1 Kronika 28 - ŊMALƐ KRƆŊKRƆŊ LƐ

David tsɔ̃ɔ bɔ ni ama Sɔlemɔtsu lɛ ahã

¹ Maŋtsɛ David kpee Israel lumɛi lɛ fɛɛ kɛba Yerusalɛm. No hewɔ lɛ, akutsei lɛ amli lumɛi lɛ, kɛ kuikui ni sɔ̃mɔɔ maŋtsɛ lɛ amli lumɛi lɛ, kɛ tabilɔi akpe akuikui kɛ tabilɔi oha akuikui atatsɛmɛi lɛ, kɛ maŋtsɛ sɛ̃i lɛ he nibii lɛ kɛ maŋtsɛbii lɛ anibii lɛ kɛ tsinai lɛ anɔkwɛlɔi lɛ kɛ hii kãkãlɔi lɛ fɛɛ anaa bakpe shi yɛ Yerusalɛm.

² Kɛkɛ ni Maŋtsɛ David ho edamɔ shi, ni ekɛɛ asafo ni ebabua shi lɛ akɛ, “Agoo, minyɛmimɛi kɛ mimaŋbii! Kulɛ mito miyiŋ akɛ mibama tsu diɛŋtsɛ mahã Yehowa Kpãŋmɔ Adeka lɛ kɛ wɔNyɔŋmɔ lɛ naneshi maaŋoo lɛ hu, ni mito nibii ahe gbɛjianɔ hu hã tsu lɛ maa.

³ Shi Nyɔŋmɔ ekɛɛ mi akɛ, ‘Kaama shĩa ohã mi ni aja mi yɛ mli, ejaakɛ tawulɔ ji bo, ni oshwie lã shi.’

⁴ Shi Yehowa, Israel Nyɔŋmɔ lɛ, lɛ nɔŋŋ eŋɔ mi yɛ mitsɛwebii lɛ fɛɛ ateŋ koni mi kɛ mishwiei aye Israel maŋtsɛ kɛya naanɔ. Eŋɔ̃ Yuda yɛ akutsei lɛ ateŋ koni etsɔ̃ hiɛnyiɛlɔ; ni eŋɔ̃ mitsɛwe lɛ yɛ Yudabii awei lɛ ateŋ, ni ena mihe tsui yɛ mitsɛbii lɛ fɛɛ ateŋ, ni ewo mi Israel fɛɛ maŋtsɛ.

⁵ Ni Yehowa duro mi bii pii, ni bii nɛɛ fɛɛ ateŋ lɛ eŋɔ̃ mibi Solomon koni ebata Yehowa maŋtsɛyeli sɛ̃i lɛ nɔ kɛye maŋtsɛ yɛ Israel.

⁶ “Yehowa kɛɛ mi akɛ, ‘Obi Solomon ji mɔ ni baama mishĩa lɛ, ejaakɛ miŋɔ lɛ mifee mibi, ni matsɔ̃ etsɛ,

⁷ ni mahã emaŋtsɛyeli lɛ ama shi kɛya naanɔ kɛji ekã he eye mikitãi kɛ mimlai lɛ anɔ tamɔ efeɔ amrɔ nɛɛ lɛ.’

⁸ “No hewɔ lɛ, agbɛnɛ, mimaŋbii, miibi nyɛ yɛ Israel tso muu fɛɛ, ni ji Yehowa asafo ni ewo shi nɛɛ, hiɛ, ni wɔNyɔŋmɔ lɛ hu miinu, koni nyɛye Yehowa, nyɛNyɔŋmɔ lɛ, kitãi lɛ fɛɛ anɔ; nyɛdia amɛsɛɛ bɔ ni afee ni nɛkɛ shikpɔŋ kpakpa nɛɛ atsɔ̃ nyɛnɔ, koni nyɛshi nyɛhã nyɛbii ni baa yɛ nyɛsɛɛ lɛ akɛ gboshinii kɛya naanɔ.

⁹ “Ni bo, mibi Solomon, ole otsɛ ni ji Nyɔŋmɔ lɛ; osɔ̃mɔ lɛ kɛ otsuiŋ fɛɛ, asaŋ ojie oyitsoŋ fɛɛ hu ni okɛsɔ̃mɔ lɛ! Ejaakɛ Yehowa taoɔ adesã tsuiŋ fɛɛ, ni ele eyitsoŋ fɛɛ. Kɛji otao esɛɛgbɛ lɛ eeehã ona lɛ; shi kɛji okwa lɛ lɛ, eeeshɛ bo efɔ̃ kɛya naanɔ.

¹⁰ Naa, kwɛmɔ ohe ni ahi, ejaakɛ Yehowa eŋɔ̃ bo koni oma shĩa ni akɛfee Jamɔhe Krɔŋkrɔŋ. Wajemɔ ohe, ni ofee ekãa.”

