1 Kronika 27 - ŊMALƐ KRƆŊKRƆŊ LƐ

Tawuu kɛ Maŋshihilɛ he gbɛjianɔtoi

¹ Agbɛnɛ naa Israelbii lɛ atsɛmɛi awei lɛ amli onukpai kɛ tabilɔi akpe kui atatsɛmɛi kɛ tabilɔi oha kui atatsɛmɛi kɛ amɛshishi lumɛi ni sɔmɔ Maŋtsɛ David kɛkura Israel lɛ. Nyɔŋ fɛɛ nyɔŋ nɔ yɛ afi lɛ mli lɛ, ayɛ tabilɔi akpei nyɔŋmai enyɔ kɛ ejwɛ ni ato ni amɛ amɛsɔmɔɔ yɛ tatsɛnukpa kome krɛdɛɛ ko shishi kɛkura Israel saji.

² Bɔ ni ato gbɛjianɔ lɛ kɛjara nyɔji lɛ ahã tatsɛmɛinukpai lɛ nɛ: Klɛŋklɛŋ nyɔŋ lɛ nɔ asafo ni sɔmɔ lɛ, Yashobeam, Zabdiel bi lɛ, ji mɔ ni kwɛ amɛnɔ. Esafo nɛɛ yikulɛ ji tabilɔi akpei nyɔŋmai enyɔ kɛ ejwɛ.

³ Yashobeam jɛ Perez mli; ni lɛ ji klɛŋklɛŋ nyɔŋ lɛ nɔ tabilɔi lɛ anɔ tatsɛmɛi lɛ fɛɛ atatsɛ nukpa.

⁴ Nyɔŋ ni ji enyɔ lɛ nɔ asafo ni sɔmɔ lɛ, Dodai, Ahohinyo lɛ, ji mɔ ni kwɛ amɛnɔ. Esafo nɛɛ yikulɛ ji tabilɔi akpei nyɔŋmai enyɔ kɛ ejwɛ.

⁵ Tatsɛnukpa ni ji etɛ̃, mɔ ni kwɛ nyɔŋ ni ji etɛ̃ lɛ nɔ asafo ni sɔmɔ lɛ nɔ ji Benaia, Osɔfo Yehoiada bi lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

⁶ Benaia nɛɛ nɔŋŋ ji hii kãkãlɔi nyɔŋmai etɛ̃ lɛ anukpa, ni ebi Amizabad baye esɛɛ akɛ ku nɛɛ nɔkwɛlɔ.

⁷ Tatsɛnukpa ni ji ejwɛ, mɔ ni kwɛ nyɔŋ ni ji ejwɛ lɛ nɔ asafo ni sɔmɔ lɛ nɔ ji Asahel, Yoab nyɛmi nuu lɛ, mɔ ni ebi Zebadia baye esɛɛ lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

⁸ Tatsɛnukpa ni ji enumɔ, mɔ ni kwɛ nyɔŋ ni ji enumɔ lɛ nɔ asafo lɛ nɔ ji Shamhut, Izharnyo lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

⁹ Tatsɛnukpa ni ji ekpaa, mɔ ni kwɛ nyɔŋ ni ji ekpaa lɛ nɔ asafo lɛ nɔ ji Ira, Ikesh bi, Tekonyo lɛ, ni asafo ku lɛ hiɛ mɛi akpei nyɔŋmai enyɔ kɛ ejwɛ.

¹⁰ Tatsɛnukpa ni ji kpawo, mɔ ni kwɛ nyɔŋ ni ji kpawo lɛ nɔ asafo lɛ nɔ ji Helez, Efraimnyo lɛ ni jɛ Pelon lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

¹¹ Tatsɛnukpa ni ji kpaanyɔ, mɔ ni kwɛ nyɔŋ ni ji kpaanyɔ lɛ nɔ asafo lɛ nɔ, ji Sibekai, Zeranyo ni jɛ Husha lɛ. Yudabii ji Zerabii. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

¹² Tatsɛnukpa ni ji nɛɛhu, mɔ ni kwɛ nyɔŋ ni ji nɛɛhu lɛ nɔ asafo lɛ nɔ, ji Abiezer, Benyaminnyo lɛ ni jɛ Anatot lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

¹³ Tatsɛnukpa ni ji nyɔŋma, mɔ ni kwɛ nyɔŋ ni ji nyɔŋma lɛ nɔ asafo lɛ nɔ, ji Maharai, Zeranyo ni jɛ Netofa lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

¹⁴ Tatsɛnukpa ni ji nyɔŋma kɛ ekome, mɔ ni kwɛ nyɔŋ ni ji nyɔŋma kɛ ekome lɛ nɔ asafo lɛ nɔ, ji Benaia, Efraimnyo ni jɛ Piraton lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

¹⁵ Tatsɛnukpa ni ji nyɔŋma kɛ enyɔ, mɔ ni kwɛ nyɔŋ ni ji nyɔŋma kɛ enyɔ lɛ nɔ asafo lɛ nɔ, ji Heldai, Otniel shwiei ni jɛ Netofa lɛ. Esafo lɛ yikulɛ ji tabilɔi akpei nyɔŋmai enyɔ kɛ ejwɛ.

Israel akutsei lɛ anɔkwɛmɔ he gbɛjianɔtoo

¹⁶ Lumɛi ni ato koni amɛkwɛ Israel akutsei lɛ anɔ nɛ: Rubenbii lɛ alumɔ ji Eliezer, Zikri bi lɛ; ni Simeonbii lɛ alumɔ ji Shefatia, Maaka bi lɛ.

