1 Kronika 29 - ŊMALƐ KRƆŊKRƆŊ LƐ

Sɔlemɔtsu lɛ maa he nikeenii

¹ Kɛkɛ ni Maŋtsɛ David kɛɛ asafo muu lɛ akɛ, “Mibi Solomon, mɔ koome ni Nyɔŋmɔ eŋɔ̃ lɛ, oblanyo ni, ni ekpako jeŋ shi; shi nitsumɔ ni ebakã enɔ lɛ da, ejaakɛ tsu lɛ jeee gbɔmɔ amãa ahã, shi Yehowa Nyɔŋmɔ lɛ.

² No hewɔ lɛ, misaa nibii mito, bɔ ni manyɛ, yɛ miNyɔŋmɔ lɛ Sɔlemɔ we lɛ hewɔ: shika kɛ jwiɛtɛi kɛ akɔɔble kɛ dade kɛ tso ni akɛbaatsu amɛhe nibii srɔtoi, dani soro ojarawa tɛi srɔtoi kɛ tɛi ni akɛmamɔɔ nibii amli akɛyeɔ sama, kɛ tɛi ni kpɛlɛɔ kɛ tɛi ni yɔɔ ŋwãtãŋwãtã kɛ tɛi ni akɛkaa shikpɔŋ.

³ Nibii ni misaa mito Shĩa Krɔŋkrɔŋ lɛ mãa nɛɛ fɛɛ sɛɛ lɛ, mikɛ mi diɛŋtsɛ mishika kɛ jwiɛtɛi ni miyɔɔ hu miihã koni akɛfata nibii lɛ ahe, ejaakɛ miNyɔŋmɔ lɛ Sɔlemɔ we lɛ he sane lɛ kã mitsui nɔ.

⁴ Mihã shika ŋmiiŋmi ni tsiimɔ ji talentai akpei etɛ̃ kɛ jwiɛtɛi ni tsiimɔ ji talentai akpei kpawo koni akɛka Sɔlemɔ we lɛ gbogboi lɛ ahiɛ;

⁵ asaŋ koni ana eko ni ŋaalɔi lɛ kɛfee nibii fɛɛ ni esa akɛ akɛ shika kɛ jwiɛtɛi afee lɛ. Agbɛnɛ namɔ yɔɔ biɛ ni yɔɔ he tsui akɛ eeeshã afɔle ehã Yehowa?”

⁶ Kɛkɛ ni tsɛmɛiawei lɛ amli onukpai lɛ kɛ akutsei lɛ amli lumɛi lɛ, kɛ tabilɔi akpe akuikui kɛ tabilɔi oha akuikui atatsɛmɛi lɛ, kɛ maŋtsɛ sɛ̃i lɛ he nibii anɔkwɛlɔi lɛ shi amɛtsitsi akɛ amɛaahã nibii lɛ.

⁷ Ni amɛhã nibii ni baa nɛɛ koni akɛtsu Sɔlemɔtsu lɛ mãa lɛ he nii: shika ŋmiiŋmi ni tsiimɔ ji talentai akpei enumɔ kɛ shika ŋmiiŋmi ni tsiimɔ ji dalei akpei nyɔŋma kɛ jwiɛtɛi ni tsiimɔ ji talentai akpei nyɔŋma kɛ akɔɔble ni tsiimɔ ji talentai akpei nyɔŋma kɛ kpaanyɔ kɛ dade ni tsiimɔ ji talentai akpei oha.

⁸ Maŋbii fɛɛ ni yɔɔ ojarawatɛi lɛ, amɛkɛtee amɛyahã koni akɛwo Yehowa nitoohe lɛ ni Yehiel, Levinyo Gershonnyo lɛ, kwɛɔ nɔ lɛ mli.

⁹ Agbɛnɛ maŋ muu lɛ fɛɛ nya yɛ nii ni amɛkɛke yɛ tsuijurɔ naa lɛ hewɔ. Ejaakɛ amɛjɛ amɛtsuiiaŋ amɛkɛ nii ke Yehowa, ni Maŋtsɛ David hu nya naakpa.

David jie Nyɔŋmɔ yi

¹⁰ Kɛkɛ ni Maŋtsɛ David jie Yehowa yi yɛ asafo muu lɛ fɛɛ hiɛ ekɛɛ akɛ, “Aaajie oyi, Bo Yehowa, ni ji wɔtsɛ Yakob Nyɔŋmɔ lɛ, kɛjɛ naanɔ kɛyashi naanɔ.

¹¹ Yehowa, oda ni Bo oyɔɔ hewalɛ kɛ anunyam; oyeɔ nii fɛɛ nɔ kunim, ni oje agbo ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ onɔ ni. Yehowa, bo ji maŋtsɛ ni ota nii fɛɛ nɔ akɛ yitso.

¹² Bo ohãa anaa nii; bo ohãa mɔ hiɛ baa nyam; ni bo oyeɔ nii fɛɛ nɔ. Odɛ̃ŋ hewalɛ fɛɛ kɛ nyɛmɔ fɛɛ yɔɔ; ni hewalɛ ni akɛfeɔ gbɔmɔ mɔ wulu, asaŋ ni akɛhãa mɔ naa hewalɛ lɛ, Bo odɛ̃ŋ eyɔɔ.

¹³ No hewɔ lɛ, wɔNyɔŋmɔ, wɔmiida bo shi, ni wɔmiijie ogbɛi ni hiɛ yɔɔ nyam lɛ yi.

¹⁴ “Ni namɔ po ji mi, ni namɛi po hu ji mimaŋbii, ni wɔnyɛ wɔke nii kɛ tsuijurɔ nɛkɛ nɛɛ? Ejaakɛ odɛ̃ŋ ni nii fɛɛ jɛɔ, ni no hewɔ lɛ, nɔ ni wɔkɛhã bo lɛ odɛ̃ŋ nɔŋŋ wɔna yɛ.