¹¹ Kɛkɛ ni Maŋtsɛ David kɛ Sɔlemɔ we lɛ mli tsui lɛ ahe mfoniri ni atɛŋ, hã ebi Solomon. Mfoniri nɛɛ tsɔ̃ɔ bɔ ni koi lɛ kɛ ehe tsui lɛ, kɛ nitoohei lɛ, kɛ ŋwɛigbɛ tsui lɛ, kɛ piai ni yɔɔ mligbɛ lɛ, kɛ He Krɔŋkrɔŋ fe Fɛɛ, he ni Kpãŋmɔ Adeka lɛ baama lɛ, kamɔ shi hã.

¹² David kɛ wolo kroko ni atɛŋ hã Solomon ni miitsɔ̃ɔ bɔ ni esusu nibii ni baa nɛɛ ahe eha: Yehowa we lɛ he kpoi lɛ kɛ piai ni bɔle kpo lɛ kɛkpe lɛ, kɛ Nyɔŋmɔ We lɛ mli nibii atoohei lɛ, kɛ nibii ni mɛi kɛbake Nyɔŋmɔ lɛ hu atoohei lɛ.

¹³ Asaŋ David kɛ wolo kroko hu hã Solomon ekoŋŋ ni tsɔ̃ɔ bɔ ni ato gbɛjianɔ ahã osɔfoi lɛ kɛ Levibii lɛ koni amɛkɛtsu amɛnitsumɔi lɛ kɛsɔ̃mɔ yɛ Sɔlemɔ we lɛ, asaŋ kɛkwɛ tsɛnsii kɛ nibii ni akɛtsuɔ Sɔlemɔ we lɛ mli nii lɛ fɛɛ anɔ.

¹⁴ Agbɛnɛ David tsɔ̃ɔ Solomon jwiɛtɛi loo shika naa bɔ ni sa akɛ aŋmɛ̃ koni akɛfee tsɛnsii fɛɛ ni akɛtsuɔ Yehowa we lɛ mli nii lɛ,

¹⁵ kɛ bɔ ni shika kanetsei lɛ kɛ amɛhe kanei lɛ aŋmɛ̃, kɛ bɔ ni jwiɛtɛi kanetsei lɛ kɛ amɛhe kanei lɛ hu aŋmɛ̃ yɛ nɔ ni akɛ kanetso fɛɛ kanetso tsuɔ yɛ jamɔ mli lɛ naa.

¹⁶ Etsɔ̃ɔ lɛ shika bɔ ni shika okpɔlɔi ni akɛ Nyɔŋmɔ aboloo lɛ mãa nɔ lɛ ateŋ eko fɛɛ eko hu aŋmɛ̃, kɛ jwiɛtɛi bɔ ni jwiɛtɛi okpɔlɔi lɛ ateŋ eko fɛɛ eko hu aŋmɛ̃,

¹⁷ kɛ bɔ ni shika ŋmiiŋmi ni akɛbaafee fakai lɛ kɛ okpolui lɛ kɛ kpuji lɛ aŋmɛ̃, kɛ bɔ ni jwiɛtɛi okpolui lɛ hu aŋmɛ̃.

¹⁸ Etsɔ̃ɔ lɛ bɔ ni shika ŋmiiŋmi tsofakɛŋmashãa latɛ lɛ aŋmɛ̃; dani etsɔ̃ɔ lɛ bɔ ni atsɔ̃ afee kerub ni egbɛ amɛfijiaŋ amɛkɛha Yehowa Kpãŋmɔ Adeka lɛ nɔ lɛ ashika shwiili lɛ hu ahã.

¹⁹ Maŋtsɛ David kɛɛ akɛ, “Ajie nibii nɛɛ fɛɛ atsɔ̃ɔ mi kɛjɛ Yehowa dɛŋ, ni aŋmã; ni etsɔ̃ɔ mi bɔ ni atsɔ̃ akwɛ nɔkwɛmɔ nɔ nɛɛ nɔ kɛtsu nɔ fɛɛ nɔ ahã.”

²⁰ Kɛkɛ ni Maŋtsɛ David kɛɛ ebi Solomon akɛ, “Wajemɔ ohe ni ofee ekãa; kaashe gbeyei, ni otsui akafã hu. Ejaakɛ Yehowa Nyɔŋmɔ, ni ji mi, miNyɔŋmɔ lɛ, yɛ osɛɛ; ekwaŋ bo lɛ, eshiŋ bo hu kɛyaashi beyinɔ ni ooogbe Yehowa We lɛ mãa he nitsumɔi lɛ fɛɛ anaa.

²¹ Ni naa bɔ ni ajara Nyɔŋmɔ We lɛ nitsumɔ lɛ ahã osɔfoi akuu kɛ Levibii akuu lɛ. Ni yɛ nitsumɔ fɛɛ nitsumɔ gbɛfaŋ lɛ, ayɛ mɛi ni le ŋaa srɔtoi, ni asaŋ amɛyɛ he tsui tsɔ̃ akɛ amɛaatsu nii kɛwa bo; amɛsɛɛ lɛ lumɛi lɛ kɛ maŋ muu lɛ fɛɛ hu yɛ odɛ̃ŋ.”