¹⁷ Levibii lɛ alumɔ ji Hashabia, Kemuel bi lɛ; ni Aaronbii lɛ alumɔ lɛ ji Zadok.

¹⁸ Yudabii lɛ alumɔ ji Elihu, Maŋtsɛ David nyɛmimɛi lɛ ateŋ mɔ kome lɛ; ni Isakarbii lɛ alumɔ lɛ ji Omri, Mikael bi lɛ.

¹⁹ Zebulonbii lɛ alumɔ ji Ishmaia, Obadia bi lɛ; ni Naftalibii lɛ alumɔ ji Yerimot, Azriel bi lɛ.

²⁰ Efraimbii lɛ alumɔ ji Hoshea, Azazia bi lɛ; ni Anaigbɛ Manasebii lɛ alumɔ lɛ ji Yoel, Pedaia bi lɛ.

²¹ Bokãgbɛ Manasebii lɛ alumɔ ji Ido, Zakaria bi lɛ; ni Benyaminbii lɛ alumɔ lɛ ji Yaasiel, Abner bi lɛ.

²² Danbii lɛ alumɔ ji Azareel, Yehoram bi lɛ. Gbɔmɛi nɛɛ ji Israel akutsei lɛ ahiɛnyiɛlɔi lɛ.

²³ Maŋtsɛ David hãaa akane mɛi ni yeko afii nyɔŋmai enyɔ ejaakɛ Yehowa ewo shi eto akɛ ebaahã Israel yi afa tamɔ ŋwɛi ŋulamii lɛ.

²⁴ Yoab, ni enyɛ gbɛi ji Zeruia lɛ, bɔ̃i maŋbii kanemɔ lɛ, shi eyagbeee naa. Nyɔŋmɔ gbala Israel toi yɛ mɛi kanemɔ nɛɛ hewɔ; ni no hewɔ lɛ, naagbee gbɔmɛi ayikulɛ ni ana lɛ, eyajeee Maŋtsɛ David yinɔ saji anɔ wojiaŋ.

Maŋtsɛ sɛ̃i lɛ he nibii anɔkwɛlɔi

²⁵ Naa mɛi hu ni ato koni amɛkwɛ maŋtsɛ sɛ̃i lɛ he nibii lɛ anɔ: Maŋtsɛ we lɛ mli nitoohei lɛ Azmavet, Adiel bi lɛ, ji mɔ ni kwɛ nɔ; ni nitoohei ni yɔɔ koi asɛɛ kɛ maji kɛ akrowai kɛ mɔji lɛ amli lɛ. Yonatan, Uzia bi lɛ, ji mɔ ni kwɛ nɔ.

²⁶ Ŋmɔji lɛ amli nitsulɔi lɛ Esri, Kelub bi lɛ, ji mɔ ni kwɛ amɛnɔ;

²⁷ ni waintromi lɛ Shimei ni jɛ Rama lɛ ji mɔ ni kwɛ nɔ; ni wain ni yɔɔ wain toohei lɛ amli lɛ, Zabdi ni jɛ Shefam lɛ ji mɔ ni kwɛ nɔ.

²⁸ Mu tsei lɛ kɛ sikamore tsei lɛ ni yɔɔ anaigbɛ gɔji lɛ ashishi jɔɔ lɛ mli lɛ, Baal-Hanan ni jɛ Geder lɛ ji mɔ ni kwɛ nɔ; ni mutoohei lɛ Yoash ji mɔ ni kwɛ nɔ.

²⁹ Tsinai ni alɛ yɛ Sharon ŋa nɔ lɛ, Shirtai ni jɛ Sharon ji mɔ ni kwɛ nɔ; ni tsinai ni alɛ yɛ jɔɔ shikpɔji lɛ anɔ lɛ, Shafat, Adlai bi lɛ, ji mɔ ni kwɛ nɔ.

³⁰ Yoomai lɛ Obil, Ishmaelnyo lɛ, ji mɔ ni kwɛ amɛnɔ; ni tejii lɛ Yehedeia ni jɛ Meronot ji mɔ ni kwɛ amɛnɔ; ni gwantɛŋi kɛ abotiai lɛ Yaziz, Hegrinyo lɛ, ji mɔ ni kwɛ amɛnɔ.

³¹ Mɛnɛɛmɛi fɛɛ ji Maŋtsɛ David tsuji ni kwɛ sɛ̃i lɛ he nibii anɔ lɛ.

Maŋtsɛ David ŋaawolɔi

³² Yonatan, Maŋtsɛ David tsɛkwɛ lɛ, ji maŋtsɛ lɛ ŋaawolɔ. Eji ehe nuu ni yɔɔ jwɛŋmɔ, ni ele woloŋ hu. Lɛ kɛ Yehiel, Hekemoni bi lɛ, ji mɛi ni tsɔ̃ɔ maŋtsɛ lɛ bii nii.

³³ Ahitofel hu maŋtsɛ lɛ ŋaawolɔ ni; ni Hushai, Arkinyo lɛ, ji maŋtsɛ lɛ shieŋtsɛ.

³⁴ Ahitofel gbele sɛɛ lɛ, Yehoiada, Benaia bi lɛ, kɛ Abiatar baye esɛɛ akɛ maŋtsɛ ŋaawolɔi. Ni Yoab ji maŋtsɛ lɛ tatsɛnukpa fe fɛɛ.