¹⁵ Ohiɛ lɛ, gbɔi kɛ mɛi kpɔ̃ji ji wɔ, tamɔ wɔtsɛmɛi lɛ fɛɛ nɔŋŋ. Wɔgbii ni wɔyeɔ yɛ shikpɔŋ lɛ nɔ lɛ hoɔ eyaa tamɔ susuma ni ehiii shi daa lɛ.

¹⁶ Yehowa, wɔNyɔŋmɔ, nii babaoo ni wɔbua naa wɔkɛbaama shĩa wɔkɛwo ogbɛi krɔŋkrɔŋ lɛ hiɛ nyam nɛɛ lɛ, bo diɛŋtsɛ nɔŋŋ onii ni, ejaakɛ odɛ̃ŋ fɛɛ jɛ.

¹⁷ MiNyɔŋmɔ, mile akɛ bo lɛ okaa gbɔmɔ tsui okwɛɔ, ni onaa mɛi ni yeɔ anɔkwa he miishɛɛ. Mijɛ mitsuiŋ fɛɛ kɛ suɔmɔ mli mikɛ nibii nɛɛ fɛɛ ke, ni agbɛnɛ miina akɛ omaŋ ni jwere shi nɛɛ hu miike bo nii kɛ miishɛɛ kɛ nyamɔ.

¹⁸ Yehowa, wɔtsɛmɛi Abraham kɛ Isak kɛ Yakob aNyɔŋmɔ, hã su nɛɛ ahi owebii atsuiiaŋ kɛya naanɔ, koni amɛhi shi kɛye bo anɔkwa daa.

¹⁹ Dromɔ mibi Solomon koni ekɛ etsui fɛɛ aye okitãi kɛ okpɔi kɛ owiemɔi fɛɛ anɔ koni emã Sɔlemɔtsu lɛ ni misaa ehe nibii mito lɛ.”

²⁰ Kɛkɛ ni David kɛɛ asafo ni ewo shi lɛ akɛ, “Nyɛjiea Yehowa, nyɛNyɔŋmɔ lɛ, yi!” Ni asafo muu lɛ fɛɛ jie Yehowa, amɛtsɛmɛi aNyɔŋmɔ lɛ, yi; ni amɛmamɔ amɛyi shi amɛja Yehowa, ni amɛkoto maŋtsɛ lɛ hu.

²¹ No sɛɛ lɛ, amɛshãshãa afɔlei amɛhã Yehowa; ni enɔ jetsɛremɔ lɛ amɛshã shãa afɔlei amɛhã Yehowa kɛ tsinahii akpe kɛ ojwɛnii akpe, kɛ gwantɛŋbii hu akpe kɛ amɛhe dãa afɔlei hu. Amɛshãshãa afɔlei babaoo diɛŋtsɛ yɛ Israelbii fɛɛ ahewɔ.

²² Nakai gbi lɛ Israelbii lɛ yeyee nii ni amɛnunuu dãi yɛ Yehowa hiɛ kɛ nyamɔ babaoo. Amɛsaa amɛwo Solomon, David bi lɛ, maŋtsɛ nɔ ni ji shii enyɔ nɔ. Amɛfɔ lɛ mu yɛ Yehowa gbɛi mli akɛ lumɔ kɛ Zadok hu akɛ osɔfo.

²³ Kɛkɛ ni Solomon bata Yehowa maŋtsɛyeli sɛ̃i lɛ nɔ yɛ etsɛ David najiaŋ. Emaŋtsɛyeli lɛ shwere, ni Israel muu fɛɛ bo lɛ toi.

²⁴ Maŋ onukpai lɛ fɛɛ kɛ tatsɛmɛi lɛ fɛɛ kɛ Maŋtsɛ David bihii krokomɛi lɛ hu fɛɛ ba amɛhe shi amɛhã Maŋtsɛ Solomon.

²⁵ Yehowa duro Solomon, ni etsɔ̃ gbɔmɔ wulu kpanaa, ni Israel muu fɛɛ hiɛ sɔ lɛ, ni ehã emaŋtsɛyeli lɛ hiɛ ba nyam bɔ ni maŋtsɛmɛi ni nyiɛ ehiɛ yɛ Israel lɛ eko nako nakai henɔ dã.

David Maŋtsɛyeli lɛ mli sane lɛ kuku bɔ

²⁶ David, Yeshai bi lɛ, ye Israel muu fɛɛ maŋtsɛ

²⁷ afii nyɔŋmai ejwɛ. Eye maŋtsɛ afii kpawo yɛ Hebron, ni eye maŋtsɛ afii nyɔŋmai etɛ̃ kɛ etɛ̃ yɛ Yerusalɛm.

²⁸ Egbɔ kotokoto dani egbo; ni egbo akɛ niiatsɛ kɛ mɔ ni abuɔ hu, ni ebi Solomon baye maŋtsɛ yɛ esɛɛ.

²⁹ Maŋtsɛ David wala he saji kɛjɛ shishijee kɛyagbe naa lɛ, aŋmãla bluublu yɛ gbalɔi Samuel kɛ Natan kɛ Gad ahe saji lɛ amli.

³⁰ Saji lɛ gbaa wɔ bɔ ni Maŋtsɛ David tsɔ̃ eye emaŋtsɛ kɛ bɔ ni hewalɛ ni ehiɛ lɛ naa wa hã kɛ saji fɛɛ ni ba yɛ lɛ kɛ Israel kɛ maji ni yɔɔ shikpɔji lɛ anɔ lɛ amli majiatsɛmɛi lɛ fɛɛ ahe lɛ.