kɛji okɔ ninejurɔgbɛ lɛ, no lɛ makɔ abɛkugbɛ.”

¹⁰ Kɛkɛ ni Lot wo ehiɛ nɔ ni ekwɛ shikpɔŋ lɛ kɛkpe, ni ena akɛ Yordan jɔɔ lɛ fɛɛ yɛ frɔ̃frɔ̃ aahu kɛtee Zoar tɔ̃ɔ. Etamɔ Yehowa trom lɛ aloo Ijipt shikpɔŋ lɛ. Nɛkɛ be mli lɛ, Yehowa kpãtãko Sodom kɛ Gomora hiɛ.

¹¹ Kɛkɛ ni Lot kɔ Yordan jɔɔ lɛ fɛɛ, ni efã kɛtee bokãgbɛ. Bɔ ni fee ni amɛyi enyɔ lɛ amɛgbala mli nɛ.

¹² Abram hi Kanaan shikpɔŋ lɛ nɔ, ni Lot hi maji ni yɔɔ Yordan jɔɔ lɛ mli lɛ amli. Lot shi ebuu lɛ shii abɔ kɛyashi be ni eyashɛ Sodom.

¹³ Shi Sodombii lɛ yiwalɔi ji amɛ, ni amɛfeɔ esha amɛshiɔ Yehowa.

Abram fã kɛtee Hebron

¹⁴ Be ni Lot kɛ Abram egbala mli sɛɛ lɛ, Yehowa kɛɛ Abram akɛ, “Wo ohiɛ nɔ, ni ojɛ he ni oyɔɔ lɛ okwɛ kooyigbɛ kɛ wuoyigbɛ kɛ bokãgbɛ kɛ anaigbɛ shikpɔŋ ni onaa nɛɛ,

¹⁵ bo kɛ oshwiei mikɛbaahã kɛaatee naanɔ.

¹⁶ Mahã oshwiei afa tamɔ shikpɔŋ mlu, ni kɛji mɔ ko aaanyɛ shikpɔŋ mlu akane lɛ, belɛ aaanyɛ oshwiei lɛ hu akane.

¹⁷ Tee shi, nyiɛmɔ shikpɔŋ lɛ nɔ kɛtsɔ̃ ekɛlɛ kɛ elɛɛmɔ nɔ, shi bo mikɛbaahã”.

¹⁸ Kɛkɛ ni Abram fã ebuu lɛ, ni eba ebahi Mamre tsei krɔŋkrɔŋi lɛ ni yɔɔ Hebron lɛ amasɛi, ni ema afɔleshãa latɛ yɛ jɛi ehã Yehowa.